ഉത്തർപ്രദേശിലെ മിർസാപൂരിൽ ആംബുലൻസ് ജീവനക്കാർ പൂർണ്ണ ഗർഭിണിയോട് കൊടുംക്രൂരത കാട്ടി. കോത്തി ഖുർദ് ഗ്രാമത്തിലെ അതീഖ് അഹമ്മദിന്റെ ഭാര്യ അർബി ബാനോയ്ക്കാണ് ആംബുലൻസിൽ നിന്ന് റോഡിൽ ഇറക്കിവിട്ടതിനെ തുടർന്ന് ചെളി നിറഞ്ഞ മൺപാതയിൽ പ്രസവിക്കേണ്ടി വന്നത്. സർക്കാർ പ്രാഥമികാരോഗ്യ കേന്ദ്രത്തിലേക്ക് എത്താൻ ചെളി നിറഞ്ഞ മൺപാതയിലൂടെ വാഹനം ഓടിക്കാൻ ഡ്രൈവർ വിസമ്മതിച്ചതാണ് ഈ ദുരന്തത്തിന് കാരണമായത്. ഈ സംഭവത്തിൽ ജില്ലാ കലക്ടർ അന്വേഷണത്തിന് ഉത്തരവിട്ടിട്ടുണ്ട്.
തിങ്കളാഴ്ച രാത്രി വൈകി പ്രസവവേദന അനുഭവപ്പെട്ടതിനെ തുടർന്ന് കുടുംബം 102 ആംബുലൻസ് സർവീസിനെ വിളിക്കുകയായിരുന്നു. ലാൽഗഞ്ച് പോലീസ് സ്റ്റേഷൻ പരിധിയിലുള്ള ബരൗണ്ടയിലെ ന്യൂ പ്രൈമറി ഹെൽത്ത് സെന്ററിന് (പിഎച്ച്സി) സമീപമാണ് സംഭവം നടന്നതെന്ന് റിപ്പോർട്ടുകൾ പറയുന്നു. എന്നാൽ, കുറഞ്ഞ ദൂരത്തേക്ക് പോലും 1.5 മണിക്കൂറിലധികം സമയമെടുത്തതായി ഭർത്താവ് ആരോപിക്കുന്നു. ആശുപത്രി ഗേറ്റിന് പുറത്ത് ഹൈവേയിൽ ഇറക്കിവിട്ടതിന് പിന്നാലെ പ്രസവവേദന കൂടിയ സ്ത്രീ ചെളി നിറഞ്ഞ നിലത്ത് ഒരു പെൺകുഞ്ഞിന് ജന്മം നൽകി. ഉടൻ തന്നെ ആശുപത്രി ജീവനക്കാരെ വിവരമറിയിച്ചതിനെ തുടർന്ന് അവർ സ്ഥലത്തെത്തി അമ്മയെയും നവജാതശിശുവിനെയും ചികിത്സയ്ക്കായി പ്രവേശിപ്പിച്ചു.
ചെളിയിൽ പ്രസവിച്ച ശേഷം നവജാത ശിശുവിനൊപ്പം കിടക്കുന്ന സ്ത്രീയുടെ ദൃശ്യങ്ങൾ സോഷ്യൽ മീഡിയയിൽ വൈറലായതോടെ സംഭവം വലിയ പ്രതിഷേധത്തിന് ഇടയാക്കുകയും മേഖലയിലെ അടിയന്തര ആരോഗ്യ സേവനങ്ങളുടെ ദയനീയമായ അവസ്ഥ തുറന്നുകാട്ടുകയും ചെയ്തു. വീഡിയോ വൈറലായതിനെ തുടർന്ന് ആരോഗ്യവകുപ്പ് വിഷയത്തിൽ ഇടപെട്ടു. സംഭവത്തിൽ അന്വേഷണത്തിന് ഉത്തരവിട്ടിട്ടുണ്ടെന്നും, ആംബുലൻസ് ജീവനക്കാർ അശ്രദ്ധ കാണിച്ചതിന് തീർച്ചയായും കർശന നടപടിയെടുക്കുമെന്നും ഹാൽഡി പിഎച്ച്സിയുടെ ചുമതലയുള്ള ഡോ. അവധേഷ് കുമാർ അറിയിച്ചു.
The post യുപിയിൽ കൊടുംക്രൂരത: ഗർഭിണിയെ റോഡിലിറക്കിവിട്ടു, ചെളി നിറഞ്ഞ മൺപാതയിൽ പ്രസവിച്ചു appeared first on Express Kerala.
