2025 അവസാനിക്കാൻ ദിവസങ്ങൾ മാത്രം ബാക്കിനിൽക്കെ, ഈ വർഷം ഇന്ത്യൻ സിനിമയ്ക്ക് ലഭിച്ച സ്വീകാര്യതയുടെ കണക്കുകൾ പുറത്തുവരുന്നു. മലയാള സിനിമയ്ക്ക് ‘ലോക’ എന്ന ചിത്രം വഴി 300 കോടി ക്ലബ്ബ് എന്ന സുവർണ്ണനേട്ടം സമ്മാനിച്ച വർഷമാണിത്. ഈ അവസരത്തിൽ, ഇന്റർനെറ്റ് സെർച്ച് എഞ്ചിൻ ഭീമനായ ഗൂഗിൾ, 2025-ൽ ഏറ്റവും കൂടുതൽ പേർ തിരഞ്ഞ (ട്രെൻഡിംഗ്) സിനിമകളുടെ പട്ടിക പുറത്തുവിട്ടിരിക്കുകയാണ്. ഈ ദേശീയ പട്ടികയിൽ ഒരേയൊരു മലയാള സിനിമ മാത്രമാണ് ഇടം നേടിയതെന്നത് മോളിവുഡിന് അഭിമാനകരമായി.
പത്ത് സിനിമകളുടെ ദേശീയ ലിസ്റ്റിൽ, ഉണ്ണി മുകുന്ദൻ നായകനായി എത്തിയ ‘മാർക്കോ’ ആണ് ഇടം നേടിയ ഒരേയൊരു മലയാള ചിത്രം. 2024 ഡിസംബറിൽ റിലീസ് ചെയ്ത് 2025-ൽ തരംഗമായ ഈ ചിത്രം, ‘മലയാളത്തിലെ മോസ്റ്റ് വയലൻസ് ഫിലിം’ എന്ന ലേബലോടെയാണ് പ്രേക്ഷകരിലേക്ക് എത്തിയത്. കേരളത്തിന് അകത്തും പുറത്തുമുള്ള പ്രേക്ഷകരുടെ ശ്രദ്ധ ആകർഷിച്ച ചിത്രം, ഗൂഗിളിൽ ഏറ്റവും കൂടുതൽ തിരഞ്ഞ സിനിമകളുടെ കൂട്ടത്തിൽ ആറാം സ്ഥാനത്താണ്.
പ്രമുഖ ട്രാക്കിംഗ് സൈറ്റായ സാക്നിൽക്കിന്റെ റിപ്പോർട്ട് അനുസരിച്ച്, 102.55 കോടി രൂപയാണ് ‘മാർക്കോ’ ആഗോളതലത്തിൽ നേടിയ കളക്ഷൻ. ഹനീഫ് അദേനി രചനയും സംവിധാനവും നിർവഹിച്ച ചിത്രം ക്യൂബ്സ് എന്റർടൈൻമെന്റ്സിന്റെ ബീനറിൽ ഷരീഫ് മുഹമ്മദാണ് നിർമ്മിച്ചത്.
ഇന്ത്യൻ സെർച്ച് എഞ്ചിൻ ട്രെൻഡിംഗിൽ 2025-ൽ ഏറ്റവും കൂടുതൽ പേർ തിരഞ്ഞ സിനിമകളുടെ പൂർണ്ണമായ പട്ടിക താഴെക്കൊടുക്കുന്നു:
സയ്യാര (Saiyyara)
കാന്താര: എ ലെജൻഡ് ചാപ്റ്റർ-1 (Kantara: A Legend Chapter-1)
കൂലി (Coolie)
വാർ 2 (War 2)
സോനം തേരി കസം (Sonam Teri Kasam)
മാർക്കോ (Marco)
ഹൗസ്ഫുൾ 5 (Housefull 5)
ഗെയിം ചേഞ്ചർ (Game Changer)
മിസിസ് (Mrs.)
മഹാവതാർ നരസിംഹ (Mahavtar Narasimha)
മലയാള സിനിമയുടെ വ്യാപ്തിയും സ്വീകാര്യതയും വർധിക്കുന്നതിന്റെ വ്യക്തമായ സൂചനയാണ് ഈ ഗൂഗിൾ ട്രെൻഡിംഗ് പട്ടിക.
The post 2025-ൽ ഗൂഗിളിൽ തീ പടർത്തിയ സിനിമകൾ! ദേശീയ ലിസ്റ്റിൽ ഇടം നേടി ഒരേയൊരു മലയാള ചിത്രം; മോളിവുഡിന് അഭിമാനം! appeared first on Express Kerala.
