സാധാരണയായി അൻപതിനും അറുപതിനും മുകളിലുള്ളവരെ കൂടുതലായി ബാധിക്കുന്ന രോഗമായാണ് പാർക്കിൻസൺസ് കരുതപ്പെട്ടിരുന്നത്. എന്നാൽ അടുത്തകാലത്തെ ക്ലിനിക്കൽ നിരീക്ഷണങ്ങളും ഗവേഷണങ്ങളും സൂചിപ്പിക്കുന്നത്, നാൽപ്പതുകളിൽ എത്തിയവരിലും ഈ രോഗബാധ വർധിച്ചു വരികയാണെന്നാണ്. വാർധക്യത്തിന്റെ ഭാഗമായി മാത്രം നാഡീകോശ നാശത്തെ കാണാതെ, ജനിതക ഘടകങ്ങളും പരിസ്ഥിതി സ്വാധീനങ്ങളും എങ്ങനെ രോഗത്തിന് വഴിവെക്കുന്നു എന്നതിലേക്കാണ് ഇപ്പോൾ വൈദ്യശാസ്ത്രലോകം കൂടുതൽ ശ്രദ്ധ ചെലുത്തുന്നത്. ഇതോടെ രോഗം നേരത്തെ കണ്ടെത്തുന്നതിന്റെയും വ്യക്തിഗത ചികിത്സാ പദ്ധതികൾ തയ്യാറാക്കുന്നതിന്റെയും പ്രാധാന്യം വർധിച്ചിരിക്കുകയാണ്.
പാർക്കിൻസൺസ് രോഗം എന്താണ്?
മസ്തിഷ്കത്തിലെ സബ്സ്റ്റാൻഷ്യ നൈഗ്ര (Substantia Nigra) എന്ന ഭാഗത്തെ നാഡീകോശങ്ങൾ ക്രമേണ നശിക്കാൻ തുടങ്ങുമ്പോഴാണ് പാർക്കിൻസൺസ് രോഗം ഉണ്ടാകുന്നത്. ശരീരത്തിന്റെ സുഗമവും ഏകോപിതവുമായ ചലനങ്ങൾക്ക് നിർണായകമായ ഡോപ്പമിൻ (Dopamine) എന്ന രാസവസ്തു നിർമ്മിക്കുന്നത് ഈ കോശങ്ങളാണ്. ഡോപ്പമിന്റെ അളവ് കുറയുമ്പോൾ വിറയൽ, പേശികൾ മുറുകുക, സന്തുലിതാവസ്ഥ നഷ്ടപ്പെടുക, നടക്കുന്നതിൽ ബുദ്ധിമുട്ട് തുടങ്ങിയ ലക്ഷണങ്ങൾ പ്രകടമാകുന്നു.
ഇതിനൊപ്പം ആൽഫ-സിന്യൂക്ലിൻ (alpha-synuclein) എന്ന പ്രോട്ടീൻ അസാധാരണമായി അടിഞ്ഞുകൂടി തലച്ചോറിലെ കോശങ്ങളെ നശിപ്പിക്കുന്നതും രോഗത്തിന്റെ പ്രധാന ഘടകമാണ്.
രോഗത്തിന്റെ പ്രധാന കാരണങ്ങൾ
പാർക്കിൻസൺസ് ഒരു മാത്രം കാരണത്താൽ ഉണ്ടാകുന്ന രോഗമല്ലെന്നാണ് ആധുനിക പഠനങ്ങൾ വ്യക്തമാക്കുന്നത്. വിവിധ ഘടകങ്ങൾ ചേർന്നാണ് ഇത് രൂപപ്പെടുന്നത്.
ന്യൂറോ ഇൻഫ്ലമേഷൻ: തലച്ചോറിലെ പ്രതിരോധ സംവിധാനം അമിതമായി പ്രവർത്തിച്ച് ആരോഗ്യകരമായ കോശങ്ങളെ നശിപ്പിക്കുന്നു.
മൈറ്റോകോണ്ട്രിയൽ തകരാറുകൾ: കോശങ്ങൾക്ക് ഊർജ്ജം നൽകുന്ന സംവിധാനത്തിലെ തകരാറുകൾ.
ഓക്സിഡേറ്റീവ് സ്ട്രെസ്: ഫ്രീ റാഡിക്കലുകൾ കോശങ്ങളെ നശിപ്പിക്കുന്നു.
ഗട്ട്-ബ്രെയിൻ കണക്ഷൻ: കുടലിലെ ബാക്ടീരിയകളിലെ മാറ്റങ്ങൾ രോഗത്തിന് കാരണമാകാം. ചിലരിൽ രോഗം തലച്ചോറിന് പുറത്താണ് തുടങ്ങുന്നതെന്ന നിഗമനവും ശക്തമാണ്.
