പലര്ക്കും മധുരം ഒഴിച്ചുകൂടാനാകാത്തതാണ്. അതില് സ്വാഭാവികതയും അസ്വാഭാവികതയുമുണ്ട്. ചില ഹോര്മോണ് പ്രവര്ത്തനങ്ങളാല് മധുരത്തോട് ക്രേവിങ്ങുള്ളവര്ക്ക് അത് നിയന്ത്രിക്കുകയെന്നത് അത്ര എളുപ്പമാകില്ല.
എന്നാല് ശീലത്തിന്റെ ഭാഗമായി മധുരം തുടരുന്നവരുണ്ട്. ഊണും അത്താഴവുമൊക്കെ കഴിച്ചാല് പതിവായി മധുരമുള്ള എന്തെങ്കിലുമൊന്ന് കഴിക്കാന് താത്പര്യപ്പെടുന്നവരൊക്കെ ഈ ഗണത്തില് വരും.
എന്നാല് വലിയ അളവ് ഭക്ഷണം (പ്രഭാതം-ഉച്ച-രാത്രി എന്നീ നേരങ്ങളിലെ ആഹാരം) കഴിച്ചയുടന് മധുരവും ചേരുമ്പോള് രക്തത്തിലെ പഞ്ചസാരയുടെ അളവ് കൂടുതല് വേഗതയില് ഉയരും.
അതായത് നിങ്ങള് മധുരം കഴിക്കുമ്പോള്, അത് നിങ്ങളുടെ രക്തത്തിലെ പഞ്ചസാരയുടെ പ്രതികരണത്തെ സ്വാധീനിക്കുമെന്നര്ഥം. അതിനാല്, രക്തത്തിലെ പഞ്ചസാരയുടെ അളവ് കൂടാതെ മധുരം കഴിക്കാന് നല്ല സമയം ഏതെന്ന് അറിയാം.
മധുരം പൂര്ണമായി ഒഴിവാക്കാതെ തന്നെ ചെറിയ ക്രമീകരണങ്ങളിലൂടെ രക്തത്തിലെ പഞ്ചസാരയുടെ അളവ് ഒരുപോലെ നിലനിര്ത്താന് സാധിക്കുമെന്ന് ചുരുക്കം.
മധുരം കഴിക്കാന് ഉചിതമായ സമയമേത് ?
നിങ്ങളുടെ ഇഷ്ടപ്പെട്ട മധുരം ഉച്ചയ്ക്ക് ശേഷം കഴിക്കുന്നത്, അത്താഴത്തിന് പിന്നാലെയോ അല്ലെങ്കില് രാത്രി വൈകിയോ ആസ്വദിക്കുന്നതിനേക്കാള്, രക്തത്തിലെ പഞ്ചസാരയുടെ അളവ് കുറയ്ക്കുമെന്ന് പഠനങ്ങള് വ്യക്തമാക്കുന്നു.
ഇതിന് പിന്നിലെ പ്രധാന കാരണം സര്കാഡിയന് റിഥമാണ് – നിങ്ങളുടെ ശരീരത്തിന്റെ ആന്തരിക ഘടികാരമാണത്. ഇന്സുലിന് സംവേദനക്ഷമത സ്വാഭാവികമായും ദിവസത്തിന്റെ തുടക്ക മണിക്കൂറുകളില് കൂടുതലായിരിക്കും.
ദിവസം കഴിയുന്തോറും ഇത് ക്രമേണ കുറയും. അതായത്, നിങ്ങളുടെ ശരീരത്തിന് പകല് സമയത്ത് പഞ്ചസാരയെ കൂടുതല് നന്നായി പ്രോസസ്സ് ചെയ്യാന് കഴിയും. ആരോഗ്യമുള്ള മുതിര്ന്നവരില്, വൈകുന്നേരം ലഘുഭക്ഷണം കഴിക്കുന്നത് ഉച്ചയ്ക്ക് കഴിക്കുന്ന അതേ ആഹാരം കൊണ്ടുള്ളതിനേക്കാള് ഗ്ലൂക്കോസിന്റെ അളവ് വര്ദ്ധിപ്പിക്കും.
