ഇൻഡോർ: ഇന്ത്യൻ ക്രിക്കറ്റ് താരം സ്മൃതി മന്ദാനയെക്കുറിച്ച് സംഗീത സംവിധായകനും ചലച്ചിത്ര നിർമ്മാതാവുമായ പലാഷ് മുച്ചാലിന്റെ വാക്കുകൾ സമൂഹമാധ്യമങ്ങളിൽ ചർച്ചയായി മാറിയിരിക്കുകയാണ്. മന്ദാന ഉടൻ തന്നെ ഇൻഡോറിന്റെ മരുമകളായി മാറുമെന്നാണ് പലാഷ് പറഞ്ഞത്. ഇതോടെ മന്ദാനയുമായുള്ള പലാഷിന്റെ ബന്ധത്തെക്കുറിച്ചുള്ള ഊഹാപോഹങ്ങൾക്ക് ആക്കം കൂടിയിരിക്കുകയാണ്. സോഷ്യൽ മീഡിയയിൽ പലപ്പോഴും ഒരുമിച്ച് കാണപ്പെടുന്ന മുച്ചാലും മന്ദാനയും തമ്മിലുള്ള ബന്ധത്തെക്കുറിച്ച് ഊഹാപോഹങ്ങൾ പ്രചരിക്കുന്നുണ്ടെങ്കിലും ഇരുവരും ഒരിക്കലും റിലേഷനിലാണെന്ന് പരസ്യമായി സ്ഥിരീകരിച്ചിട്ടില്ല.
വെള്ളിയാഴ്ച സ്റ്റേറ്റ് പ്രസ് ക്ലബ്ബിൽ നടന്ന പരിപാടിയിൽ, മുച്ചാലിനോട് മന്ദാനയുമായുള്ള ബന്ധത്തെക്കുറിച്ചും അവളുമായി ബന്ധപ്പെട്ട ഓർമ്മകളെക്കുറിച്ചും ചോദിച്ചപ്പോഴായിരുന്നു അദ്ദേഹത്തിന്റെ മറുപടി. ഞാൻ നിങ്ങൾക്ക് തലക്കെട്ട് തന്നു കഴിഞ്ഞുവെന്നും 30കാരനായ മുച്ചാൽ പറഞ്ഞു. ഇന്ത്യൻ വനിതാ ക്രിക്കറ്റ് ടീമിന്റെ വൈസ് ക്യാപ്റ്റനും ഓപ്പണിംഗ് ബാറ്ററുമാണ് മന്ദാന. ഞായറാഴ്ച ഇംഗ്ലണ്ടിനെതിരായ ഐസിസി വനിതാ ലോകകപ്പ് ഏകദിന മത്സരം നടക്കുന്നത് ഇൻഡോറിലാണ്.
ALSO READ: ക്യാൻസറിനും തളർത്താനായില്ല! ‘തിരിച്ചുവരും’, മുൻ ആർസിബി താരത്തിന്റെ വികാരപരമായ പ്രതികരണം
ഇന്ത്യൻ ക്യാപ്റ്റൻ ഹർമൻപ്രീത് കൗറിനും സ്മൃതിക്കും എന്റെ ആശംസകൾ. ഇന്ത്യൻ ക്രിക്കറ്റ് ടീം എല്ലാ മത്സരങ്ങളും ജയിച്ച് രാജ്യത്തിന് മഹത്വം കൊണ്ടുവരണമെന്ന് ഞങ്ങൾ എപ്പോഴും ആഗ്രഹിക്കുന്നുവെന്നും മുച്ചാൽ പറഞ്ഞു. സഹോദരി പാലക് മുച്ചലിനൊപ്പം നിരവധി ബോളിവുഡ് സിനിമകൾക്ക് സംഗീതം നൽകിയ സംഗീതജ്ഞനാണ് പലാഷ് മുച്ചാൽ.
The post സ്മൃതി മന്ദാന ഉടൻ തന്നെ ഇൻഡോറിന്റെ മരുമകളായി മാറും; പലാഷ് മുച്ചാൽ appeared first on Express Kerala.