പരിസ്ഥിതി ഘടകങ്ങൾ: കീടനാശിനികൾ, ഹെവി മെറ്റലുകൾ, വായുമലിനീകരണം എന്നിവ രോഗസാധ്യത വർധിപ്പിക്കുന്നു.
ജീവിതശൈലി: വ്യായാമക്കുറവ്, ഉറക്കക്കുറവ്, മോശം ഭക്ഷണക്രമം, മാനസിക സമ്മർദ്ദം എന്നിവയും ബാധകമാണ്.
യുവാക്കളിൽ രോഗം കൂടാൻ കാരണം?
50 വയസ്സിന് താഴെയുള്ളവരിൽ ഇപ്പോൾ 5 മുതൽ 20 ശതമാനം വരെ കേസുകൾ റിപ്പോർട്ട് ചെയ്യപ്പെടുന്നു. 30–40 വയസ്സിനിടയിലും രോഗം ആരംഭിക്കുന്നതായി പഠനങ്ങൾ വ്യക്തമാക്കുന്നു.
നേരത്തെയുള്ള രോഗനിർണയം
പാർക്കിൻസൺസിന്റെ വലിയ വെല്ലുവിളി, ഗുരുതരാവസ്ഥയിലെത്തിയ ശേഷമാണ് ലക്ഷണങ്ങൾ വ്യക്തമായി പ്രകടമാകുന്നത് എന്നതാണ്. അതിനാൽ നേരത്തെ കണ്ടെത്താനുള്ള സാങ്കേതിക വിദ്യകൾ വികസിച്ചുവരികയാണ്.
* ആൽഫ-സിന്യൂക്ലിൻ വ്യതിയാനം കണ്ടെത്തുന്ന പരിശോധനകൾ
* രക്തത്തിലെ RNA, പ്രോട്ടീൻ മാർക്കറുകൾ
* MRI, PET സ്കാനുകൾ
* സ്മാർട്ട്ഫോൺ ആപ്പുകൾ, വെയറബിൾ ഉപകരണങ്ങൾ വഴി നടക്കൽ, ശബ്ദം, കൈയക്ഷരം നിരീക്ഷിക്കൽ
മുൻകരുതലും അവബോധവും
പാർക്കിൻസൺസ് ഇന്ന് വയോധികരുടെ മാത്രം രോഗമല്ല. യുവാക്കളിലും ഇത് വർധിക്കുന്ന സാഹചര്യത്തിൽ വിറയൽ, കൈകാലുകളുടെ മുറുക്ക്, ഉറക്ക പ്രശ്നങ്ങൾ, മണം തിരിച്ചറിയുന്നതിലെ കുറവ്, സന്തുലിതാവസ്ഥയിലെ പ്രശ്നങ്ങൾ തുടങ്ങിയ തുടക്കലക്ഷണങ്ങൾ അവഗണിക്കരുത്.
രോഗം നേരത്തെ കണ്ടെത്തുകയും കൃത്യമായ ചികിത്സ ആരംഭിക്കുകയും ചെയ്താൽ ജീവിത നിലവാരം ഗണ്യമായി മെച്ചപ്പെടുത്താൻ കഴിയും. സാങ്കേതിക വിദ്യയുടെയും ഗവേഷണത്തിന്റെയും പിന്തുണയോടെ പാർക്കിൻസൺസിനെ നിയന്ത്രിക്കാനുള്ള പ്രതീക്ഷ ഇന്ന് കൂടുതൽ ശക്തമാണ്.
പാർക്കിൻസൺസ് രോഗം തടയാൻ പഴങ്ങൾ സഹായിക്കുമോ?
പഴങ്ങൾ കൂടുതലായി ഉൾപ്പെടുത്തിയ ഭക്ഷണരീതി രോഗസാധ്യത കുറയ്ക്കാനോ രോഗത്തിന്റെ പുരോഗതി മന്ദഗതിയിലാക്കാനോ സഹായിക്കുമോ എന്നതിനെക്കുറിച്ചുള്ള പഠനങ്ങൾ ഇപ്പോൾ കൂടുതൽ ശ്രദ്ധ നേടുകയാണ്.
ഗവേഷണങ്ങൾ എന്ത് പറയുന്നു?
പഴങ്ങൾ പാർക്കിൻസൺസ് തടയുമെന്നതിന് വ്യക്തമായ ശാസ്ത്രീയ തെളിവുകൾ ഇതുവരെ ലഭ്യമായിട്ടില്ല. നിലവിലെ അറിവിന്റെ ഭൂരിഭാഗവും നിരീക്ഷണ പഠനങ്ങളിലാണ് അടിസ്ഥാനമാക്കുന്നത്.
