ബാംഗ്ലൂരില്‍ നിന്ന് മണ്‍സൂണ്‍ കാലത്ത് വീക്കെന്‍ഡ് യാത്രകള്‍ക്കൊരുങ്ങുകയാണെങ്കില്‍ നിര്‍ബന്ധമായും പോയിരിക്കേണ്ട 6 മനോഹര ഇടങ്ങള്‍ ഏതൊക്കെയെന്നറിയാം.
- നന്ദി ഹില്‍സ്
ബാംഗ്ലൂരില്‍ നിന്ന് 60 കിലോമീറ്റര്‍ യാത്ര ചെയ്ത് എത്താവുന്ന അതിമനോഹരമായ ഹില്‍സ്റ്റേഷനാണിത്. മഴക്കാലത്തെ തണുത്തുറഞ്ഞ കാലാവസ്ഥ നിങ്ങളെ അത്രമേല്‍ ത്രസിപ്പിക്കും. കോടപുതച്ച മലനിരകള്‍ ആസ്വദിക്കാവുന്ന വിശാലമായ കാഴ്ചകള്‍ നന്ദി ഹില്‍സില്‍ നിന്ന് സാധ്യമാണ്. കാലാവസ്ഥാ മുന്നറിയിപ്പുകള്‍ തിരിച്ചറിഞ്ഞ്, ട്രെക്കിങ്, റോക്ക് ക്ലൈംബിങ് തുടങ്ങിയ വിനോദങ്ങളിലും ഏര്‍പ്പെടാം. ഉദയാസ്തമയ കാഴ്ചകള്‍ക്കും പേരുകേട്ട ഇടമാണിത്.
- അന്തര ഗംഗെ
ട്രെക്കിംഗ് പ്രേമികള്‍ക്ക് അനുയോജ്യമായ മണ്‍സൂണ്‍ ഡെസ്റ്റിനേഷനാണ് അന്തര ഗംഗെ. ബെംഗളൂരുവില്‍ നിന്ന് 70 കിലോമീറ്റര്‍ അകലെയാണ് ഇത് സ്ഥിതി ചെയ്യുന്നത്. കര്‍ണാടകയിലെ കോലാര്‍ ജില്ലയിലെ ഈ വിനോദ സഞ്ചാര കേന്ദ്രം പകൃതിദത്ത ഗുഹകള്‍ക്ക് പേരുകേട്ടതാണ്. മേഘങ്ങള്‍ മനോഹര കാഴ്ചയൊരുക്കി നിങ്ങളെ അതിശയിപ്പിക്കും. കുന്നുകളുടെയും താഴ്വരകളുടെയും കാലവര്‍ഷക്കാലത്തെ പച്ചപ്പാര്‍ന്ന കാഴ്ചയും അതിസുന്ദരമാണ്.
- ചിക്മംഗളൂര്‍
പശ്ചിമഘട്ടത്തില്‍ സ്ഥിതി ചെയ്യുന്ന ചിക്മംഗളൂര്‍, മണ്‍സൂണില്‍ പ്രകൃതിഭംഗിയാര്‍ന്ന ഇടങ്ങളൊരുക്കി സഞ്ചാരികളെ കാത്തിരിക്കുന്നു. ബെംഗളൂരുവില്‍ നിന്ന് 250 കിലോമീറ്റര്‍ സഞ്ചരിച്ച് എത്താവുന്ന ഇവിടം കാപ്പിത്തോട്ടങ്ങളുടെ പറുദീസയാണ്. യാത്രികര്‍ മികച്ച വിശ്രമ കേന്ദമായി ഈ പ്രകൃതിരമണീയ സ്ഥലം തെരഞ്ഞെടുക്കുന്നു. പച്ചപ്പിന്റെ ഈ കേന്ദ്രം പ്രശാന്തസുന്ദരവുമാണ്. കുന്നുകള്‍, അരുവികള്‍, വെള്ളച്ചാട്ടങ്ങള്‍, പൈതൃക സ്ഥലങ്ങള്‍ എന്നിവയെല്ലാം ഇവിടെ കാണാനാകും.
- അഗുംബെ
ദൈനംദിന ജീവിതത്തിലെ തിരക്കുകളില്‍ നിന്ന് ഇടവേള ആഗ്രഹിക്കുന്ന നഗരവാസികള്‍ക്ക് ഷിമോഗ ജില്ലയിലെ ഈ ഗ്രാമം മികച്ച കാഴ്ചാവിരുന്നൊരുക്കുന്നു. ബെംഗളൂരുവില്‍ നിന്ന് 7.5 മണിക്കൂര്‍ യാത്ര ചെയ്ത് ഇവിടെയെത്താം. രാത്രിയാത്ര തെരഞ്ഞെടുത്താല്‍ നേരം പുലരുമ്പോഴേക്കും എത്താമെന്നര്‍ഥം. അഗുംബെയുടെ ഭൂപ്രകൃതി മഴക്കാടുകളും വെള്ളച്ചാട്ടങ്ങളും കൊണ്ട് അടയാളപ്പെടുത്തപ്പെട്ടതാണ്.
- ജോഗ് വെള്ളച്ചാട്ടം
നുരഞ്ഞുപതഞ്ഞൊഴുകുന്ന ജോഗ് വെള്ളച്ചാട്ടം കര്‍ണാടകയിലെ വിഖ്യാതമായ വിനോദസഞ്ചാര കേന്ദ്രമാണ്, മഴക്കാലത്ത് അതിമനോഹരിയാണ് ജോഗ്. ബാംഗ്ലൂരില്‍ നിന്ന് ഒറ്റരാത്രി നീളുന്ന യാത്രകൊണ്ട് ഇവിടെയെത്താം(7.5 മണിക്കൂര്‍). വെള്ളച്ചാട്ടത്തിന്റെ ഗാംഭീര്യം നിങ്ങളെ കീഴടക്കും. പാറയില്‍ വീണ് ചിതറുന്ന വെള്ളത്തുള്ളികള്‍ മനോഹര കാഴ്ചയുടെ വിരുന്നൊരുക്കുന്നു. ഇവിടെ സുരക്ഷാമാനദണ്ഡങ്ങള്‍ കര്‍ശനമായി പാലിക്കാന്‍ ശ്രദ്ധിക്കുക.
- കൂര്‍ഗ്
കര്‍ണാടകയിലെ അതിമനോഹരമായ ഹില്‍സ്റ്റേഷനാണ് കൂര്‍ഗ് അഥവാ കൊടക്. ബാംഗ്ലൂരില്‍ നിന്ന് 250 കിലോമീറ്റര്‍ സഞ്ചരിച്ച് എത്താവുന്ന ഇടം. ഇവിടെ പച്ചപ്പിന്റെ കാഴ്ചകളാണെങ്ങും. അതിനാല്‍ തന്നെ അതിസുന്ദരവും സുഖകരവുമായ കാലാവസ്ഥയുമാണ്. മണ്‍സൂണില്‍ കോടപുതച്ച മലനിരകള്‍ നിങ്ങളെ മാടിവിളിക്കും. തണുപ്പില്‍ അലിഞ്ഞ് കാപ്പിത്തോട്ടങ്ങളിലൂടെയുള്ള സഞ്ചാരം അതിവിശിഷ്ടവുമാണ്. ദക്ഷിണേന്ത്യയിലെ ഏറ്റവും മികച്ച വേനല്‍ക്കാല വിശ്രമ കേന്ദ്രങ്ങളിലൊന്നാണിത്.
