വാക്കുകൾ വാളുകളേക്കാൾ മൂർച്ചയുള്ളതാണ്, അതിനാൽ വാക്കുകളുമായി ഇഴചേർന്ന പുസ്തകങ്ങൾ വായിക്കുന്നത് മനുഷ്യന്റെ മാനസിക വളർച്ചയ്ക്ക് ഏറ്റവും അത്യാവശ്യമാണ്. ഒരു നല്ല പുസ്തകം ഉറ്റ സുഹൃത്തിനെപ്പോലെയാണ്. ഓരോ കാലത്തിന്റെയും സാഹചര്യങ്ങൾക്കനുസരിച്ച് വായനയുടെ രീതികൾ മാറിയേക്കാം എങ്കിലും ലോകം എത്ര മാറിയാലും വായനയുടെ പ്രാധാന്യം കുറയുന്നില്ല.
ലൈബ്രറികൾ ആയിരുന്നു പഴയ തലമുറയുടെ വായനാ വേദി. മുൻ തലമുറ വിവിധ തരം പുസ്തകങ്ങൾ വായിച്ചും അറിവ് പങ്കുവെച്ചും വായനയുടെ വിശാലമായ ലോകത്തേക്ക് പ്രവേശിച്ചിരുന്നു. എന്നാൽ കാലം കടന്നുപോയപ്പോൾ ലൈബ്രറിയുടെ പ്രാധാന്യം താരതമ്യേന കുറഞ്ഞു, വായനയുടെ രീതിയിലും ചില വ്യത്യാസങ്ങൾ സംഭവിച്ചു.
ലൈബ്രറിയിൽ നിന്ന് മാറി സ്വന്തമായി പുസ്തകങ്ങൾ വാങ്ങാൻ തുടങ്ങിയ ആളുകൾ വായനയുടെ ഒരു ചെറിയ ലോകം സൃഷ്ടിച്ചു. പുതിയ തലമുറ വായനയിൽ അൽപ്പം പിന്നിലാണെന്ന് ആണ് പൊതുവായ വിലയിരുത്തൽ. എന്നാൽ ഡിജിറ്റൽ രൂപത്തിൽ പുസ്തകങ്ങൾ വായിക്കാനും ഇന്നത്തെ തലമുറ തുടങ്ങിയിരിക്കുന്നു എന്നത് ഭാവിയിലെ വായനയ്ക്ക് പ്രതീക്ഷ നൽകുന്നു. വായന ഒരു തരത്തിലും മരിക്കില്ല എന്ന വലിയ പ്രതീക്ഷ ആണിത് നൽകുന്നത്.
ദേശീയ വായനാ ദിനം
എല്ലാ വർഷവും ജൂൺ 19 ന് ആണ് ദേശീയ വായനാ ദിനം ആചരിക്കുന്നത്. ജൂൺ 19, പി.എൻ. പണിക്കരുടെ ചരമദിനം ആണ്. മലയാളികൾക്ക് വായനയുടെ വിശാലമായ ലോകം തുറന്നുകൊടുത്ത വ്യക്തിയാണ് പി.എൻ. പണിക്കർ. എഴുത്തുകാരനായി ജീവിതം ആരംഭിച്ച പി.എൻ. പണിക്കർ ജനങ്ങൾക്കിടയിൽ വായനയുടെ വിത്തുകൾ വിതയ്ക്കുന്നതിൽ വലിയ സ്വാധീനം ചെലുത്തി. അദ്ദേഹത്തിന് ആദരവ് അർപ്പിച്ചുകൊണ്ട്, വായനാദിനം ഉൾക്കൊള്ളുന്ന ആഴ്ച വായനാവാരമായും ആചരിക്കുന്നു.
1926-ൽ ജന്മനാട്ടിൽ സനാതന ധർമ്മം എന്ന പേരിൽ ഒരു ലൈബ്രറി സ്ഥാപിച്ചുകൊണ്ട് വായനാ യാത്ര ആരംഭിച്ച അദ്ദേഹത്തിന്റെ പ്രവർത്തനങ്ങളുടെ ഫലമായാണ് കേരള ലൈബ്രറി അസോസിയേഷൻ രൂപീകരിച്ചത്. കേന്ദ്രീകൃത സംവിധാനമില്ലാതെ പ്രവർത്തിച്ചിരുന്ന സംസ്ഥാനത്തെ ആയിരക്കണക്കിന് ലൈബ്രറികളെ കേരള ലൈബ്രറി അസോസിയേഷന് കീഴിൽ കൊണ്ടുവരാനും അദ്ദേഹത്തിന് കഴിഞ്ഞു. അതുകൊണ്ടാണ് പി.എൻ. പണിക്കർ, ഗ്രന്ഥശാലാ പ്രസ്ഥാനത്തിന്റെ നായകൻ എന്നറിയപ്പെടുന്നത്. അദ്ദേഹത്തിന്റെ നിരന്തര പരിശ്രമത്തിന്റെ ഫലമായി കേരള പബ്ലിക് ലൈബ്രറി ആക്ട് സർക്കാർ പാസാക്കി. വായനയെ സംരക്ഷിക്കുന്നതിനായി സർക്കാർ ഒരു പ്രത്യേക നിയമം കൊണ്ടുവരണമെന്നത് അദ്ദേഹത്തിന്റെ ദീർഘകാല സ്വപ്നമായിരുന്നു.
