ബെംഗളൂരു: രണ്ട് മാസത്തോളം നീളുന്ന ഭാരത ക്രിക്കറ്റ് പൂരം ഇന്ത്യന് പ്രീമിയര് ലീഗി(ഐപിഎല്)ന്റെ 19-ാം പതിപ്പ് തുടങ്ങാന് ഇനി രണ്ട് നാള് കൂടി. ശനിയാഴ്ച്ച വൈകീട്ട് ബെംഗളൂരു ചിന്ന സ്വാമി സ്റ്റേഡിയത്തില് ഉദ്ഘാടന മത്സരം നടക്കും. നിലവിലെ ജേതാക്കളായ ബെംഗളൂരു റോയല് ചലഞ്ചേഴ്സ് ബെംഗളൂരുവും സണ്റൈസേഴ്സ് ഹൈദരാബാദും തമ്മിലാണ് ആദ്യ മത്സരം. തുടര്ന്ന് അങ്ങോട്ട് ഫൈനല് ഉള്പ്പെടെ 84 മത്സരങ്ങള് നീളുന്ന ക്രിക്കറ്റ് മാമാങ്കം മെയ് 31ന് ഫൈനലോടെ സമാപിക്കും.
ഉദ്ഘാടന മത്സരം നടക്കുന്ന ചിന്ന സ്വാമി സ്റ്റേഡിയത്തില് 11 സീറ്റുകള് ഒഴിച്ചിടാന് കര്ണാടക ക്രിക്കറ്റ് അസോസിയേഷന് തീരുമാനിച്ചിട്ടുണ്ട്. കഴിഞ്ഞ വര്ഷം റോയല് ചലഞ്ചേഴ്സ് ജേതാക്കളായതിന്റെ ആഘോഷങ്ങള്ക്കിടയിലെ തിക്കിലും തിരക്കിലും പെട്ട് 11 പേരുടെ മരണത്തിനിടയാക്കിയതിന് ആദരമര്പ്പിച്ചുകൊണ്ടാണ് സീറ്റുകള് ഒഴിച്ചിടുന്നത്. കോവിഡ് പശ്ചാത്തലത്തില് നിര്ത്തലാക്കി ഡബിള് റൗണ്ട് റോബിന് മത്സര രീതി ഇത്തവണയും പുനസ്ഥാപിച്ചിട്ടില്ല. 2028 സീസണോടെ വീണ്ടും ഇത്തരത്തില് സജീവമാക്കാന് ആലോചനയുണ്ട്. മലയാളി താരം സഞ്ജു സാംസണ് പുതിയ തട്ടകം ചെന്നൈ സൂപ്പര് കിങ്സിനൊപ്പം ചേര്ന്ന സീസണ് കൂടിയാണിത്. ഭാരതം ട്വന്റി20 ലോകകപ്പില് ചരിത്രത്തില് ആദ്യമായി തുടര് കിരീട നേട്ടം കൈവരിച്ച സാഹചര്യത്തിലാണ് ഇത്തവണത്തെ ഐപിഎല് വന്നെത്തിയിരിക്കുന്നത്. വിദേശ താരങ്ങളില് പലരും തുടക്കത്തിലേ പരിക്കിന്റെ പിടിയിലും മറ്റും പെട്ടത് വലിയ തിരിച്ചടിയാണുണ്ടാക്കിയിരിക്കുന്നത്. ഇതിനെ മറികടക്കുന്ന തരത്തില് തട്ടുപൊളിപ്പന് പ്രകടനം കാഴ്ച്ചവയ്ക്കാനാകും ഓരോ ടീമും ഓരോ മത്സരവും ജാഗ്രത കാട്ടുക.
