ദോഹ: വാഹനങ്ങൾക്കുള്ളിലെ കാർബൺ മോണോക്സൈഡ് വിഷബാധയുടെ അപകടങ്ങളെക്കുറിച്ച് ഡ്രൈവർമാരെ ബോധവൽക്കരിക്കുന്നതിനായി ഖത്തർ ആഭ്യന്തര മന്ത്രാലയം സുരക്ഷാ അവബോധ കാമ്പയിൻ ആരംഭിച്ചു. അപകടങ്ങൾ ഒഴിവാക്കാനും സുരക്ഷിതരാകാനുമായി മന്ത്രാലയം ഡ്രൈവർമാർക്ക് സുപ്രധാന നിർദ്ദേശങ്ങൾ നൽകുന്നുണ്ട്.
അടച്ചിട്ടതോ വായുസഞ്ചാരം കുറഞ്ഞതോ ആയ സ്ഥലങ്ങളിൽ ദീർഘനേരം എഞ്ചിനുകൾ പ്രവർത്തിപ്പിക്കുന്നത് പൂർണ്ണമായും ഒഴിവാക്കുക, കൂടാതെ എക്‌സ്‌ഹോസ്റ്റ് സിസ്റ്റത്തിൽ ചോർച്ചയോ തുരുമ്പോ ഇല്ലെന്ന് ഉറപ്പുവരുത്താൻ പതിവായി പരിശോധന നടത്തുക എന്നിവയെല്ലാം ഈ നിർദ്ദേശങ്ങളിൽ ഉൾപ്പെടുന്നു.
Also Read: പ്രവാസലോകത്ത് ആശങ്ക; അക്കൗണ്ടിങ് മേഖലയിൽ സ്വദേശിവൽക്കരണം ശക്തമാക്കുന്നു
നിറവും മണവും രുചിയുമില്ലാത്ത, ജീവന് ഹാനികരമാകുന്ന വാതകമാണ് കാർബൺ മോണോക്സൈഡ്. ഇന്ധനത്തിന്റെ അപൂർണ്ണമായ ജ്വലനം മൂലമാണ് ഇത് ഉത്പാദിപ്പിക്കപ്പെടുന്നത്, പ്രത്യേകിച്ച് കാർ എഞ്ചിൻ അടച്ചിട്ട സ്ഥലങ്ങളിൽ ദീർഘനേരം പ്രവർത്തിക്കുമ്പോൾ. യാത്രക്കിടെ മയക്കം, തലവേദന, തലകറക്കം, മനംപുരട്ടൽ അല്ലെങ്കിൽ നെഞ്ചുവേദന തുടങ്ങിയ ലക്ഷണങ്ങൾ കണ്ടാൽ ജാഗ്രത പാലിക്കണം.
ഇത്തരം അസ്വസ്ഥതകൾ അനുഭവപ്പെട്ടാൽ, ശുദ്ധവായു ലഭിക്കുന്നുണ്ടെന്ന് ഉറപ്പാക്കാൻ ഉടൻ തന്നെ വിൻഡോകൾ തുറന്നിടണമെന്നും വാഹനത്തിൽ നിന്ന് പുറത്തുകടക്കണമെന്നും ഡ്രൈവർമാരോട് മന്ത്രാലയം കർശനമായി നിർദ്ദേശിച്ചു. അടിയന്തരമായി വൈദ്യസഹായം തേടേണ്ടതിന്റെ പ്രാധാന്യവും അധികൃതർ ഓർമ്മിപ്പിക്കുന്നു.
The post ഡ്രൈവർമാർക്ക് സുരക്ഷാ മുന്നറിയിപ്പ്; കാർബൺ മോണോക്സൈഡ് വിഷബാധ തടയാൻ ക്യാമ്പയിൻ appeared first on Express Kerala.
