- ‘പ്ലാസ്റ്റിക് മലിനീകരണം പരാജയപ്പെടുത്തുക’ എന്നതാണ് ഈ വര്‍ഷത്തെ ലോക പരിസ്ഥിതി ദിന പ്രമേയം. പ്ലാസ്റ്റിക് മാലിന്യങ്ങള്‍ നമ്മുടെ ആവാസവ്യവസ്ഥയെയും മനുഷ്യരെയും ജന്തുജാലങ്ങളെയും പ്രതികൂലമായി ബാധിക്കുന്നുവെന്ന അവബോധം സൃഷ്ടിക്കാനാണ് ഈ മുദ്രാവാക്യം.
- പ്ലാസ്റ്റിക് മാലിന്യങ്ങള്‍ മനുഷ്യരാശിക്കും പ്രകൃതിക്കും ജന്തുജാലങ്ങള്‍ക്കും ഗുരുതര ഭീഷണി സൃഷ്ടിക്കുന്നു. സമുദ്രങ്ങളിലും, പര്‍വതശിഖരങ്ങളിലും എന്തിനേറെ മനുഷ്യരുടെയും മൃഗങ്ങളുടെയും ശരീരത്തിലടക്കം മൈക്രോ പ്ലാസ്റ്റിക് അടിഞ്ഞുകൂടുകയാണ്.
- യുഎന്‍ഇപി യുടെ കണക്കനുസരിച്ച് ലോകത്താകമാനമുള്ള പ്ലാസ്റ്റിക് ഉത്പാദനം 430 ദശലക്ഷം ടണ്ണിലേറെയാണ്. പ്ലാസ്റ്റിക്കിനെ ആശ്രയിക്കുന്നത് പരമാവധി കുറയ്ക്കാനും സുസ്ഥിരമായ ബദല്‍ മാര്‍ഗങ്ങള്‍ സ്വീകരിക്കാനും നാം ശ്രദ്ധിക്കേണ്ടതുണ്ട്.
- വ്യവസായ ശാലകള്‍ പുറന്തള്ളുന്ന രാസമാലിന്യങ്ങള്‍ നമ്മുടെ ജലാശയങ്ങളെ വിഷമയമാക്കുന്നു. വ്യവസായ ശാലകള്‍ പുറന്തള്ളുന്ന വിഷപ്പുകയും അനധികൃത തീയിടലും ശുദ്ധവായു സാധ്യതയെ അട്ടിമറിച്ചിരിക്കുന്നു.
- രാസഘടകങ്ങള്‍ അമിതമായി ശരീരത്തിലെത്തുന്നത് ക്യാന്‍സര്‍ ഉള്‍പ്പടെ മാരകമായ രോഗങ്ങള്‍ക്ക് കാരണമാകും. വാഹനപ്പെരുപ്പവും വനനശീകരണവും ഉള്‍പ്പടെയുള്ള കാരണങ്ങളാല്‍ വര്‍ഷം ചെല്ലുന്തോറും നമ്മുടെ താപനിലയില്‍ ഗണ്യമായ വര്‍ധനവ് അനുഭവപ്പെടുന്നു.
- ആഗോള താപനത്തോത് വര്‍ധിക്കുന്നത് ആശങ്കാജനകമാണ്. സമുദ്രനിരപ്പുയരുന്നതും മഞ്ഞുമലകള്‍ ഉരുകുന്നതും വരും നാളുകളിലേക്കുള്ള ചില ആപത് സൂചനകളുമാണ്. കുന്നിടിക്കലും അനധികൃത നിര്‍മ്മാണവും മൂലം ഉരുള്‍പൊട്ടല്‍, മണ്ണിടിച്ചില്‍ പോലുള്ള ദുരന്തങ്ങളുണ്ടാകുന്നു.
- വയലുകളും പാടങ്ങളും നദികളും കയ്യേറുന്നത് പ്രളയത്തെ ക്ഷണിച്ചുവരുത്തലാണ്. വനനശീകരണവും കയ്യേറ്റവും വന്യജീവികളുടെ ആവാസ വ്യവസ്ഥ തകിടം മറിക്കുന്നു. ഇതോടെ അവ ജനവാസ കേന്ദ്രങ്ങളില്‍ വിഹരിക്കുന്നു.
- അപൂര്‍വ ജന്തുജാലങ്ങള്‍ ഇല്ലാതാവുന്നത് പാരിസ്ഥിതിക സന്തുലനം നഷ്ടപ്പെടുത്തുന്നു. ഇത് ഇങ്ങനെ തുടര്‍ന്നാല്‍, ഭാവി തലമുറകള്‍ക്ക് ശുദ്ധവായു, ശുദ്ധജലം, സുരക്ഷിതമായ ആവാസ വ്യവസ്ഥ എന്നിവ ലഭിക്കാത്ത സാഹചര്യമാണുണ്ടാവുക.
- ഗ്രേറ്റ തുന്‍ബര്‍ഗിനെ പോലെയുള്ളവരെ മാതൃകയാക്കാം. പരിസ്ഥിതി സംരക്ഷണം മുന്‍നിര്‍ത്തി ഗ്രേറ്റ ഉയര്‍ത്തിയ ആശയാദര്‍ശങ്ങള്‍ക്ക് മൂര്‍ച്ച കൂട്ടാം. അങ്ങനെ മരങ്ങള്‍ നട്ടും ജല സ്രോതസ്സുകള്‍ സംരക്ഷിച്ചും പ്ലാസ്റ്റിക്കിനോട് നോ പറഞ്ഞുമെല്ലാം പോരാട്ടനിരതരാകാം.
