ദക്ഷിണാഫ്രിക്കക്കെതിരായ രണ്ടാം ക്രിക്കറ്റ് ടെസ്റ്റിലും ഇന്ത്യ പരാജയ ഭീഷണിയിലാണ്. ആദ്യ ടെസ്റ്റിലെ തോൽവിക്ക് പിന്നാലെ, ഈ മത്സരം സമനിലയിൽ അവസാനിച്ചാൽ പോലും ദക്ഷിണാഫ്രിക്കയ്ക്ക് പരമ്പര സ്വന്തമാക്കാനാകും എന്ന നിലയിലാണ് കാര്യങ്ങൾ. ഈ ദയനീയ പ്രകടനത്തിന്റെ പശ്ചാത്തലത്തിൽ, ടീം ഇന്ത്യയുടെ കോച്ച് ഗൗതം ഗംഭീറിനെതിരെ മുൻ താരങ്ങളുടെയും ആരാധകരുടെയും വിമർശനം കൂടുതൽ മൂർച്ഛിച്ചു വരികയാണ്. പലരും ഗംഭീറിനെ കോച്ച് സ്ഥാനത്ത് നിന്ന് മാറ്റണമെന്ന ആവശ്യവുമായി രംഗത്തെത്തിയിട്ടുണ്ട്.
രവി ശാസ്ത്രിയുടെ രൂക്ഷ വിമർശനം
പ്രധാനമായും, മുൻ കോച്ച് രവി ശാസ്ത്രിയാണ് ടീം സെലക്ഷനെക്കുറിച്ച് രൂക്ഷ വിമർശനവുമായി രംഗത്തെത്തിയത്. സ്പെഷ്യലിസ്റ്റ് ബാറ്റർമാർക്കും ബൗളർമാർക്കും പകരം ഓൾറൗണ്ടർമാരെ അമിതമായി ആശ്രയിക്കുന്ന ഗംഭീറിന്റെ ശൈലിയാണ് ഇന്ത്യയെ ഈ ദയനീയ അവസ്ഥയിൽ എത്തിച്ചതെന്ന് ശാസ്ത്രി തുറന്നടിച്ചു.
ദക്ഷിണാഫ്രിക്കക്കെതിരായ ടെസ്റ്റ് പരമ്പരയിൽ ഇന്ത്യ മൂന്ന് സ്പിൻ ഓൾറൗണ്ടർമാരെയും ഒരു പേസ് ഓൾറൗണ്ടറെയും കളിപ്പിച്ചെങ്കിലും, വാഷിംഗ്ടൺ സുന്ദർ മാത്രമാണ് ഭേദപ്പെട്ട പ്രകടനം പുറത്തെടുത്തത്. ഓൾറൗണ്ടർമാരെ കൊണ്ട് ബൗൾ ചെയ്യിക്കുന്നില്ലെങ്കിൽ എന്തിനാണ് അവരെ ടീമിൽ ഉൾപ്പെടുത്തുന്നതെന്നും ശാസ്ത്രി ചോദിച്ചു.
Also Read: ബ്ലാസ്റ്റേഴ്സ് യുവനിര എലൈറ്റ് ലീഗിന് തയ്യാർ; ആദ്യ മത്സരം മുത്തൂറ്റ് അക്കാദമിക്കെതിരെ
ആദ്യ ടെസ്റ്റിലെ ഞെട്ടിക്കുന്ന തോൽവി
ദക്ഷിണാഫ്രിക്കക്കെതിരായ ആദ്യ ടെസ്റ്റിൽ 124 റൺസ് വിജയലക്ഷ്യം പിന്തുടർന്ന ഇന്ത്യ, വെറും 93 റൺസിന് ഓൾ ഔട്ടായി 30 റൺസിന്റെ ഞെട്ടിക്കുന്ന തോൽവി വഴങ്ങിയിരുന്നു. ആ മത്സരത്തിൽ അക്സർ പട്ടേൽ, രവീന്ദ്ര ജഡേജ, കുൽദീപ് യാദവ്, വാഷിംഗ്ടൺ സുന്ദർ എന്നിങ്ങനെ നാല് സ്പിന്നർമാരെയാണ് ഇന്ത്യ പ്ലേയിംഗ് ഇലവനിൽ ഉൾപ്പെടുത്തിയത്.
രണ്ടാം ടെസ്റ്റിലെ പ്ലേയിംഗ് ഇലവൻ
ഗുവാഹത്തിയിൽ നടക്കുന്ന രണ്ടാം ടെസ്റ്റിൽ രണ്ട് സ്പെഷ്യലിസ്റ്റ് പേസർമാരെയും മൂന്ന് സ്പിന്നർമാരെയും പ്ലേയിംഗ് ഇലവനിൽ ഉൾപ്പെടുത്തിയപ്പോൾ, പേസ് ഓൾറൗണ്ടറായി നിതീഷ് കുമാർ റെഡ്ഡിയും കളിച്ചു. എന്നാൽ ദക്ഷിണാഫ്രിക്കൻ ഇന്നിംഗ്സിൽ വെറും ആറ് ഓവർ മാത്രമാണ് നിതീഷ് കുമാർ റെഡ്ഡി പന്തെറിഞ്ഞത്. ബാറ്റിംഗിൽ 10 റൺസെടുത്ത് താരം നിരാശപ്പെടുത്തുകയും ചെയ്തു.
The post വിമർശനം കൊടുമുടിയിൽ! ഗംഭീർ പുറത്താകുമോ? തുറന്നടിച്ച് രവി ശാസ്ത്രി appeared first on Express Kerala.
