കോപ്പന്‍ഹേഗന്‍: ഗുണനിലവാരം കൂടിയ ബീജം ഉത്പാദിപ്പിക്കുന്ന പുരുഷന്‍മാര്‍ കൂടുതല്‍ കാലം ജീവിക്കുമെന്ന് പഠനം. എണ്‍പതിനായിരം പുരുഷന്‍മാരില്‍ നിന്ന് ബീജ സാമ്പിളുകള്‍ ശേഖരിച്ച് ഡാനിഷ് ശാസ്ത്രജ്ഞര്‍ നടത്തിയ പഠനത്തിലാണ് ഈ കണ്ടെത്തല്‍. ബീജ ശേഖരണ ശേഷം 50 വര്‍ഷത്തോളം ആ വ്യക്തികളുടെ ആരോഗ്യം നിരീക്ഷിച്ചാണ് പഠനം സാധ്യമാക്കിയതെന്ന് ഗവേഷകര്‍ അറിയിച്ചു.
മികച്ച ഗുണനിലവാരമുള്ള ശുക്ലം ഉത്പാദിപ്പിക്കുന്ന പുരുഷന്‍ ശരാശരി 80.3 വര്‍ഷം ജീവിക്കുമെന്നാണ് ഡാനിഷ് ഗവേഷകര്‍ വിശദീകരിക്കുന്നത്. എന്നാല്‍ ഗുണനിലവാരം കുറഞ്ഞ ബീജം ഉത്പാദിപ്പിക്കുന്നയാളിന്റെ ആയുസ്സ് ശരാശരി 77.6 വര്‍ഷമാണെന്നും പഠനം ചൂണ്ടിക്കാട്ടുന്നു.
അതായത്, ഒരു സ്ഖലനത്തില്‍ 120 ദശലക്ഷത്തിലത്തിലേറെ സജീവ ബീജാണുക്കള്‍ ഉള്ളവര്‍ക്ക് മറ്റുള്ളവരെ അപേക്ഷിച്ച് മൂന്ന് വര്‍ഷം വരെ അധിക ആയുസ്സുണ്ടെന്നാണ് പഠനം പറയുന്നത്. അഞ്ച് ദശലക്ഷത്തില്‍ താഴെ ഉത്പാദിപ്പിച്ചവരേക്കാള്‍ മൂന്ന് വര്‍ഷം അവര്‍ കൂടുതല്‍ ജീവിക്കാം. ബീജത്തിന്റെ ഗുണനിലവാരം ഒരു വ്യക്തിയുടെ ആരോഗ്യക്ഷമത വെളിവാക്കുന്നുവെന്നാണ് കണ്ടെത്തല്‍.
‘ശുക്ലത്തിന്റെ ഗുണനിലവാരം മെച്ചപ്പെടുന്തോറും ആയുര്‍ദൈര്‍ഘ്യം കൂടുമെന്നാണ് നിരീക്ഷണം’ – കോപ്പന്‍ഹേഗന്‍ യൂണിവേഴ്‌സിറ്റി ഹോസ്പിറ്റലിലെ ആന്‍ഡ്രോളജിസ്റ്റ് ഡോ. നീല്‍സ് ജോര്‍ഗെന്‍സണിനൊപ്പം പഠനത്തിന് നേതൃത്വം നല്‍കിയ എപ്പിഡെമിയോളജിസ്റ്റ് ഡോ. ലാര്‍ക്ക് പ്രിസ്‌കോണ്‍ പറയുന്നു.
