ന്യൂഡൽഹി: ഇന്ത്യൻ സിനിമാലോകത്തെ പിടിച്ചു കുലുക്കാൻ പോകുന്ന വമ്പൻ പ്രോജക്റ്റുകളാണ് 2026 മുതൽ 2027 വരെ തുടർച്ചയായി റിലീസിനൊരുങ്ങുന്നത്. ഷാരൂഖ് ഖാൻ, രൺബീർ കപൂർ, അല്ലു അർജുൻ, യാഷ്, ജൂനിയർ എൻ.ടി.ആർ, പ്രഭാസ് തുടങ്ങിയ താരരാജാക്കന്മാരും എസ്.എസ്. രാജമൗലിയെ പോലുള്ള പ്രമുഖ സംവിധായകരും അണിനിരക്കുന്ന ഏഴ് ബിഗ് ബജറ്റ് ചിത്രങ്ങളാണ് പ്രേക്ഷകർക്കായി കാത്തിരിക്കുന്നത്.
വരാനിരിക്കുന്ന പ്രധാന പ്രോജക്റ്റുകൾ
വാരണാസി (Varanasi – 2027) എസ്.എസ്. രാജമൗലി സംവിധാനം ചെയ്യുന്ന ഈ ടൈം ട്രാവൽ ചിത്രമാണ് ആകാംക്ഷയോടെ കാത്തിരിക്കുന്ന ഒന്നാം നമ്പർ പ്രോജക്റ്റ്. മഹേഷ് ബാബു, പ്രിയങ്ക ചോപ്ര, പൃഥ്വിരാജ് എന്നിവർ പ്രധാന വേഷങ്ങളിൽ എത്തുന്നു. ഹൈദരാബാദിൽ നടന്ന ചടങ്ങിൽ ചിത്രത്തിന്റെ പേരും ഫസ്റ്റ് ലുക്ക് പോസ്റ്ററും ടീസറും പുറത്തിറങ്ങിയത് ആരാധകരെ ആവേശത്തിലാക്കി.
AA22XA6 ‘പുഷ്പ 2’ന്റെ വൻ വിജയത്തിന് ശേഷം അല്ലു അർജുൻ നായകനാകുന്ന ഈ ചിത്രം സംവിധാനം ചെയ്യുന്നത് ആറ്റ്‌ലിയാണ്. ദീപിക പദുക്കോൺ നായികയാകുന്ന ചിത്രത്തിൽ അല്ലു അർജുൻ മൂന്ന് വ്യത്യസ്ത വേഷങ്ങളിലെത്തുമെന്നാണ് റിപ്പോർട്ടുകൾ. ഏകദേശം 600 കോടി രൂപ ബജറ്റ് പ്രതീക്ഷിക്കുന്ന ഈ ചിത്രം വലിയ ശ്രദ്ധ ആകർഷിച്ചിരുന്നു.
കിംഗ് (King – 2026) ഷാരൂഖ് ഖാന്റെ പിറന്നാൾ ദിനത്തിൽ പ്രഖ്യാപിക്കപ്പെട്ട ഈ ആക്ഷൻ ത്രില്ലറിൽ അദ്ദേഹത്തിന്റെ മകൾ സുഹാന ഖാനും ആദ്യമായി സ്ക്രീൻ പങ്കിടുന്നു. അഭിഷേക് ബച്ചൻ, ദീപിക പദുക്കോൺ എന്നിവരും ചിത്രത്തിലെ പ്രധാന അഭിനേതാക്കളാണ്.
രാമായണം (Ramayana – 2026) നിതേഷ് തിവാരി സംവിധാനം ചെയ്യുന്ന ഈ പുരാണ ചിത്രം ഇന്ത്യൻ സിനിമാലോകം ആകാംഷയോടെ കാത്തിരിക്കുന്ന ഒന്നാണ്. രൺബീർ കപൂർ (രാമൻ), യഷ് (രാവണൻ), സായ് പല്ലവി (സീത), സണ്ണി ഡിയോൾ (ഹനുമാൻ), രവി ദുബെ (ലക്ഷ്മണൻ) എന്നിവർ പ്രധാന വേഷങ്ങളിൽ എത്തുന്നു.
ഡ്രാഗൺ (Dragon – 2026) ‘കെ.ജി.എഫ്.’ സംവിധായകൻ പ്രശാന്ത് നീൽ ഒരുക്കുന്ന ജൂനിയർ എൻ.ടി.ആർ. ചിത്രം ‘ഡ്രാഗൺ’ (താൽക്കാലിക പേര്) 2026-ൽ തിയേറ്ററുകളിൽ എത്തുമെന്നാണ് റിപ്പോർട്ടുകൾ.
ടോക്സിക് എ ഫെയറി ടെയിൽ ഫോർ ഗ്രോൺ-അപ്‌സ് (Toxic – 2026) ‘കെ.ജി.എഫ്.’ ചിത്രങ്ങളുടെ വിജയത്തിനുശേഷം യാഷ് നായകനാകുന്ന പാൻ-ഇന്ത്യ റിലീസാണ് ‘ടോക്സിക്’.
സ്പിരിറ്റ് (Spirit – 2026) ‘ആനിമൽ’ സിനിമയുടെ സംവിധായകൻ സന്ദീപ് റെഡ്ഡി വംഗയുടെ പുതിയ ചിത്രമാണ് ‘സ്പിരിറ്റ്’. പ്രഭാസ് നായകനാകുന്ന ഈ ഹൈ-ക്വാളിറ്റി ആക്ഷൻ ചിത്രം 2026-ൽ റിലീസിന് പദ്ധതിയിട്ടിരിക്കുന്നു.
ഈ ഏഴ് വമ്പൻ പ്രോജക്റ്റുകൾ ഇന്ത്യൻ സിനിമാ ചരിത്രത്തിലെ ഏറ്റവും ശ്രദ്ധേയമായ റിലീസ് സീസണിനാണ് വഴിയൊരുക്കുക.
The post ബോളിവുഡ് വിറയ്ക്കും: ഷാരൂഖ്, രൺബീർ, രാജമൗലി… 2026-27-ൽ തിയേറ്ററുകൾ കീഴടക്കാൻ 7 വമ്പൻ ചിത്രങ്ങൾ appeared first on Express Kerala.
