ഭുവനേശ്വർ: ഒഡീഷയിലെ KIIT ക്യാമ്പസ് വെള്ളിയാഴ്ച രാത്രി ഗ്ലാമറിന്റെ മിഴിവിൽ തിളങ്ങി. ടൈംസ് ഗ്രൂപ്പ് സംഘടിപ്പിച്ച ഫെമിന മിസ് ഇന്ത്യ മത്സരത്തിന്റെ ഗ്രാൻഡ് ഫിനാലെയിൽ, ഗോവയെ പ്രതിനിധീകരിച്ച സാധ്വി സെയിൽ ഫെമിന മിസ് ഇന്ത്യ വേൾഡ് 2026 (Femina Miss India 2026 Winner) കിരീടം സ്വന്തമാക്കി. ഇനി മിസ് വേൾഡ് മത്സരത്തിൽ സാധ്വി സെയിൽ ഇന്ത്യയെ പ്രതിനിധീകരിക്കും.
മഹാരാഷ്ട്രയിലെ രാജ്നന്ദിനി പവാർ ആദ്യ റണ്ണർ-അപ്പായും, ജമ്മു-കാശ്മീരിലെ ശ്രീ അദ്വൈത രണ്ടാം റണ്ണർ-അപ്പായും (Femina Miss India 2026 Highlights) തെരഞ്ഞെടുക്കപ്പെട്ടു.
‘സ്ത്രീശാക്തീകരണത്തിന്റെ വേദി’ – ടൈംസ് ഗ്രൂപ്പ്
‘ആറ് ദശാബ്ദങ്ങളായി ഫെമിന മിസ് ഇന്ത്യ യുവ ഇന്ത്യൻ സ്ത്രീകൾക്ക് അവരുടെ കഴിവുകൾ കണ്ടെത്താനും സ്വന്തം വഴികൾ സൃഷ്ടിക്കാനും സഹായിച്ച ഒരു ശക്തമായ വേദിയാണ്. സിനിമ, മാധ്യമം , സംരംഭകത്വം, പൊതുസേവനം, ആഗോള അഭിഭാഷകവൃത്തി എന്നിവയുൾപ്പെടെ ഒന്നിലധികം വ്യവസായങ്ങളിൽ തങ്ങളുടെ വ്യക്തിമുദ്ര പതിപ്പിച്ച സ്ത്രീകൾക്കുള്ള ഒരു ലോഞ്ച്പാഡാണ് ഈ പ്ലാറ്റ്ഫോം’ – ടൈംസ് ഗ്രൂപ്പ് മാനേജിംഗ് ഡയറക്ടർ വിനീത് ജെയിൻ ചടങ്ങിൽ പറഞ്ഞു. ഐശ്വര്യ റായ്, പ്രിയങ്ക ചോപ്ര, ദിയ മിർസ, മനുഷി ചില്ലർ തുടങ്ങിയവർ ഈ വേദിയുടെ പൈതൃകമാണെന്നും അദ്ദേഹം കൂട്ടിച്ചേർത്തു.
‘വർഷങ്ങളായി, ഐശ്വര്യ റായ് ബച്ചൻ, പ്രിയങ്ക ചോപ്ര, ദിയ മിർസ, മാനുഷി ചില്ലാർ തുടങ്ങിയ വിജയികളിലൂടെ ഇന്ത്യയ്ക്ക് ആഗോള അംഗീകാരം നേടിക്കൊടുത്ത മത്സരമാണിത്. ദശലക്ഷക്കണക്കിന് സ്ത്രീകളെ പ്രചോദിപ്പിക്കുന്നത് അവർ തുടരുന്നു. ഫെമിന മിസ് ഇന്ത്യയുടെ യഥാർത്ഥ പാരമ്പര്യം അതാണ്. ഇന്ന് രാത്രി, ഭുവനേശ്വറിൽ ആ പാരമ്പര്യം കൂടുതൽ അർത്ഥവത്തായി തോന്നുന്നു.
Also Read: ‘കാഴ്ച്ചയിൽ ഒരുപോലെ’; ചിയ സീഡ്സും ബേസിൽ സീഡ്സും തമ്മിലുള്ള വ്യത്യാസം എന്താണ്?
