അപകടങ്ങളെ തുടര്ന്ന് വിരലുകള്, കൈപ്പത്തി, കാല് തുടങ്ങിയ ശരീര ഭാഗങ്ങള് അറ്റുപോകുന്ന നടുക്കുന്ന സാഹചര്യങ്ങള് പലപ്പോഴുമുണ്ടാകാറുണ്ട്. വാഹനാപകടങ്ങള്, ആക്രമണങ്ങള്, യന്ത്രഭാഗങ്ങളില് അബദ്ധത്തില് കുടുങ്ങല്, മൂര്ച്ചയേറിയ ഉപകരണങ്ങളാല് മുറിപ്പെടല് തുടങ്ങിയ സാഹചര്യങ്ങളിലാണ് അത്തരത്തില് സംഭവിക്കാറ്.
ആധുനിക ചികിത്സാ മാര്ഗങ്ങളിലൂടെ അറ്റുപോയ ശരീര ഭാഗങ്ങള് തുന്നിച്ചേര്ക്കാനുള്ള സാധ്യതകള് ഇന്ന് വിപുലമാണ്. എന്നാല് ഇത് ഫലപ്രദമാകണമെങ്കില് അറ്റുപോയ ഭാഗം യഥാവിധി വേഗത്തില് തന്നെ അപകടം നേരിട്ട വ്യക്തിയുള്ള ആശുപത്രിയില് എത്തിക്കേണ്ടതുണ്ട് (Preservation Of Severed Limb).
അറ്റഭാഗം കൈകാര്യം ചെയ്യേണ്ടത് ഇങ്ങനെ
- ശുദ്ധജലത്തില് കഴുകണം
മണ്ണ്, മറ്റ് പൊടികള് തുടങ്ങിയവ അറ്റുപോയ ശരീര ഭാഗത്തില് രക്തവുമായി പറ്റിപ്പിടിച്ചിട്ടുണ്ടാകും. ഇത് ശുദ്ധജലത്തില് കഴുകുകയാണ് ആദ്യം ചെയ്യേണ്ടത്.
- തുണികൊണ്ട് മൂടുക
ഈര്പ്പമില്ലാത്തതും വൃത്തിയുള്ളതുമായ ഒരു തുണിയില്, മുറിഞ്ഞ് അകന്നുപോയ ശരീര ഭാഗം പൊതിയുക.
- പ്ലാസ്റ്റിക് കവറില് വയ്ക്കാം
തുടര്ന്ന് അത് മൂടിയ നിലയില് തന്നെ ഒരു വൃത്തിയുള്ള പ്ലാസ്റ്റിക് കവറിലേക്ക് മാറ്റണം.
- ഐസില് വയ്ക്കുക
തുടര്ന്ന് ഈ കവര് ഐസില്വച്ച് സുരക്ഷിതമാക്കാം. പക്ഷേ ഒരിക്കലും മുറിഞ്ഞ ഭാഗം നേരിട്ട് ഐസിലോ വെള്ളത്തിലോ ഇട്ടുവയ്ക്കരുത്.
- ആശുപത്രിയിലേക്ക് മാറ്റുക
തുടര്ന്ന് അത് എത്രയും വേഗം ആശുപത്രിയിലെത്തിക്കണം. ഏറെ വൈകിയാല് തുന്നിച്ചേര്ക്കുന്നത് ഫലപ്രദമാകണമെന്നില്ല.
4 മുതല് 6 മണിക്കൂറിനുള്ളില് റീപ്ലാന്റേഷന് നടത്തുമ്പോഴാണ് ഏറ്റവും വിജയകരമാകുന്നതായി കണ്ടെത്തിയിരിക്കുന്നത്. എന്നിരുന്നാലും ആവശ്യത്തിനുള്ള തണുപ്പില് ആ ഭാഗം സൂക്ഷിക്കാനായാല് അതില് കൂടുതല് മണിക്കൂറുകളെടുക്കുന്ന സാഹചര്യത്തിലും ശസ്ത്രക്രിയ പൂര്ണ വിജയകരമാകാറുണ്ട് (How To Preserve an Amputated Organ).
പരിക്കേറ്റയാളെ ആശുപത്രിയിലെത്തിക്കുമ്പോള്…
വാഹനാപകടങ്ങളില് പരിക്കേറ്റ വ്യക്തികളെ ആശുപത്രിയിലെത്തിക്കുമ്പോള് അതീവ ഗൗരവമാര്ന്ന ശ്രദ്ധ നല്കേണ്ടതുണ്ട്. വാഹനാപകടങ്ങളിലും മറ്റും നട്ടെല്ലിന് പരിക്കേല്ക്കാന് സാധ്യതയേറെയാണ്. സുഷുമ്നാനാഡിക്ക് ക്ഷതം സംഭവിക്കുന്നത് ഗുരുതര ശാരീരിക പ്രയാസങ്ങള്ക്കിടയാക്കും.