ഈ കാരണങ്ങള് കൊണ്ട് അടുത്ത ദിവസം രാവിലെ പ്രഭാത ഭക്ഷണത്തിലും രക്തത്തിലെ പഞ്ചസാരയുടെ അളവ് വര്ദ്ധിക്കാന് സാധ്യതയുണ്ട്. അതായത്, പകല് സമയങ്ങളില് ഭക്ഷണം കഴിച്ചതിന് ശേഷം മധുരം കഴിക്കുമ്പോഴത്തെ, രക്തത്തിലെ പഞ്ചസാരയുടെ പ്രതികരണം താരതമ്യേന കുറവായിരിക്കും.
എങ്ങനെ മധുരം കഴിക്കാം ?
മധുരം എന്തിനോടൊപ്പം കഴിക്കുന്നു എന്നതും അല്ലെങ്കില് അതിനുമുമ്പ് നിങ്ങള് എന്ത് കഴിച്ചിരുന്നു എന്നതും പ്രധാനമാണ്. ഭക്ഷ്യവസ്തുക്കളുടെ ക്രമം രക്തത്തിലെ പഞ്ചസാരയുടെ അളവിനെ കാര്യമായി സ്വാധീനിക്കുമെന്ന് ഗവേഷണങ്ങളില് വ്യക്തമായിട്ടുണ്ട്.
പ്രോട്ടീന്, പച്ചക്കറികള്, ആരോഗ്യകരമായ കൊഴുപ്പുകള് എന്നിവയ്ക്ക് ശേഷം കാര്ബോഹൈഡ്രേറ്റ് അടങ്ങിയ മധുരം കഴിക്കുന്നത്, തനിച്ച് മധുരം കഴിക്കുന്നതിനേക്കാള് നല്ലതാണ്. അത് ഭക്ഷണശേഷം ഗ്ലൂക്കോസിന്റെ അളവ് ഉയരുന്നതിന്റെ തോത് കുറയ്ക്കാന് സഹായിക്കും.
പ്രോട്ടീന്, ഫൈബര്, കൊഴുപ്പ് എന്നിവ ദഹനത്തെ മന്ദഗതിയിലാക്കും. ഇത് ആമാശയത്തില് നിന്ന് ഭക്ഷണം പുറന്തള്ളുന്നതിന്റെ വേഗത കുറയ്ക്കുന്നു. ഗ്ലൂക്കോസിനെ സാവധാനം രക്തപ്രവാഹത്തിലേക്ക് പ്രവേശിക്കാന് അനുവദിക്കുന്നു.
അതിന്റെ ഫലമായി, പെട്ടെന്നുള്ള വര്ദ്ധനവിന് പകരം രക്തത്തിലെ പഞ്ചസാരയുടെ അളവ് ക്രമാനുഗതമായി മാത്രം കൂടുന്നു. അതായത്, മത്സ്യം, ചിക്കന്, ടോഫു, മുട്ട, തൈര് എന്നിവയുള്പ്പെടെയുള്ള പ്രോട്ടീനോടൊപ്പം മധുരം കഴിക്കുന്നത് താരതമ്യേന ഗ്ലൂക്കോസ് നില കുറയ്ക്കുമെന്നര്ഥം.
പച്ചക്കറികളില് നിന്ന് ലഭിക്കുന്ന ഫൈബറിനും നട്സ്, വിത്തുകള്, ഒലിവ് ഓയില്, അവോക്കാഡോ പോലുള്ളവയിലെ ആരോഗ്യകരമായ കൊഴുപ്പുകള്ക്കും ഒപ്പമോ തൊട്ടുപിന്നാലെയോ മധുരം കഴിക്കുമ്പോള് ഗ്ലൂക്കോസ് പതിയെ മാത്രം ഉയരുന്നു.
അതേസമയം ഒഴിഞ്ഞ വയറിലോ അല്ലെങ്കില് ലഘു ഭക്ഷണമായോ മധുരം കഴിക്കുന്നത് ഗ്ലൂക്കോസിന്റെ അളവ് കൂടുതല് വേഗത്തില് ഉയര്ത്തും. പ്രത്യേകിച്ചും ഇന്സുലിന് പ്രതിരോധശേഷിയോ പ്രമേഹമോ ഉള്ള ആളുകളില്.
