ലോക ചോക്ലേറ്റ് ദിനം ആഘോഷിക്കുന്നത് എന്തിന്? അറിയാം മധുരിക്കുന്ന ഈ ചരിത്രം!

എല്ലാ വർഷവും ജൂലൈ 7 ലോകമെമ്പാടും ലോക ചോക്ലേറ്റ് ദിനമായി ആഘോഷിക്കുന്നു. ചോക്ലേറ്റിന്റെ ഗുണങ്ങളും പ്രാധാന്യവും ജനങ്ങളിലേക്ക് എത്തിക്കുക എന്നതാണ് ഇതിന്റെ ലക്ഷ്യം. ചോക്ലേറ്റ് കഴിക്കുന്നത് ആളുകളെ സന്തോഷിപ്പിക്കുക മാത്രമല്ല, ഹൃദയത്തെ ആരോഗ്യകരമായി നിലനിർത്തുകയും ചെയ്യുന്നു. ഒരു ചെറിയ ചോക്ലേറ്റ് പീസിന് തൽക്ഷണം മോശം മാനസികാവസ്ഥയെ മെച്ചപ്പെടുത്തുവാനുള്ള കഴിവുണ്ട്. ഈ കാര്യങ്ങൾ ജനങ്ങളിലേക്ക് എത്തിക്കുക എന്ന ലക്ഷ്യത്തോടെയാണ് ചോക്ലേറ്റ് ദിനം ആരംഭിച്ചത്. ഈ ദിവസം എങ്ങനെ ആഘോഷിക്കാൻ തുടങ്ങി എന്ന് നമുക്ക് നോക്കാം.

ചോക്ലേറ്റിന്റെ ചില വസ്തുതകൾ

കൊക്കോ ബീൻസ് ആദ്യമായി ഉപയോഗിച്ചത് ബിസി 350 ലാണ്. മായന്മാരാണ് ആദ്യമായി കൊക്കോ ബീൻസ് ഉപയോഗിച്ചത്. പിന്നീട്, എഡി 1680 ൽ, ആഫ്രിക്കയിലും അമേരിക്കയിലും കൊളോണിയൽ കൊക്കോ തോട്ടങ്ങൾ വളരാൻ തുടങ്ങി. ഫ്രഞ്ച് ചക്രവർത്തിയായ ലൂയി പതിമൂന്നാമന്റെ വിവാഹ സൽക്കാരത്തിൽ ചോക്ലേറ്റ് സമ്മാനമായി നൽകിയതോടെയാണ് യൂറോപ്പിൽ ചോക്ലേറ്റ് പ്രചാരത്തിലായത്. അത് എഡി 1600 ലായിരുന്നു.

എഡി 1828 ൽ കൊക്കോ പ്രസ്സ് കണ്ടുപിടിച്ചതോടെ എല്ലാവർക്കും നല്ല ചോക്ലേറ്റ് ലഭ്യമായിത്തുടങ്ങി. കൊക്കോ ബീൻസിൽ നിന്ന് കൊക്കോ ബട്ടർ നീക്കം ചെയ്യാനും നല്ല നിലവാരമുള്ള കൊക്കോ പൗഡർ ഉത്പാദിപ്പിക്കാനും സഹായിച്ച ഒരു ഉപകരണമായിരുന്നു കൊക്കോ പ്രസ്സ്.

