സമഭാവനയുടെ തിരുവോണ ലഹരിയിലാണ് നാടും നഗരവും. മാനുഷരെല്ലാം ഒന്നുപോലെ എന്ന മാനവിക സന്ദേശമാണ് ഓണത്തിന്റെ പൊരുള്‍. ഇല്ലാത്തവര്‍ക്ക് ഉള്ളവര്‍ കൈയ്യയച്ചുനല്‍കേണ്ടതിന്റെ സന്ദേശം ഓണത്തില്‍ ഉള്‍ച്ചേര്‍ന്നിരിക്കുന്നു. ദുരിതപ്പാടുകളില്‍ ഉഴലുന്ന മനുഷ്യരെ ചേര്‍ത്തുപിടിക്കുമ്പോഴാണ് ഓണം പൂര്‍ണമാവുക. അത്തരത്തിലെല്ലാം ഉത്സവ നിറവിലാണ് ലോകമെങ്ങുമുള്ള മലയാളികള്‍.
വറുതിക്കര്‍ക്കടകത്തിലെ തോരാദുരിതമഴയില്‍ നിന്ന് ചിങ്ങവെയിലിന്റെ തെളിച്ചവുമാണ് മലയാളിക്ക് ഓണം. കള്ളവും ചതിയും പൊളിവചനങ്ങളുമില്ലാത്ത നല്ല കാലത്തിന്റെ നിറസ്മരണ പുതുക്കല്‍. ഇത്രയേറെ ഗൃഹാതുര മുദ്രയുള്ള ആഘോഷം മലയാളിക്ക് വേറെന്തുണ്ട്. അത്രമേല്‍ സന്തോഷക്കാലമാണ് ഓണം. പലവര്‍ണ പൂക്കളവും, മധുരക്കൂട്ടേകുന്ന പ്രഥമനടക്കം വിഭവസമൃദ്ധമായ സദ്യയും ഒരുക്കി ഓണക്കോടിയണിഞ്ഞ് മാവേലിയെ വരവേല്‍ക്കുന്നു മലയാളക്കര.
ജാതിമത ലിംഗവര്‍ഗവര്‍ണ ഭേദങ്ങളില്ലാതെ ഒരൊറ്റ മനസോടെ മലയാളി തിരുവോണം പ്രൗഢിയോടെ, ആഹ്ളാദാരവങ്ങളോടെ ഉത്സവമാക്കുന്നു. ലോകത്തിന്റെ ഏത് കോണിലായാലും മലയാളി ഓണം കെങ്കേമമാക്കും. പത്തുനാള്‍ മുറ്റത്തെ പൂത്തറയില്‍ കളങ്ങള്‍ മാറിയെത്തും. ഒന്നുചേരലിന്റെ ആഘോഷമാണ് ഓണം. ബന്ധങ്ങളും സൗഹൃദങ്ങളും കൂട്ടിയിണക്കപ്പെടുന്ന ഉത്സവവേള.
മറ്റെല്ലാ ഭേദങ്ങളും മാറ്റിവച്ച് മലയാളി ഈ ആഘോഷ വേളയില്‍ ഒന്നിക്കുന്നു. ദൂരദേശങ്ങളിലുള്ളവര്‍ അവരവരുടെ നാടുകളിലേക്കെത്തുന്നു. കുടുംബവുമൊത്ത് അതുല്യ നിമിഷങ്ങള്‍ സൃഷ്ടിക്കുന്നു. പൂക്കളമിട്ടും പുതുവസ്ത്രമണിഞ്ഞും ഊഞ്ഞാലാടിയും ഓണക്കളികളിലേര്‍പ്പെട്ടും ഇതുവരെയുള്ളതില്‍ ഏറ്റവും മികച്ച ഓണമാക്കാന്‍ അവര്‍ മത്സരിക്കുന്നു.
ഐതിഹ്യപ്പെരുമയും നിറച്ചാര്‍ത്ത്
ഐതിഹ്യങ്ങള്‍ പലതുണ്ടെങ്കിലും മഹാബലി രാജാവുമായി ബന്ധപ്പെട്ടതാണ് പ്രധാനം. നീതിമാനായിരുന്ന മഹാബലിയെന്ന അസുര രാജാവ് അത്തം പത്തിന് തിരുവോണ നാളില്‍ പ്രജകളെ കാണാന്‍ പാതാളത്തില്‍ നിന്ന് ഭൂമിയിലെത്തുന്നുവെന്നാണ് സങ്കല്‍പ്പം. മഹാവിഷ്ണു ബ്രാഹ്‌മണ കുമാരനായ വാമനനായി മൂന്നടി മണ്ണ് ചോദിച്ചെത്തുന്നു. നീതിമാനും പ്രജാവത്സലനുമായ മാവേലി സമ്മതം മൂളുന്നു.
വാമനന്‍ ഭീമാകാരത്വം സ്വീകരിച്ച് രണ്ടടി വച്ചതോടെ പ്രപഞ്ചം മുഴുവന്‍ അളക്കപ്പെട്ടു. മൂന്നാമത്തെ അടിയാവശ്യപ്പെട്ടപ്പോള്‍ മഹാബലി തന്റെ ശിരസ്സ് കുനിച്ച് ഇടം നല്‍കി. പാതാളത്തിലേക്ക് ചവിട്ടിത്താഴ്ത്തും മുന്‍പ് മഹാബലി ഒരാവശ്യം മുന്നോട്ടുവച്ചു. വര്‍ഷാവര്‍ഷം ചിങ്ങത്തിലെ തിരുവോണനാളില്‍ പ്രജകളെ സന്ദര്‍ശിക്കാന്‍ അവസരം തരണമെന്നായിരുന്നു അത്. ലോകമെങ്ങുമുള്ള മലയാളികള്‍ക്ക് ടൈംസ് നൗ വാര്‍ത്തയുടെ പൊന്നോണാശംസകള്‍…