അതിനാല് കഴുത്തിന് കൃത്യമായ സപ്പോര്ട്ട് നല്കേണ്ടത് പ്രധാനമാണ്. രക്ഷാപ്രവര്ത്തനത്തിനെത്തുന്നവര് മാന്വല് ഇന് ലൈന് സ്റ്റബിലൈസേഷന് (Manual In Line Stabilization) രീതിയാണ് പ്രയോഗിക്കേണ്ടത്. അതായത് കൈകള് ഉപയോഗിച്ച് പരിക്കേറ്റയാളിന്റെ കഴുത്തിന്റെ ചലിനങ്ങള് നിയന്ത്രിക്കണം.
രക്ഷാപ്രവര്ത്തനത്തില് ഏര്പ്പെടുന്നവരില് ഒരാള് തന്റെ കൈകള് പരിക്കേറ്റയാളുടെ തലയുടെ ഇരുവശങ്ങളിലുമായി ചേര്ത്തുവയ്ക്കണം. തള്ള വിരലുകള് ശരീരത്തിന്റെ മുന്ഭാഗത്തും മറ്റ് വിരലുകള് തയ്ക്ക് പിറകിലും വരുന്ന രീതിയില് താങ്ങണം.
ഇത് പരിക്കേറ്റ വ്യക്തിയുടെ കഴുത്തിന്റെ ചലനങ്ങള് കുറയ്ക്കും. ഇത് സുഷുമ്നാ നാഡിക്ക് കൂടുതല് ക്ഷതമുണ്ടാകുന്നത് ഒഴിവാക്കും.
നട്ടെല്ലിന്റെ പരിരക്ഷ
കഴുത്ത് താങ്ങുന്നതിനൊപ്പം നട്ടെല്ലിനും മതിയായ സപ്പോര്ട്ട് നല്കണം. ഒരാള് കഴുത്ത് താങ്ങുമ്പോള് രണ്ടാമത്തേയാള് ഒരു കൈ രോഗിയുടെ ഷോള്ഡറിന് താഴെയും മറ്റേ കൈ ഇടുപ്പിന് താഴെയും വയ്ക്കണം.
മൂന്നാമത്തെയാള് ഒരു കൈ രണ്ടാമത്തെയാളിന്റെ താഴത്തെ കൈ ക്രോസ് ചെയ്തുകൊണ്ട് ഇടുപ്പിന്റെ മുകളില് വയ്ക്കണം. മറ്റേ കൈ കാല്മുട്ടിന്റെ താഴെയും വയ്ക്കണം. തുടര്ന്ന് മൂന്നുപേരും ചേര്ന്ന് പരിക്കേറ്റയാളെ ചെരിച്ച് പിടിക്കുക (Log Roll Method).
Also Read: കനത്ത ചൂടില് കണ്ണുകള്ക്ക് പൊള്ളലേല്ക്കാം ; നിര്ബന്ധമായും ശ്രദ്ധിക്കേണ്ട 5 കാര്യങ്ങള്
തുടര്ന്ന് സ്പൈന് ബോര്ഡ്, പലക അല്ലെങ്കില് കട്ടിയുള്ള ബെഡ്ഷീറ്റ് എന്നിവയില് ഏതെങ്കിലും ഒന്നിലേക്ക് കിടത്തുക. തുടര്ന്ന് എത്രയും വേഗം സുരക്ഷിതമായി ആശുപത്രിയിലേക്ക് മാറ്റുകയുമാണ് വേണ്ടത്.
തലയ്ക്കേറ്റ പരിക്ക് തിരിച്ചറിയാം
അപകടത്തില്പ്പെട്ട വ്യക്തി പൂര്ണ അബോധാവസ്ഥയിലാണെങ്കില് അത് തലയ്ക്ക് ഗുരുതരമായി ക്ഷതമേറ്റതിനെ തുടര്ന്നാകാന് ഇടയുണ്ട്. അര്ധബോധാവസ്ഥ, പരസ്പര ബന്ധമില്ലാത്ത സംസാരം, തുടര്ച്ചയായ ഛര്ദി, ചെവിയിലൂടെയോ മുക്കിലൂടെയോ ഉള്ള രക്തസ്രാവം, അപസ്മാരം എന്നിവ തലയ്ക്ക് പരിക്കേറ്റതിന്റെ ലക്ഷണങ്ങളാണ്.
വിവരങ്ങള്ക്ക് കടപ്പാട്: ബേബി മെമ്മോറിയല് ഹോസ്പിറ്റല്
