ചണ്ഡീഗഢ്: ഹരിയാനയിലെ റോഹ്തക്കില്‍ പരിശീലനത്തിനിടെ ബാസ്‌കറ്റ്‌ബോള്‍ പോള്‍ നെഞ്ചില്‍ വീണ് ദേശീയ ബാസ്‌കറ്റ്‌ബോള്‍താരം മരിച്ചു. 16 വയസ്സുകാരന്‍ ഹാര്‍ദിക് ആണ് മരിച്ചത്. ലഖാന്‍ മജ്രയിലെ ഒരു സ്വകാര്യ കോര്‍ട്ടില്‍ പരിശീലനം നടത്തുന്നതിനിടെയാണ് അപകടമുണ്ടായത്. സുഹൃത്തുക്കള്‍ ഉടന്‍ ഇയാളെ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.
പരിശീലനത്തിനിടെ ബാസ്‌കറ്റില്‍ തൂങ്ങി നില്‍ക്കാന്‍ ശ്രമിച്ചതാണ് അപകടത്തിനിടയാക്കിയതെന്ന് അറിയുന്നു. ഇതോടെ പോളും ബോര്‍ഡും അടക്കം ഹാര്‍ദിക്കിന്‌റെ മുകളില്‍ വീഴുകയായിരുന്നു.
ദേശീയ ടീമിലേക്ക് തിരഞ്ഞെടുക്കപ്പെട്ടതിനെത്തുടന്നാണ് പിതാവ് സന്ദീപ് രതി വീടിനടുത്തുള്ള ഈ സ്‌പോര്‍ട്‌സ് ക്ലബ്ബില്‍ ഹാര്‍ദിക്കിനെ ചേര്‍ത്തത്. സംഭവത്തില്‍ പൊലീസ് കേസ് രജിസ്റ്റര്‍ ചെയ്തിട്ടുണ്ട്.
ഹരിയാനയിലെ ബഹാദൂര്‍ഗഡ് ജില്ലയിലും സമാനമായ സംഭവം നടന്നതായി റിപ്പോര്‍ട്ടുണ്ട്. പതിനഞ്ചു വയസ്സുകാരനായ അമന്‍ ആണ് പരിശീലനത്തിനിടെ അവിടെ മരിച്ചത്.
സംഭവത്തിന്റെ വിശദാംശങ്ങള്‍ ലഭിച്ചശേഷം ആവശ്യമായ നടപടി എടുക്കുമെന്ന് ഹരിയാന മുഖ്യമന്ത്രി നയാബ് സൈനി പറഞ്ഞു. അതേസമയം സംഭവത്തില്‍ രാഷ്‌ട്രീയ മുതലെടുപ്പിന് കോണ്‍ഗ്രസ് രംഗത്തെത്തിയിട്ടുണ്ട്.
