വീടിനകത്തായാലും പുറത്തായാലും ഇപ്പോള്‍ കടുത്ത ചൂടാണ്. ചൂടുകൂടുന്നതിന് അനുസരിച്ച് രാത്രിയുറക്കം പ്രതിസന്ധിയിലാവുകയും ചെയ്യും. ഈ സാഹചര്യത്തിലാണ് ആളുകള്‍ എയര്‍ കണ്ടീഷണറുകള്‍ വാങ്ങുന്നതിനെക്കുറിച്ച് ചിന്തിക്കുന്നത്. എന്നാല്‍ എസി വാങ്ങുമ്പോള്‍ ചില സുപ്രധാന കാര്യങ്ങള്‍ പരിശോധിച്ച് ഉറപ്പുവരുത്തേണ്ടതുണ്ട്.
ടോണേജ്
എസി വാങ്ങുമ്പോള്‍ ടോണേജ് കൃത്യമായി വിലയിരുത്തണം. മുറിയുടെ വലിപ്പമനുസരിച്ചാണ് ഇത് തീരുമാനിക്കേണ്ടത്. 130 സ്‌ക്വയര്‍ഫീറ്റ് റൂമിന് ഒരു ടണ്ണിന്റെ എസി എന്നതാണ് കണക്ക്. ഒരു ടണ്‍ എന്നത് കണക്കാക്കുക ഐസിനെ 24 മണിക്കൂറില്‍ ഉരുക്കാന്‍ ഉപയോഗിക്കുന്ന ചൂടിന്റെ അളവുവച്ചാണ്.
എയര്‍ ക്വാളിറ്റി
മുറിയിലെ വായു ഗുണനിലവാരം മെച്ചപ്പെടുത്തുന്നവയാകണം എസികള്‍. ദുര്‍ഗന്ധം, പുക, പൊടിപടലങ്ങള്‍ എന്നിവ ശുദ്ധീകരിച്ച് മികച്ച വായുനിലവാരം ഉറപ്പുവരുത്തണം. ഡിഹ്യുമിഡിഫിക്കേഷന്‍ സംവിധാനമുള്ളത് ഹ്യുമിഡിറ്റി കുറയ്ക്കാന്‍ സഹായിക്കുന്നു.
വൈദ്യുതോപയോഗം
കുറഞ്ഞ വൈദ്യുതി ഉപയോഗിച്ച് കൂടുതല്‍ തണുപ്പ് ഉറപ്പുവരുത്താനാകുന്ന എസി വേണം തെരഞ്ഞെടുക്കാന്‍. ഇത് സ്റ്റാര്‍ റേറ്റിങ്ങ് അനുസരിച്ച് വിലയിരുത്താം. കൂടുതല്‍ സ്റ്റാറുകള്‍ ഉള്ളവയാണെങ്കില്‍ മികച്ചതാണെന്ന് വിലയിരുത്താം. അത് തെരഞ്ഞെടുക്കാനും ശ്രദ്ധിക്കാം. കൂടാതെ ഇന്‍വേര്‍ട്ടര്‍ സജ്ജീകരണമുള്ളവയും വാങ്ങാന്‍ അവസരമുണ്ട്.
വേഗത
ഊര്‍ജ ഉപഭോഗം കുറച്ച്, കൂടുതല്‍ വേഗത പ്രദാനം ചെയ്യുന്നവയാണ് മള്‍ട്ടിപ്പിള്‍ ഫാന്‍ എസികള്‍. ഇവ എയര്‍ ഫ്‌ളോ, സ്വിങ് സെറ്റിങ് എന്നിവയും ഉറപ്പുവരുത്തുന്നു. അതിനാല്‍ കൂളിങ് ലെവല്‍ ക്രമീകരിച്ച് ശബ്ദം കുറയ്ക്കാന്‍ സാധിക്കും.
വിന്‍ഡോ-സ്പ്ലിറ്റ്
വിന്‍ഡോ എസികളും സ്പ്ലിറ്റ് എയര്‍ കണ്ടീഷണറുകളും വിപണിയില്‍ ലഭ്യമാണ്. വിന്‍ഡോ എസികള്‍ എളുപ്പത്തില്‍ ഘടിപ്പിക്കാം. ഇവയ്ക്ക് താരതമ്യേന വില കുറവുമാണ്. പക്ഷേ സ്പ്ലിറ്റ് എസികളേക്കാള്‍ ശബ്ദം കൂടുതലായിരിക്കും. സ്പ്ലിറ്റ് എസി കൂടുതല്‍ കാലം നിലനില്‍ക്കും. മികച്ച ഡിസൈനിലുമാണ് ഇവ. കൂടാതെ കൂളിങ്ങ് രീതി മികച്ചതുമാണ്. രണ്ടായാലും വിവിധതരം അളവിലും രൂപകല്‍പ്പനയിലും വിലയിലും ലഭിക്കും.
