ചൂടുകാലത്തെ അതിജീവനത്തിന് ജീവിത ശൈലിയില്‍ ചില സുപ്രധാന മാറ്റങ്ങള്‍ വരുത്തേണ്ടതുണ്ട്. ധാരാളം വെള്ളം കുടിക്കുകയും പകല്‍ തുടര്‍ച്ചയായി കടുത്ത വെയിലേല്‍ക്കുന്നത് ഒഴിവാക്കുകയുമെല്ലാം വേണം. ഇതേപോലെ വേനലില്‍ വാഹനങ്ങളുടെ സംരക്ഷണവും പ്രധാനമാണ്. അപകടങ്ങള്‍ ഒഴിവാക്കാനും, കേടുപാടുകളുണ്ടായാലുള്ള പണച്ചോര്‍ച്ച തടയാനും മുന്‍കരുതലുകള്‍ സഹായിക്കും.
ടയറിന്റെ മര്‍ദം കൂടരുത്
ഖരം, ദ്രാവകം, വാതകം എന്നിവയിലേതായാലും ചൂടുകാലത്ത് മൂലകങ്ങള്‍ വികസിക്കുമെന്നാണ് ശാസ്ത്രം പറയുന്നത്. അതിനാല്‍, വായു വികാസം മൂലം മര്‍ദ്ദം ഉയര്‍ന്നാല്‍ വേനല്‍ക്കാലത്ത് ഇരുചക്ര വാഹനങ്ങളുടെ ടയറുകള്‍ പൊട്ടിത്തെറിക്കാന്‍ സാധ്യതയുണ്ട്. അതിനാല്‍, സ്റ്റാന്‍ഡേര്‍ഡ് യൂണിറ്റിനേക്കാള്‍ ഒന്ന് മുതല്‍ രണ്ട് യൂണിറ്റ് വരെ മര്‍ദ്ദം കുറയ്ക്കുന്നതാണ് നല്ലത്.
ഓയിലുകള്‍ പരിശോധിക്കുക
ചൂടുകാലത്ത്, ബൈക്കിന്റെ എഞ്ചിന്‍ കൂടുതല്‍ പ്രവര്‍ത്തിക്കേണ്ടിവരും. തത്ഫലമായി, കൂടുതല്‍ സമ്മര്‍ദത്തിന് വിധേയമായി അധികമായി ഓയില്‍ ഉപയോഗപ്പെടുത്തുകയും ചെയ്യും. അതിനാല്‍ എല്ലാ ആഴ്ചയും എഞ്ചിന്‍ ഓയില്‍ ലെവല്‍ പരിശോധിക്കേണ്ടതുണ്ട്. നിര്‍ദിഷ്ട അളവിനേക്കാള്‍ ഓയില്‍ നില കുറവാണ്ടെങ്കില്‍ നിറക്കേണ്ടതുണ്ട്‌. ഇനി ലിക്വിഡ്-കൂള്‍ഡ് ബൈക്കാണെങ്കില്‍, കൂളിംഗ് ലിക്വിഡ് നില പരിശോധിക്കേണ്ടതുമുണ്ട്.
ടാങ്ക് നിറയ്ക്കാതിരിക്കുക
ഇന്ധന ടാങ്ക് മുഴുവനായി നിറയ്ക്കുന്നത് ഒഴിവാക്കുക. വേനല്‍ക്കാലത്ത്, അമിതമായി നിറച്ചാല്‍, കടുത്ത സൂര്യപ്രകാശമേല്‍ക്കുന്ന, ഉയര്‍ന്ന താപനിലയില്‍ വാഹനത്തില്‍ നിന്ന് ഇന്ധന ചോര്‍ച്ചയുണ്ടാകാം. വാഹനത്തിന് സൂര്യരശ്മി മണിക്കൂറുകളോളം ഏല്‍ക്കുന്ന സാഹചര്യങ്ങളില്‍ ഇത്തരത്തില്‍ സംഭവിക്കാറുണ്ട്. അതിനാല്‍ ഇന്ധന ടാങ്കില്‍ അല്‍പ്പം സ്ഥലം ഒഴിച്ചിടണം.
എയര്‍ ഫില്‍ട്ടറുകള്‍ വൃത്തിയാക്കുക
വേനലില്‍ പ്രത്യേകിച്ചും ബൈക്കിന്റെ എയര്‍ ഫില്‍ട്ടറുകള്‍ നന്നായി വൃത്തിയാക്കണം. ഇത് എഞ്ചിന്റെ ആയുര്‍ദൈര്‍ഘ്യം വര്‍ദ്ധിപ്പിക്കും. മോട്ടോര്‍സൈക്കിളിനെ മികച്ച രീതിയില്‍ പ്രവര്‍ത്തിപ്പിക്കുന്നതിന് സഹായിക്കുന്നതാണ് എയര്‍ ഫില്‍ട്ടറുകള്‍. അതിനാല്‍ അതീവ പ്രാധാന്യത്തോടെ തന്നെ ഈ ഭാഗം വൃത്തിയാക്കേണ്ടതുണ്ട്.
വെയിലത്ത് ഏറെ നേരം നിര്‍ത്തിയിടാതിരിക്കുക
വെയിലത്ത് ഏറെ നേരം വാഹനം നിര്‍ത്തിയിടേണ്ടി വരുമെങ്കില്‍ പൂര്‍ണമായി മൂടിവയ്ക്കാന്‍ ശ്രമിക്കുക. അല്ലാത്ത പക്ഷം പെയിന്റ് മങ്ങുന്നത് ഉള്‍പ്പടെയുള്ള പ്രശ്നങ്ങളുണ്ടാകും. ഇത് നേരിടാന്‍ ആവശ്യമെങ്കില്‍ കടുത്ത വെയിലില്‍ നിന്നും മഴയില്‍ നിന്നുമെല്ലാം സുരക്ഷ നല്‍കുന്ന പോളിഷുകള്‍ ഉപയോഗിക്കാവുന്നതുമാണ്.
