റമദാന്‍ 2026 : വ്രതാനുഷ്ഠാനം, പ്രാര്‍ത്ഥനകള്‍, ആത്മീയ ആചരണങ്ങള്‍-അറിയേണ്ടതെല്ലാം ഒറ്റ വായനയില്‍

ഇസ്ലാമിക കലണ്ടറിലെ ഒമ്പതാം മാസമാണ് റമദാന്‍. മുസ്ലിം മതസ്ഥരെ സംബന്ധിച്ച് ഏറ്റവും പ്രധാന കാലയളവുകളിലൊന്ന്. പുണ്യങ്ങളുടെ പൂക്കാലമെന്ന് റമദാനെ വിശേഷിപ്പിച്ച് വരാറുണ്ട്. ആത്മസംസ്‌കരണത്തിന്റെ ദിനങ്ങളാണ് വിശ്വാസികളെ സംബന്ധിച്ച് റമദാന്‍.

ശാരീരികവും മാനസികവുമായ ശുദ്ധീകരണം അത് മുന്നോട്ടുവയ്ക്കുന്നു. ഈ വിശുദ്ധ വേളയില്‍ വിശ്വാസികള്‍ പ്രാര്‍ത്ഥനകളില്‍ ശ്രദ്ധ കേന്ദ്രീകരിക്കുന്നു. അവര്‍ വ്രതം അനുഷ്ഠിക്കുന്നു. മുസ്ലിങ്ങള്‍ നിര്‍ബന്ധമായും ആചരിക്കേണ്ട 5 കാര്യങ്ങളില്‍ ഒന്നായി നോമ്പിനെ വ്യവസ്ഥപ്പെടുത്തിയിട്ടുണ്ട്.

സൂര്യോദയം മുതല്‍ സൂര്യാസ്തമയം വരെ ഭക്ഷണമോ വെള്ളമോ കൂടാതെയാണ് വിശ്വാസികള്‍ ഉപവസിക്കുക, കൂടാതെ അവര്‍ ആത്മീയ, മതപരമായ കാര്യങ്ങളില്‍ മനസ്സര്‍പ്പിക്കുകയും ചെയ്യുന്നു.

റമദാന്‍, പരിശുദ്ധ ഖുര്‍ ആന്‍ അവതരിപ്പിക്കപ്പെട്ട മാസവുമാണ്. വിശ്വാസിക്ക് വഴിവെളിച്ചമേകുന്ന ഖുര്‍ ആനിന്റെ വാര്‍ഷികാചരണമെന്ന സവിശേഷതയുമുണ്ടെന്ന് അര്‍ഥം. സക്കാത്തിനാലും വിശിഷ്ടമാണ് ഈ വേള. വിശ്വാസികള്‍ അനുകമ്പയോടെ ദാനധര്‍മ്മങ്ങളിലേര്‍പ്പെട്ട് സഹോദരങ്ങളെ കരുതലോടെ ചേര്‍ത്തുപിടിക്കുന്നു.

ഈ കാലയളവില്‍ അല്ലാഹുവിനോട് മനസ്സുരുകി പ്രാര്‍ത്ഥിക്കുന്നത് ജീവിതത്തില്‍ സന്തോഷവും സമൃദ്ധിയും കൈവരുത്തുമെന്നാണ് വിശ്വാസം. അതിനാല്‍ അല്ലാഹുവിന്റെ അനുഗ്രഹം തേടാനും ദിവസം മുഴുവന്‍ നോമ്പനുഷ്ഠിച്ച് നന്ദി പ്രകടിപ്പിക്കാനും വിശ്വാസികള്‍ ഉത്സുകരായിരിക്കും.

ദിവസത്തില്‍ അഞ്ച് തവണ നിസ്‌കരിക്കാനും ആത്മനിയന്ത്രണം പാലിക്കാനും വിശ്വാസികള്‍ പ്രതിജ്ഞാബദ്ധരാണ്. എല്ലാ ദുശ്ശീലങ്ങളില്‍ നിന്നും വിട്ടുനില്‍ക്കാനും നിരന്തരം പ്രാര്‍ത്ഥിക്കാനും എല്ലാ നിയമങ്ങളും മാര്‍ഗനിര്‍ദേശങ്ങളും പാലിക്കാനും അവര്‍ ജാഗ്രത്തായിരിക്കും.

വ്രതാനുഷ്ഠാനം ഇങ്ങനെ

വിശ്വാസികള്‍ സൂര്യോദയത്തിന് മുമ്പ് ഉണര്‍ന്ന് അവര്‍ക്കിഷ്ടമുള്ളത് കഴിക്കുന്നു. ദിവസം മുഴുവന്‍ നോമ്പനുഷ്ഠിക്കാന്‍ ആവശ്യമായ ഊര്‍ജം സമാഹരിക്കാന്‍ ലക്ഷ്യമിട്ടാണ് ഈ സമയത്തെ ഭക്ഷണം.

സൂര്യാസ്തമയ സമയത്ത് വിശ്വാസികള്‍ ഈത്തപ്പഴം കഴിച്ച് നോമ്പ് തുറക്കുന്നു. കൂടാതെ വിവിധ തരം ഭക്ഷണ പാനീയങ്ങള്‍ തയ്യാറാക്കി കുടുംബാംഗങ്ങളോടും സുഹൃത്തുക്കളോടും ഒന്നിച്ച് കഴിക്കുന്നു. കൂട്ടായ്മയും പങ്കുവയ്ക്കലും ഈ ഒത്തുചേരലിന്റെ സവിശേഷതയാണ്.

കേരളത്തിലെ റമദാന്‍ വ്രതാരംഭം

ഫെബ്രുവരി 19 വ്യാഴാഴ്ചയാണ് സംസ്ഥാനത്ത് റമദാന്‍ 1 അഥവാ വ്രതാരംഭം. കേരളത്തില്‍ ചൊവ്വാഴ്ച വൈകീട്ട് മാസപ്പിറവി കണ്ടതായി എവിടെയും സ്ഥിരീകരണമില്ലായിരുന്നു.

ഈ സാഹചര്യത്തില്‍, ബുധനാഴ്ച ശഅബാന്‍ 30 പൂര്‍ത്തിയാക്കി, വ്യാഴാഴ്ച റമദാന്‍ 1 ആയിരിക്കുമെന്ന് മതപണ്ഡിതര്‍ വ്യക്തമാക്കിയിട്ടുണ്ട്.

പാണക്കാട് സാദിഖലി ശിഹാബ്, പാളയം ഇമാം ഡോ. വി.പി. സുഹൈബ് മൗലവി, കാന്തപുരം എ.പി. അബൂബക്കര്‍ മുസ്ലിയാര്‍, സയ്യിദ് ഇബ്രാഹിം ഖലീല്‍ അല്‍ ബുഖാരി തുടങ്ങിയവരാണ് ഇക്കാര്യം അറിയിച്ചത്.

വ്രതാനുഷ്ഠാന കലണ്ടര്‍ (കോഴിക്കോട്): വിവിധ മേഖലകള്‍ക്ക് അനുസരിച്ച് സമയത്തില്‍ നേരിയ വ്യത്യാസങ്ങള്‍ക്ക് സാധ്യതയുണ്ട്.