പഠനം രസകരവും ആകര്‍ഷകവുമാകുമ്പോള്‍ സ്വാഭാവികമായും വിദ്യാര്‍ഥികള്‍ അതില്‍ തത്പരരാവുകയും മികവിലേക്ക് നയിക്കപ്പെടുകയും ചെയ്യും. കുട്ടികള്‍ക്ക് പഠനം രസകരമാക്കിക്കൊടുക്കാന്‍ അധ്യാപകരും മാതാപിതാക്കളും സഹായിക്കുകയും വേണം. ഉത്സാഹിച്ച് പഠിക്കാന്‍ ഇതാ 12 വഴികള്‍.
ക്ലാസുകള്‍ പ്രയോജനപ്പെടുത്തുക: ക്ലാസുകള്‍ ഒഴിവാക്കാതിരിക്കുക. കൂടാതെ ക്ലാസുകളില്‍ ശ്രദ്ധാപൂര്‍വ്വം പങ്കെടുക്കുക. ആവശ്യമായ കുറിപ്പുകള്‍ തയ്യാറാക്കാം. സംശയം തോന്നുന്ന കാര്യം ധൈര്യപൂര്‍വം അധ്യാപകരോട് അപ്പപ്പോള്‍ ചോദിക്കുക.
കംബൈന്‍ സ്റ്റഡി: ക്ലാസില്‍ നല്ല സുഹൃത്തുക്കളെ ഉണ്ടാക്കുകയും അവരോടൊന്നിച്ചിരുന്ന് പഠിക്കുകയും ചെയ്യുക. ഒരുമിച്ച് ചെയ്യുമ്പോള്‍ പഠനം രസകരമാവുകയും ഒരാള്‍ക്ക് അറിയാത്ത കാര്യം മറ്റൊരാള്‍ക്ക് പറഞ്ഞുകൊടുക്കാന്‍ സാധിക്കുകയും ചെയ്യും.
ഗൂഗിള്‍ സെര്‍ച്ച്: പഠിക്കുമ്പോള്‍ സംശയങ്ങളുണ്ടായാല്‍ ഗൂഗിളില്‍ തിരഞ്ഞ് അപ്പപ്പോള്‍ സംശയനിവാരണം വരുത്തുക. സംശയം തോന്നുന്ന ഘട്ടത്തില്‍ ആ പാഠഭാഗം ഉപേക്ഷിച്ച് പോകാതിരിക്കുക. സംശയങ്ങള്‍ ദൂരീകരിക്കപ്പെടുമ്പോള്‍ കാര്യങ്ങള്‍ കൂടുതല്‍ വ്യക്തതയോടെ മനസ്സിലാകും.
മികച്ച പഠന സ്ഥലം: വീട്ടില്‍ എവിടെയാണ് നിങ്ങളെ സംബന്ധിച്ച് ഏറ്റവും ഉചിതമായ പഠനസ്ഥലമെന്ന് കണ്ടെത്തുക. ശല്യങ്ങളില്ലാത്ത, ശ്രദ്ധ തെറ്റാത്ത നല്ല വെളിച്ചവും വായുസഞ്ചാരവുമുള്ള ഒരിടം കണ്ടെത്തി അവിടെയിരുന്ന് പഠിക്കാന്‍ ശ്രദ്ധിക്കുക.
ഒന്നില്‍ കേന്ദ്രീകരിക്കാതിരിക്കുക: പഠിക്കാനിരിക്കുമ്പോള്‍ ഒരേ വിഷയത്തില്‍ തന്നെ കേന്ദ്രീകരിക്കാതിരിക്കുക. ഓരോ വിഷയത്തിനായി സമയം വിഭജിച്ച് മാറി മാറി പഠിക്കുക. ഇത്, ഏതെങ്കിലും ഒന്നില്‍ തന്നെ മനസ്സുറപ്പിക്കുന്നത് മൂലമുള്ള മടുപ്പ് ഒഴിവാക്കും.
ശൈലി തെരഞ്ഞെടുക്കുക: ഉറക്കെ വായിക്കുന്നതാണോ മനസ്സുകൊണ്ട് വായിക്കുന്നതാണോ നിങ്ങളെ സംബന്ധിച്ച് ഉചിതമെന്ന് തിരിച്ചറിയുക. ആ ശൈലി പിന്തുടരുക. അതിന് കുടുംബാംഗങ്ങളുടെയും മറ്റും പിന്തുണ ഉറപ്പാക്കുക.