2012-ൽ അന്നൽസ് ഓഫ് ന്യൂറോളജി ജേണലിൽ പ്രസിദ്ധീകരിച്ച ശിയാങ് ഗാവോയുടെ പഠനത്തിൽ, പഴങ്ങളിൽ അടങ്ങിയിരിക്കുന്ന ഫ്ലേവനോയിഡുകൾ കൂടുതലായി കഴിക്കുന്ന പുരുഷന്മാർക്ക് പാർക്കിൻസൺസ് രോഗസാധ്യത കുറവാണെന്ന് കണ്ടെത്തിയിരുന്നു.
ഫ്ലേവനോയിഡുകൾ പ്രകൃതിദത്ത ആന്റി-ഓക്സിഡന്റുകളും ആന്റി-ഇൻഫ്ലമേറ്ററി ഘടകങ്ങളുമാണ്. മസ്തിഷ്കകോശങ്ങളെ ഓക്സിഡേറ്റീവ് സ്ട്രെസിൽ നിന്ന് സംരക്ഷിക്കാൻ ഇവക്ക് കഴിയും. നാഡികോശങ്ങളുടെ ക്ഷയത്തിൽ പ്രധാന പങ്കുവഹിക്കുന്ന ഘടകങ്ങളിലൊന്നാണ് ഓക്സിഡേറ്റീവ് സ്ട്രെസ്.
മൃഗങ്ങളിൽ നടത്തിയ ചില പഠനങ്ങളും ആന്റി-ഓക്സിഡന്റുകൾ ഡോപ്പമിൻ കോശങ്ങളുടെ നാശം കുറയ്ക്കാൻ സഹായിക്കാമെന്ന് സൂചിപ്പിക്കുന്നു. എന്നിരുന്നാലും, ഇത് മനുഷ്യരിൽ വ്യക്തമായി തെളിയിക്കപ്പെട്ടിട്ടില്ല.
Also Read: മധുരം കഴിക്കാനും അതിന്റേതായ സമയമുണ്ട് ദാസാ…! ; നല്ല ടൈം എതെന്ന് അറിയാം
സൈഫി ആശുപത്രിയിലെ ന്യൂറോളജിസ്റ്റ് ഡോ. അർജുൻ ഷാ പറയുന്നത്, “പഴങ്ങൾ പാർക്കിൻസൺസ് രോഗം തടയും എന്ന് ഉറപ്പിച്ച് പറയാൻ ഇപ്പോൾ കഴിയില്ല. ഇതുവരെ മനുഷ്യരിൽ നടന്ന യാതൊരു റാൻഡമൈസ്ഡ് ട്രയലും ഇത് തെളിയിച്ചിട്ടില്ല. തെളിവുകൾ പ്രതീക്ഷ നൽകുന്നതാണെങ്കിലും, അവ ഇപ്പോഴും പ്രാഥമിക ഘട്ടത്തിലാണ്” എന്നാണ്.
മസ്തിഷ്കാരോഗ്യത്തിന് ഗുണകരമായ പഴങ്ങൾ
ഇന്ത്യയിൽ എളുപ്പത്തിൽ ലഭ്യമായ ചില പഴങ്ങൾ ഫ്ലേവനോയിഡുകളും ആന്റി-ഓക്സിഡന്റുകളും ധാരാളം അടങ്ങിയവയാണ്.
നെല്ലിക്ക (Amla): വിറ്റാമിൻ C സമൃദ്ധം; നാഡീകോശ സംരക്ഷണത്തിന് സഹായകരമാകാം
ഞാവൽപ്പഴം (Jamun): ഓക്സിഡേറ്റീവ് സ്ട്രെസ് കുറയ്ക്കുന്ന ആന്തോസയാനിനുകൾ അടങ്ങിയിരിക്കുന്നു
പേരയ്ക്ക (Guava): ഫ്ലാവനോയിഡുകളും പ്രതിരോധശേഷി വർധിപ്പിക്കുന്ന ഘടകങ്ങളും ധാരാളം
പപ്പായ (Papaya): ആന്റി-ഓക്സിഡന്റുകളും ആന്റി-ഇൻഫ്ലമേറ്ററി എൻസൈമുകളും
മാതളനാരങ്ങ (Pomegranate): മസ്തിഷ്കകോശ സംരക്ഷണത്തിന് സഹായിക്കുന്ന പോളിഫീനോളുകൾ
ഡോ. ഷാ പറയുന്നത്, “പഴങ്ങൾ ആരോഗ്യകരമായ ഭക്ഷണത്തിന്റെ ഭാഗമാക്കുന്നത് നല്ലതാണ്. എന്നാൽ അത് പാർക്കിൻസൺസ് രോഗത്തിന് ചികിത്സയോ പ്രതിരോധമോ ആയി കാണരുത്” എന്നാണ്.
