നമ്മള്‍ എഴുതുന്നതെന്തും ആര്‍ക്കും എളുപ്പത്തില്‍ വായിക്കാവുന്നതാകണം. വിശേഷിച്ചും പരീക്ഷയ്ക്കിരിക്കുമ്പോള്‍. ഉത്തരങ്ങള്‍ കൃത്യവും വ്യക്തവുമായാലേ പരിശോധകന് കാര്യങ്ങള്‍ എളുപ്പമാവൂ. അങ്ങനെവരുമ്പോഴേ മതിയായ അളവില്‍ മാര്‍ക്ക് ലഭിക്കൂ. അതിനാല്‍ വൃത്തിയാര്‍ന്ന കൈയക്ഷരത്തില്‍ കൃത്യമായും വ്യക്തമായും വേണം ശരിയായ ഉത്തരമെഴുതാന്‍. അതിനാല്‍ കൈയക്ഷരം മെച്ചപ്പെടുത്തേണ്ടതുണ്ട്.
മികച്ച ഹാന്‍ഡ് റൈറ്റിങ്ങ് ആണെങ്കില്‍ അത് പരിശോധകനില്‍ മതിപ്പുളവാകുകയും മാര്‍ക്കിടുമ്പോള്‍ നിങ്ങള്‍ക്കനുകൂലമാകാനുമുള്ള അധിക സാധ്യതയുമുണ്ട്. അതിനാല്‍ ഹാന്‍ഡ് റൈറ്റിങ് മെച്ചപ്പെടുത്താനുള്ള 5 മാര്‍ഗങ്ങള്‍ പരിശോധിക്കാം.
ഏഴുതി പരിശീലിക്കുക
കൈയക്ഷരം മെച്ചപ്പെടുത്താനായി അക്ഷരങ്ങള്‍ മുതല്‍ എഴുതി പരിശീലിക്കാം. ഇത് പരീക്ഷയ്ക്ക് ഏറെ മുന്നേ തന്നെ ചെയ്യേണ്ടതുണ്ട്. അതിനാദ്യം കൈയക്ഷരത്തില്‍ എന്തെങ്കിലും പ്രശ്‌നമുണ്ടോ, വ്യക്തതയുണ്ടോ എന്ന കാര്യം സ്വയം വിലയിരുത്തി ഉറപ്പുവരുത്തണം. ദിവസവും എഴുതി പരിശീലിക്കാന്‍ നീക്കിവയ്ക്കാം. വൃത്തിയുള്ള ഒരു ശൈലി സ്വയമേവ രൂപപ്പെടുത്തണം.
ശരിയായ പെന്‍
പരീക്ഷയെഴുതാന്‍ ഏറ്റവും അനുയോജ്യമായ പെന്‍ തെരഞ്ഞെടുക്കണം. നല്ല വ്യക്തമായ എഴുത്തുള്ളതും കൈക്ക് വഴങ്ങുന്നതും വേഗതയില്‍ ചലിപ്പിക്കാവുന്നതുമായ പേന തെരഞ്ഞെടുക്കാം. അത് കൃത്യതയോടെ മഷി പ്രസരിപ്പിക്കുന്നതാകണം. എഴുത്തില്‍ വ്യക്തത കുറയരുത്. അതേസമയം മഷി കൂടുതലായി പരക്കാനും പാടില്ല. കൈവിരലുകള്‍ക്ക് ഏറ്റവും കൃത്യമായി പ്രവര്‍ത്തിപ്പിക്കാനാകുന്ന പേന തെരഞ്ഞെടുക്കുക. അതുപയോഗിച്ച് എഴുതി വഴക്കം ഉറപ്പുവരുത്തുക.
ഇരിപ്പിലെ കൃത്യത
പരീക്ഷയെഴുതാനുള്ള ഇരിപ്പും കൃത്യമായിരിക്കണം. ചെരിഞ്ഞോ, വളഞ്ഞോ, അലസമായോ ഇരിക്കരുത്. ഉത്തരക്കടലാസ് ഡസ്‌കില്‍ വച്ച് ഏറ്റവും സുഗമമായി എഴുതാന്‍ പാകത്തില്‍ നിങ്ങളുടെ ഇരിപ്പ് ക്രമീകരിക്കുക. പേപ്പര്‍ നീങ്ങിപ്പോകാതെയും പേന പിടിച്ച് ചലിപ്പിക്കാവുന്ന വിധത്തിലും കൈകള്‍ വയ്ക്കാവുന്ന തരത്തില്‍ ഇരിപ്പ് ക്രമീകരിക്കണം. നല്ല ഇരിപ്പ് കൈയക്ഷരം നന്നാകാന്‍ സഹായിക്കും. ഇരിപ്പ് ശരിയാംവണ്ണമല്ലെങ്കില്‍ എഴുത്ത് വളയാനോ ചെരിയാനോ അതില്‍ വ്യക്തതക്കുറവ് വരാനോ സാധ്യതയുണ്ട്.
വേഗതയിലെ നിയന്ത്രണം
വാരിവലിച്ച് സര്‍വത്ര സ്പീഡില്‍ എഴുതി വ്യക്തതക്കുറവ് വരുത്തരുത്. വേഗത കുറയുമ്പോള്‍ കൈയക്ഷരം നന്നാവുന്നതായി അനുഭവപ്പെടാറുണ്ട്. പക്ഷേ നിശ്ചിത സമയത്തിനകം എല്ലാ ഉത്തരങ്ങളും എഴുതിപ്പൂര്‍ത്തിയാക്കേണ്ടതുമുണ്ട്. അതിനാല്‍ ശരാശരി വേഗതയില്‍ കൈയക്ഷരം മെച്ചപ്പെടുത്തിക്കൊണ്ട് എഴുതാന്‍ ശ്രമിക്കണം.
പരിപൂര്‍ണ ശ്രദ്ധ
പരീക്ഷയെഴുതുമ്പോള്‍ പരിപൂര്‍ണ ശ്രദ്ധപുലര്‍ത്തണം. ഒട്ടും അലസത പ്രകടിപ്പിക്കാതെ ഏറ്റവും ഗൗരവത്തോടെ ഇടപെടണം. ഉത്തരങ്ങള്‍ കൃത്യവും വ്യക്തവുമാണെന്നും ഉറപ്പുവരുത്തി എഴുതണം. ഒരുത്തരം എഴുതിക്കഴിഞ്ഞാല്‍ അതിവേഗം ഒന്നോടിച്ചുനോക്കാം. കൈയക്ഷര വ്യക്തതയും ആശയ കൃത്യതയും ഉണ്ടെന്ന് പരിശോധിച്ച് ഉറപ്പാക്കണം.
