മതിവരാത്ത അതിശക്കാഴ്ചകളൊരുക്കി കാത്തിരിക്കുന്ന നഗരമാണ് ചെന്നൈ. തമിഴ്നാടിന്റെ തലസ്ഥാനം പ്രകൃതിമനോഹര കാഴ്ചകളും ചരിത്ര സാംസ്‌കാരിക കേന്ദ്രങ്ങളും ചേര്‍ന്നതാണ്. അത്യാകര്‍ഷകമായ ബീച്ചുകള്‍ നിങ്ങളെ അത്രമേല്‍ ത്രസിപ്പിക്കും. ഇവിടെ വേറിട്ട ഭക്ഷണ വിഭവങ്ങള്‍ ആസ്വദിക്കുകയും ലാഭകരമായ ഷോപ്പിങ് സാധ്യമാക്കുകയും ചെയ്യാം. ഇവിടം സന്ദര്‍ശിക്കാന്‍ ഏറ്റവും മികച്ച സമയം ഏതെന്നറിയാം.
- മാടി വിളിക്കുന്നു ചെന്നൈ
ചരിത്ര സാംസ്‌കാരിക പാരമ്പര്യങ്ങളും ആധുനികതയും സമന്വയിക്കപ്പെട്ട മെട്രോ നഗരമാണ് ചെന്നൈ. പ്രകൃതി സൗന്ദര്യക്കാഴ്ചകളും ചരിത്ര സാംസ്‌കാരിക കേന്ദ്രങ്ങളും ചെന്നൈയെ സവിശേഷമാക്കുന്നു. അതുല്യമായ വാസ്തുവിദ്യയും അപൂര്‍വ കൊത്തുപണികളും ഇവിടുത്തെ ക്ഷേത്രങ്ങളെ വേറിട്ടുനിര്‍ത്തുന്നതായി കാണാം. ദക്ഷിണേന്ത്യയിലെ മികച്ച ഷോപ്പിങ് കേന്ദ്രമെന്ന നിലയിലും വൈവിധ്യമാര്‍ന്ന വിഭവങ്ങള്‍ ലഭ്യമാകുന്ന നഗരമെന്ന നിലയിലും ചെന്നൈ സഞ്ചാരികളെ മാടിവിളിക്കുന്നു.
- ഒക്ടോബര്‍ മുതല്‍ ഫെബ്രുവരി വരെ
ചെന്നൈ സന്ദര്‍ശിക്കാന്‍ ഏറ്റവും അനുയോജ്യമായ സമയം ഒക്ടോബര്‍ മുതല്‍ ഫെബ്രുവരി വരെയുള്ള മാസങ്ങളാണ്. അതായത് ശൈത്യകാലം. ഈ സമയത്ത്, കാലാവസ്ഥ താരതമ്യേന സുഖകരമായിരിക്കും. ഇക്കാലയളവില്‍ തണുപ്പുണ്ടാകുമെന്നതിനാല്‍ യാത്ര സുന്ദരമാകും. വെയിലിന് താരതമ്യേന ശക്തി കുറവായിരിക്കുമെന്നതാണ് സവിശേഷത. ശൈത്യകാലത്ത്, ചെന്നൈയില്‍ കുറഞ്ഞ താപനില ഏകദേശം 22°C ആണ്. കുടുംബത്തോടൊപ്പവും സുഹൃത്തുക്കളോടൊപ്പവും നിങ്ങള്‍ക്ക് യാത്ര ആസ്വാദ്യകരമാക്കാം.
- ശൈത്യകാല ആഘോഷങ്ങള്‍
ഡിസംബറില്‍, നഗരത്തില്‍ നൃത്ത-സംഗീത ഉത്സവങ്ങള്‍ അരങ്ങേറാറുണ്ട്. ക്ഷേത്രോത്സവങ്ങളും ഇക്കാലയളവില്‍ ഏറെയുണ്ടാകും. ജനുവരിയില്‍ പൊങ്കല്‍ ആഘോഷങ്ങളില്‍ പങ്കുകൊള്ളാം. ഈ വിളവെടുപ്പ് ഉത്സവത്തിന് നാടും നഗരവും ആഘോഷത്തിമര്‍പ്പിലായിരിക്കും. പലവിധ രുചികരമായ ഭക്ഷണങ്ങള്‍ ആസ്വദിക്കാനും ഈ വേളയില്‍ അവസരം ലഭിക്കും. ഫെബ്രുവരി മാര്‍ച്ച് മാസങ്ങളില്‍, നാട്യാഞ്ജലി നൃത്തോത്സവവും കാണാം.
- ഉറപ്പായും സന്ദര്‍ശിക്കേണ്ട ഇടങ്ങള്‍
മറീന ബീച്ച്, ബസന്ത് നഗര്‍ ബീച്ച്, ചരിത്ര കേന്ദ്രമായ ഫോര്‍ട്ട് സെന്റ് ജോര്‍ജ്, ചെന്നൈ മ്യൂസിയം, മൈലാപ്പൂരിലെ കപാലീശ്വര ക്ഷേത്രം, ഗിണ്ടി ദേശീയോദ്യാനം, അണ്ണ സുവോളജിക്കല്‍ പാര്‍ക്ക് തുടങ്ങിയ പ്രകൃതി രമണീയവും സാംസ്‌കാരിക-ചരിത്ര പ്രാധാന്യമുള്ള കേന്ദ്രങ്ങളും നിര്‍ബന്ധമായും സന്ദര്‍ശിക്കാന്‍ ശ്രദ്ധിക്കുക. തെരുവുകളിലും ടൂറിസ്റ്റ് കേന്ദ്രങ്ങളിലും തമിഴ്നാടിന്റെ തനത് വിഭവങ്ങളും മറ്റ് ദക്ഷിണേന്ത്യന്‍ ഭക്ഷണങ്ങളും മതിവരുവോളം ആസ്വദിക്കുകയും ചെയ്യാം.
- അതിശയ ഷോപ്പിങ്ങ് കേന്ദ്രം
ദക്ഷിണേന്ത്യയിലെ ഏറ്റവും മികച്ച ഷോപ്പിങ് കേന്ദ്രങ്ങളിലൊന്നാണ് ചെന്നൈ. നഗരത്തിലെ ടി നഗര്‍ തുണിത്തരങ്ങള്‍ക്കും ആഭരണങ്ങള്‍ക്കും പേരുകേട്ട തെരുവാണ്. പാരീസ് മാര്‍ക്കറ്റ് വൈവിധ്യമാര്‍ന്ന ഉത്പന്നങ്ങള്‍ ഹോള്‍ സെയിലായും റീട്ടെയിലായും വാങ്ങാവുന്ന കേന്ദ്രവുമാണ്. പോണ്ടി ബസാറും വൈവിധ്യമാര്‍ന്ന വസ്ത്ര-ആഭരണ കളക്ഷനുകളൊരുക്കി കാത്തിരിക്കുന്നു. എക്സ് പ്രസ് അവന്യൂ പോലെ ആധുനിക മാളുകളും ഇവിടെ നിരവധിയുണ്ട്. ചെന്നൈ വേറിട്ട ഷോപ്പിങ് അനുഭവം സമ്മാനിക്കുമെന്നുറപ്പ്.