റിവിഷന്‍ നിര്‍ബന്ധം: തലേന്ന് പഠിച്ചത് പിറ്റേന്ന് ഒരാവൃത്തി ഓടിച്ചുവായിച്ച് ഓര്‍മ്മ പുതുക്കേണ്ടതുണ്ട്. പഠിച്ചതിന്റെ 75% വും 24 മണിക്കൂറിനുള്ളില്‍ മറന്നുപോകാം എന്നാണ് പഠനങ്ങള്‍ പറയുന്നത്. അതിനാല്‍ മനസ്സിലുറപ്പിക്കാന്‍ ആവര്‍ത്തിച്ചുള്ള വായന അനിവാര്യമാണ്.
ലക്ഷ്യം ഉറപ്പിക്കുക: പഠിക്കുമ്പോള്‍ കൃത്യമായ ലക്ഷ്യമുണ്ടായിരിക്കണം. ഈ വിഷയത്തില്‍ ഇത്ര മാര്‍ക്ക് ഞാന്‍ നേടിയെടുക്കും എന്ന് ദൃഢനിശ്ചയം ചെയ്യുക. ആ സ്വപ്‌നം സാക്ഷാത്കരിക്കാന്‍ നിശ്ചയദാര്‍ഢ്യത്തോടെ കഠിനാധ്വാനം ചെയ്യുക. മതിയായ സമയം അതിന് നീക്കിവയ്ക്കുന്നുണ്ടോയെന്ന് വിലയിരുത്തുകയും വേണം.
ആവശ്യമെങ്കില്‍ ട്യൂഷന്‍: ട്യൂഷന്‍ വേണമെന്നുണ്ടെങ്കില്‍ ഉചിതനായ വ്യക്തിയെയോ സ്ഥാപനത്തേയോ കണ്ടെത്തി ചേരുക. അതിനനുസരിച്ച് പഠനസമയം ക്രമീകരിക്കുക. ട്യൂഷന്‍ ക്ലാസില്‍ പഠിപ്പിക്കുന്നതും കൃത്യമായി പിന്തുടരുക. സംശയങ്ങള്‍ അപ്പപ്പോള്‍ നിവാരണം നടത്തി മുന്നേറുക.
ഫോണില്‍ നിന്നുള്‍പ്പടെ ഇടവേള: പരീക്ഷാദിവസങ്ങള്‍ അടുക്കുമ്പോള്‍ മൊബൈല്‍ ഫോണ്‍, കംപ്യൂട്ടര്‍, ടിവി തുടങ്ങിയവയില്‍ നിന്ന് വിട്ടുനില്‍ക്കുക. ഇവയെല്ലാം ശ്രദ്ധ കവരുമെന്നും സമയനഷ്ടം വരുത്തുമെന്നും ഓര്‍ക്കുക. പരീക്ഷയ്ക്കുശേഷം അവധി ദിവസങ്ങളില്‍ ഇവ ഉപയോഗിക്കാമെന്ന് മനസ്സില്‍ ഉറപ്പിക്കുക.
പഠനത്തിലെ ഇടവേളകള്‍: നിങ്ങളുടെ തലച്ചോറിനും ശരീരത്തിനും ഉന്മേഷം പകരാന്‍ അവസരം നല്‍കണം. ഇതിനായി പഠനത്തിനിടെ ചെറു ഇടവേളകള്‍ എടുക്കുക. മനസ്സ് ഫ്രീയാക്കുകയും എണീറ്റ് അല്‍പ്പം നടക്കുകയും ചെയ്ത ശേഷം തിരിച്ചുവരാം.
ദൃശ്യവത്കരിച്ച് പഠിക്കുക: പാഠഭാഗങ്ങളെ മനസ്സില്‍ ദൃശ്യവത്കരിക്കുക. അത് വിഷയം മനസ്സിലുറപ്പിക്കാനും പാഠഭാഗങ്ങള്‍ ഓര്‍മ്മയില്‍ തങ്ങി നില്‍ക്കാനും സഹായിക്കും. പഠിക്കേണ്ട കാര്യങ്ങള്‍ എളുപ്പത്തില്‍ ഉള്‍ക്കൊള്ളാന്‍ സഹായിക്കുന്ന ഉപായമാണിത്.
