വേനലില്‍ ചെടികള്‍ക്ക് അധിക വെള്ളം നല്‍കണമെന്നതില്‍ മാത്രമായിരിക്കും കൂടുതല്‍ പേരുടെയും ശ്രദ്ധ. എന്നാല്‍ നന, വളപ്രയോഗം, പ്രൂണിങ്ങ്, മാറ്റിനടല്‍ എന്നീ കാര്യങ്ങളിലെല്ലാം അതീവ ജാഗ്രത അനിവാര്യമാണ്. വേനല്‍ക്കാലത്തെ ചെടിസംരക്ഷണത്തില്‍ നിര്‍ബന്ധമായും പാലിച്ചിരിക്കേണ്ട 6 കാര്യങ്ങള്‍ ഇവയാണ്.
കൃത്യമായ നന
വേനല്‍ കടുക്കുന്നതിനനുസരിച്ച് കൃത്യമായ അളവില്‍ നന ഉറപ്പുവരുത്തണം. വെള്ളം വേഗം ബാഷ്പീകരിക്കപ്പെടുമെന്നതിനാല്‍ ചെടിയുടെ വേരുകളിലേക്ക് ജലം എത്താന്‍ അനുവദിക്കുന്ന തരത്തില്‍ ആഴത്തില്‍ നനവ് ഉറപ്പാക്കണം. മണ്ണിന് വെള്ളത്തെ ഇറക്കാന്‍ സാധിക്കുമാറ് സാവധാനത്തിലാണ് നനയ്‌ക്കേണ്ടത്. ഇത് രാവിലെയും വൈകുന്നേരവും തുടരുക. വീട്ടിനകത്ത് വളര്‍ത്തുന്ന ചെടികളായാലും ആവശ്യത്തിന് വെള്ളം ഉറപ്പാക്കണം. അതേസമയം അമിത നന ചെടിക്ക് ദോഷകരമായാണ് ഭവിക്കുകയെന്നതും ശ്രദ്ധിക്കണം.
തണലത്തേക്ക് മാറ്റാം
കടുത്ത വേനലില്‍ മണിക്കൂറുകളോളം സൂര്യപ്രകാശം നേരിട്ടേല്‍ക്കുന്നത് ചെടികള്‍ വാടാനും ഉണങ്ങാനും കാരണമാകും. അതിനാല്‍ ചെടികള്‍ക്ക് സൂര്യപ്രകാശത്തില്‍ നിന്ന് സംരക്ഷണം ആവശ്യമാണ്. സൂര്യതാപത്തിന്റെ നേരിട്ടുള്ള ഏല്‍ക്കല്‍ ഒഴിവാക്കാന്‍ തണലത്തേക്ക് ചെടിച്ചട്ടികളും മാറ്റും മാറ്റിവയ്ക്കാം. ഇലകളിലും തണ്ടുകളിലും പൂക്കളിലും മറ്റും ഇടയ്ക്ക് വെള്ളം കുടഞ്ഞുകൊടുക്കാം.
വളപ്രയോഗത്തില്‍ ശ്രദ്ധിക്കേണ്ടത്
ചെടികള്‍ക്ക് തളര്‍ച്ച കാണുമ്പോള്‍ സാധാരണ ഗതിയില്‍ വളപ്രയോഗമാണ് മനസ്സിലേക്ക് ഓടിവരിക. പക്ഷേ വേനല്‍ക്കാലത്തെ വളപ്രയോഗത്തില്‍ ശ്രദ്ധ വേണം. ചൂട് മൂലമുണ്ടാകുന്ന കേടുപാടുകളാണെങ്കില്‍ വളപ്രയോഗം ചെടിക്ക് സഹായകമാകില്ല. അങ്ങനെ ചെയ്യുന്നത് ചെടിയെ കൂടുതല്‍ സമ്മര്‍ദ്ദത്തിലാക്കും. അതിനാല്‍ ആദ്യം ആവശ്യത്തിന് വെള്ളം കിട്ടുന്നുണ്ടോയെന്ന് ഉറപ്പുവരുത്തണം. അതിജീവിച്ച് വരുന്നു എന്ന് തോന്നുമ്പോള്‍ വളപ്രയോഗം നടത്തുകയും ചെയ്യാം.
നീട്ടിവയ്ക്കാം മാറ്റിനടല്‍
വേനല്‍ക്കാലം ആരംഭിക്കുന്നതിന് മുമ്പ് ചെടികള്‍ മാറ്റി നടുന്നതാണ് നല്ലത്. കനത്ത വേനലില്‍ ചെടികള്‍, ചട്ടിയില്‍ നിന്നോ കവറില്‍ നിന്നോ വേരടക്കം പിഴുത് മാറ്റി നടുന്നത് അവയ്ക്ക് ആഘാതമേല്‍പ്പിക്കും. അതിനാല്‍ അത്യാവശ്യമല്ലെങ്കില്‍ മാറ്റിനടുന്നതിന്, ചൂട് കുറയുന്നതുവരെ കാക്കുക.
പ്രൂണിങ്ങും നീട്ടിവയ്ക്കാം
ചില ചെടികള്‍ക്ക് പ്രൂണിങ്ങ് നിര്‍ബന്ധമാണ്. പൂന്തോട്ടത്തിലെ ചെടികള്‍ കോതുന്നത് വേനല്‍ തുടങ്ങുന്നതിന് മുന്‍പ് ചെയ്യുന്നതാണ് നല്ലത്. അല്ലെങ്കില്‍ വേനലിന് ശേഷം ചെയ്യാന്‍ ശ്രമിക്കുക. ചൂടുകാലത്ത് ചെടികള്‍ വെട്ടിയൊതുക്കുന്നത് അവയ്ക്ക് സമ്മര്‍ദമേല്‍പ്പിക്കും.
കമ്പോസ്റ്റിങ്ങ് ഇങ്ങനെ
ചെടികള്‍ക്ക് ആവശ്യമായ നന ഉറപ്പാക്കുന്നതിനൊപ്പം കമ്പോസ്റ്റിംഗും ചെയ്യാം. ചെടികളുടെ അടിത്തട്ടില്‍ ജലാംശം നിലനിര്‍ത്താന്‍ കമ്പോസ്റ്റ് പാളിയിടുന്നത് സഹായിക്കും. ചെടിക്കോ വേരിനോ കേടുപാടുകള്‍ സംഭവിക്കാത്ത വിധത്തില്‍ ചെറുതായി മണ്ണുനീക്കി കമ്പോസ്റ്റ് വിരിച്ചിടാം.
