ലഖ്നൗ:സയ്യിദ് മുഷ്താഖ് അലി ട്വന്റി 20 ടൂര്ണ്ണമെന്റില് കേരളത്തിന് ആന്ധ്രയോട് തോല്വി. ഏഴ് വിക്കറ്റിനായിരുന്നു ആന്ധ്രയുടെ വിജയം. ആദ്യം ബാറ്റ് ചെയ്ത കേരളത്തിന് 20 ഓവറില് ഏഴ് വിക്കറ്റ് നഷ്ടത്തില് 119 റണ്സ് മാത്രമാണ് നേടാനായത്. മറുപടി ബാറ്റിങ്ങിന് ഇറങ്ങിയ ആന്ധ്ര 12-ആം ഓവറില് തന്നെ ലക്ഷ്യത്തിലെത്തി. അര്ദ്ധ സെഞ്ച്വറി നേടിയ ആന്ധ്രയുടെ കെ.എസ്. ഭരത് ആണ് പ്ലെയര് ഓഫ് ദി മാച്ച്.
മുംബൈയ്ക്ക് എതിരെയുള്ള ഉജ്ജ്വല വിജയത്തിന്റെ ആത്മവിശ്വാസവുമായി കളിക്കാനിറങ്ങിയ കേരളത്തിന് ആന്ധ്രയ്ക്കെതിരെ ആ മികവ് ആവര്ത്തിക്കാനായില്ല. ബാറ്റര്മാരുടെ ദയനീയ പ്രകടനമാണ് മത്സരത്തില് കേരളത്തിന് തിരിച്ചടിയായത്. ടോസ് നഷ്ടപ്പെട്ട് ആദ്യം ബാറ്റ് ചെയ്ത കേരളത്തിന് വേണ്ടി ക്യാപ്റ്റന് സഞ്ജു സാംസണ് മാത്രമാണ് മികച്ച പ്രകടനം കാഴ്ചവച്ചത്. സഞ്ജുവിന് പുറമെ രണ്ടക്കം കടന്നത് 13 റണ്സെടുത്ത നിധീഷ് എംഡി മാത്രം. രണ്ട് റണ്സെടുത്ത രോഹന് കുന്നുമ്മലിന്റെ വിക്കറ്റാണ് കേരളത്തിന് ആദ്യം നഷ്ടമായത്. തുടര്ന്ന് വിക്കറ്റുകള് മുറയ്ക്ക് വീണു. മൊഹമ്മദ് അസറുദ്ദീന് ആറും കൃഷ്ണപ്രസാദും സല്മാന് നിസാറും അഞ്ചും അബ്ദുള് ബാസിദ് രണ്ടും ഷറഫുദ്ദീന് മൂന്നും റണ്സ് നേടി മടങ്ങി. ഓപ്പണറായി ഇറങ്ങിയ സഞ്ജു 73 റണ്സുമായി പുറത്താകാതെ നിന്നു. 56 പന്തുകളില് എട്ട് ഫോറും മൂന്ന് സിക്സും അടങ്ങുന്നതായിരുന്നു സഞ്ജുവിന്റെ ഇന്നിങ്സ്. ആന്ധ്രയ്ക്ക് വേണ്ടി സത്യനാരായണ രാജു, സൗരഭ് കുമാര് എന്നിവര് രണ്ട് വിക്കറ്റ് വീതം വീഴ്ത്തി.
മറുപടി ബാറ്റിങ്ങിന് ഇറങ്ങിയ ആന്ധ്രയ്ക്ക് ഓപ്പണര്മാരായ കെ എസ് ഭരതും അശ്വിന് ഹെബ്ബാറും ചേര്ന്ന് മികച്ച തുടക്കമാണ് നല്കിയത്. ഇരുവരും ചേര്ന്ന് ഓപ്പണിങ് വിക്കറ്റില് 71 റണ്സ് കൂട്ടിച്ചേര്ത്തു.എട്ടോവര് ബാക്കി നില്ക്കെ ആന്ധ്ര അനായാസം ലക്ഷ്യത്തിലെത്തി.