KIIT യിലും KISS ലും ഈ ഗ്രാൻഡ് ഫിനാലെ സംഘടിപ്പിക്കുന്നത് വളരെ പ്രധാനമാണ്, കാരണം ഈ സ്ഥാപനങ്ങൾ നമ്മൾ വിശ്വസിക്കുന്ന മൂല്യങ്ങളെ പ്രതിഫലിപ്പിക്കുന്നു. അതായത് അവസരങ്ങളിലേക്കുള്ള പ്രവേശനം, വിദ്യാഭ്യാസത്തിന്റെ ശക്തി, യുവാക്കൾക്ക്, പ്രത്യേകിച്ച് യുവതികൾക്ക്, ഉയർന്നുവരാനും നയിക്കാനും ശാക്തീകരിക്കേണ്ടതിന്റെ പ്രാധാന്യം എന്നിവയാണ് ഈ സ്ഥാപനങ്ങളും നൽകുന്നത്’ – അദ്ദേഹം കൂട്ടിച്ചേർത്തു.
സംഗീതവും ഫാഷനും നിറഞ്ഞ വേദി
ഫിനാലെ രാത്രി ഫാഷൻ, സംഗീതം, പ്രകടനങ്ങൾ എന്നിവയുടെ മനോഹര സംഗമമായി മാറി. നടൻ ഇഷാൻ ഖട്ടർ, ലോറൻ ഗോട്ട്ലീബ് എന്നിവർ ആവേശകരമായ നൃത്തപ്രകടനത്തോടെ വേദി കീഴടക്കിയപ്പോൾ ഗായകൻ ജുബിൻ നൗട്ടിയാൽ ഹൃദയസ്പർശിയായ ഗാനങ്ങളാൽ പരിപാടിക്ക് നിറം കൂട്ടി. മനീഷ് പോൾ, സാറ ജെയിൻ ഡയസ്, ശ്രീതമ ബസു എന്നിവർ ചേർന്നാണ് പരിപാടി അവതരിപ്പിച്ചത്.
ഇന്ത്യയുടെ കൈത്തറി പൈതൃകത്തിന് ആദരം
“വിശ്വ സൂത്ര: വീവ്സ് ഓഫ് ഇന്ത്യ” എന്ന തീമിൽ, 30 സംസ്ഥാനങ്ങളിലെ വിജയികൾ ഇന്ത്യയുടെ കൈത്തറി പൈതൃകം ആഗോള ഫാഷൻ രൂപങ്ങളിൽ അവതരിപ്പിച്ചു. വസ്ത്ര രൂപകൽപ്പന നിർവഹിച്ചത് വൈശാലി എസ് ആയിരുന്നു.
വിധികർത്താക്കളും പ്രത്യേക പുരസ്കാരങ്ങളും
സീനത് അമൻ, മധൂർ ഭണ്ഡാർക്കർ, ടെറൻസ് ലൂയിസ്, നെഹ ധൂപിയ, സെലിന ജെയ്റ്റ്ലി, സിമ്രൻ, അമാൽ മല്ലിക്, ദൂതീ ചന്ദ്, വർത്തിക സിംഗ് എന്നിവർ അടങ്ങിയ പ്രമുഖ ജഡ്ജിങ് പാനലാണ് വിജയികളെ തെരഞ്ഞെടുത്തത്.
പാസാങ് ഡീകില ഷെർപ്പ (സിക്കിം) – ടൈംസ് മിസ് മൾട്ടിമീഡിയ, പരിനാസ് കൂപ്പർ (ഗുജറാത്ത്) – ബ്യൂട്ടി വിത്ത് എ പർപ്പസ് എന്നിവ ആയിരുന്നു പ്രത്യേക പുരസ്കാരങ്ങൾ. കെട്ടോ പ്ലാറ്റ്ഫോമുമായി സഹകരിച്ച് കുട്ടികളുടെ ചികിത്സക്കും വിദ്യാഭ്യാസത്തിനുമായി ₹66 ലക്ഷംത്തിലധികം സമാഹരിച്ചതും ശ്രദ്ധേയമായി.
സംപ്രേഷണം
ഫെമിന മിസ് ഇന്ത്യ 2026 ഫിനാലെ മെയ് 8 മുതൽ Zee5, Times Play, ബ്യൂട്ടി പേജന്റ്സ് യൂട്യൂബ് ചാനൽ എന്നിവയിൽ സ്ട്രീം ചെയ്യും. Zoom TV-യിൽ ഉച്ചയ്ക്ക് 2 മണിക്കും സംപ്രേഷണം ഉണ്ടാകും.
സൗന്ദര്യത്തോടൊപ്പം ആത്മവിശ്വാസവും ലക്ഷ്യബോധവുമാണ് യഥാർത്ഥ വിജയം എന്ന സത്യം ആണ് ഈ വർഷത്തെ ഫെമിന മിസ് ഇന്ത്യ വേദി തെളിയിച്ചത്.