ആദ്യത്തെ ചോക്ലേറ്റ് ബാർ എഡി 1847 ൽ ബ്രിട്ടനിലാണ് നിർമ്മിച്ചത്. ചോക്ലേറ്റ് ഉൽപ്പന്നങ്ങളുടെ ആദ്യ പരസ്യം എഡി 1880 ൽ പ്രത്യക്ഷപ്പെട്ടു. ആസ്ടെക്കുകൾ (എഡി 1400) കൊക്കോ ബീൻസ് കറൻസിയായി ഉപയോഗിച്ചിരുന്നു. എഡി 1519 ൽ സ്പെയിനിൽ ചോക്ലേറ്റ് ജനപ്രിയമായി മാറി. എഡി 1530 ൽ ചോക്ലേറ്റിൽ മധുരത്തിനായി പഞ്ചസാരയും തേനും ചേർത്തു തുടങ്ങി. തിയോബ്രോമ കൊക്കോ മരത്തിന്റെ വിത്തുകളിൽ നിന്നാണ് ചോക്ലേറ്റ് തയ്യാറാക്കുന്നത്. മെക്സിക്കോ, മധ്യ അമേരിക്ക, തെക്കേ അമേരിക്കയുടെ വടക്കൻ ഭാഗങ്ങൾ എന്നിവിടങ്ങളിലാണ് ഇത് പ്രധാനമായും കൃഷി ചെയ്യുന്നത്.

ചോക്ലേറ്റിന്റെ ചരിത്രം

2009 ജൂലൈ 7 നാണ് ലോക ചോക്ലേറ്റ് ദിനം ആരംഭിച്ചത്. 1550-ൽ യൂറോപ്പിൽ ചോക്ലേറ്റ് അവതരിപ്പിച്ചതിന്റെ വാർഷികമായാണ് ഈ ദിനം ആഘോഷിക്കുന്നത്. ചോക്ലേറ്റിന്റെ ചരിത്രത്തിന് ഏകദേശം 2500 വർഷം പഴക്കമുണ്ട്. 2000 വർഷങ്ങൾക്ക് മുമ്പ് അമേരിക്കയിലെ മഴക്കാടുകളിൽ നിന്നാണ് ചോക്ലേറ്റ് കണ്ടെത്തിയതെന്ന് വിശ്വസിക്കപ്പെടുന്നു.

ചോക്ലേറ്റ് ദിനത്തിന്റെ പ്രാധാന്യം

സന്തോഷത്തിന്റെയും ആഘോഷത്തിന്റെയും പ്രതീകമായാണ് ചോക്ലേറ്റ് കണക്കാക്കപ്പെടുന്നത്. വായിൽ മധുരം നിറയ്ക്കാൻ, മധുരപലഹാരങ്ങളേക്കാൾ ചോക്ലേറ്റ് നൽകാനാണ് ഇപ്പോൾ ആളുകൾ ഇഷ്ടപ്പെടുന്നത്. പിറന്നാൾ സമ്മാനം നൽകുന്നതായാലും, ആരുടെയെങ്കിലും ദുഃഖിതമായ മുഖം സന്തോഷിപ്പിക്കുന്നതിനായാലും, ചോക്ലേറ്റിനേക്കാൾ മികച്ചതായി മറ്റൊന്നുമില്ല.

ചോക്ലേറ്റ് ദിനം എങ്ങനെയാണ് ആഘോഷിക്കുന്നത്?

ഈ ദിവസം ആളുകൾ പരസ്പരം ചോക്ലേറ്റുകൾ സമ്മാനമായി നൽകുന്നു. വ്യത്യസ്ത രുചികളിലുള്ള ചോക്ലേറ്റുകൾ ആളുകൾ ആസ്വദിക്കുന്നു.

ചോക്ലേറ്റിന്റെ ഗുണങ്ങൾ

ചോക്ലേറ്റിന് നിരവധി ആരോഗ്യ ഗുണങ്ങളുണ്ട്-

• ചോക്ലേറ്റ് കഴിക്കുന്നത് സമ്മർദ്ദം കുറയ്ക്കും .
• ചോക്ലേറ്റിൽ അടങ്ങിയിരിക്കുന്ന ആന്റിഓക്‌സിഡന്റുകൾ ഹൃദ്രോഗ സാധ്യത കുറയ്ക്കുന്നു.
• രക്തസമ്മർദ്ദം നിയന്ത്രിക്കുന്നതിന് ചോക്ലേറ്റ് ഗുണം ചെയ്യും .
• ശരീരഭാരം കുറയ്ക്കാൻ ഡാർക്ക് ചോക്ലേറ്റ് കഴിക്കുന്നത് സഹായിക്കുന്നു.