ന്യൂഡല്‍ഹി: ചൈനയെ പിന്തുണച്ചു കൊണ്ടുള്ള കോണ്‍ഗ്രസ് നേതാവ് സാം പിത്രോദയുടെ പ്രസ്താവന വിവാദത്തില്‍. ചൈന ഇന്ത്യയുടെ ശത്രുവല്ല. അയല്‍രാജ്യമായ ചൈനയെ ശത്രുവായി കാണുന്ന സമീപനം ഇന്ത്യ അവസാനിപ്പിക്കണം. പകരം ചൈനയെ അംഗീകരിക്കുകയും ബഹുമാനിക്കുകയുമാണ് വേണ്ടതെന്നും ഇന്ത്യന്‍ ഓവര്‍സീസ് കോണ്‍ഗ്രസ് ചെയര്‍മാനായ സാം പിത്രോദ അഭിപ്രായപ്പെട്ടു.
‘ചൈനയില്‍നിന്നുള്ള ഭീഷണി എന്താണെന്ന് എനിക്കു മനസ്സിലാകുന്നില്ല. ഈ പ്രശ്‌നം തെറ്റിധാരണയാണെന്ന് കരുതുന്നു. തുടക്കം മുതലേ ചൈനയുമായി ഏറ്റുമുട്ടല്‍ മനോഭാവമാണ് നമ്മുടെത്, ആ മനോഭാവമാണ് ശത്രുക്കളെ സൃഷ്ടിക്കുന്നത്. അത് രാജ്യത്ത് ഒരു പ്രത്യേക പിന്തുണ സൃഷ്ടിക്കുന്നുണ്ട്. ചൈന ശത്രുവാണെന്ന് അനുമാനിക്കുന്ന രീതി നമ്മള്‍ മാറ്റേണ്ടതുണ്ടെന്ന് കരുതുന്നു. ഇത് ചൈനയ്ക്ക് മാത്രമല്ല, എല്ലാവര്‍ക്കും ബാധകമാണ്…’
‘എറ്റുമുട്ടലിന്റേതല്ല, എല്ലാ രാജ്യങ്ങളും സഹകരിക്കേണ്ട സമയമാണിത്. നമ്മുടെ മനോഭാവം മാറ്റേണ്ട സമയമായി. ചൈനയെ ശത്രുവായി കാണുന്നത് അവസാനിപ്പിക്കണം. ശത്രുവായി കണ്ടുകൊണ്ട് നീക്കം നടത്തുന്നത് അമേരിക്കയുടെ ശീലമാണ്. നമ്മള്‍ പഠിക്കാനും, ആശയവിനിമയം വര്‍ദ്ധിപ്പിക്കാനും, സഹകരിച്ച് പ്രവര്‍ത്തിക്കാനുമാണ് ശ്രമിക്കേണ്ടത്. ചൈന വളരുകയാണ്.. അത് തിരിച്ചറിയുകയും ബഹുമാനിക്കുകയും ചെയ്യണം’. സാം പിത്രോദ അഭിപ്രായപ്പെട്ടു.
