മുംബൈ: വിമാനത്തില് യാത്ര ചെയ്യുമ്പോള് പലര്ക്കും വിമ്മിഷ്ടം അനുഭവപ്പെടാറുണ്ട്. മോഷന് സിക്നസ്, അഥവാ, ശരീരം കുലുങ്ങുന്നത് മൂലമുള്ള അസ്വസ്ഥതകള്. ശരീരം ചലനം തിരിച്ചറിയുന്നു എന്നാല് കണ്ണുകള് സ്ക്രീന് അല്ലെങ്കില് പുസ്തകം പോലുള്ള എന്തിലെങ്കിലും കേന്ദ്രീകരിക്കപ്പെടുന്നു. ഈ പൊരുത്തക്കേട് തലച്ചോറിനെ ആശയക്കുഴപ്പത്തിലാക്കുന്നു, അത് ഓക്കാനം, വിയര്ക്കല്, തലകറക്കം തുടങ്ങിയ അസ്വസ്ഥതകളിലേക്ക് നയിക്കുന്നു.
അസ്വസ്ഥതകള്ക്കുള്ള പരിഹാരം
ചിലരില് ഈ അവസ്ഥ അല്പ്പം അധികമായി കാണപ്പെടാറുണ്ട്. ചിലരില് ജനിതകമായി തന്നെ ചലന രോഗം ഉണ്ടാകാം. എന്നാല്, വിദഗ്ധരുടെ അഭിപ്രായത്തില്, വിമാന യാത്രയില് അനുഭവപ്പെടുന്ന ഈ ശാരീരിക അസ്വസ്ഥതകളെ നേരിടാന് വഴികളുണ്ട്. ശരിയായ സീറ്റ് തെരഞ്ഞെടുക്കുകയെന്നതാണ് അതില് പ്രധാനം.
ഏറ്റവും ‘നല്ല സീറ്റ്’
ഏറ്റവും സുഖകരമായ യാത്ര സാധ്യമാകുന്നത് വിമാനത്തിന്റെ ചിറകിന് അടുത്തുള്ള വിന്ഡോ സീറ്റിലാണ്. അതിനാല് അസ്വസ്ഥതകള് ഒഴിവാക്കാന് ആഗ്രഹിക്കുന്നുവെങ്കില് ആ സീറ്റ് ബുക്ക് ചെയ്യാന് ശ്രദ്ധിക്കുക. അവിടെ ഇരിക്കുമ്പോള് വിമാനത്തിന്റെ കുലുക്കം വളരെ കുറച്ച് മാത്രമേ നിങ്ങള്ക്ക് അനുഭവപ്പെടുകയുള്ളൂ.
ഏറ്റവും ‘മോശം സീറ്റ്’
മുന്ഭാഗത്തെ അപേക്ഷിച്ച് വിമാനത്തിന്റെ പിന്ഭാഗത്ത് കുലുക്കം കൂടുതലായിരിക്കും. പ്രത്യേകിച്ച് അവസാനത്തെ വരികളില്. മോഷന് സിക്നസ് ഉള്ളവര് ഈ സീറ്റുകളില് ഇരുന്നാല് അത് ശാരീരിക പ്രയാസങ്ങള്ക്ക് കാരണമാകും. നടുഭാഗത്തെ സീറ്റുകളില്, പിന്ഭാഗത്തെ അപേക്ഷിച്ച് താരതമ്യേന കുലുക്കം കുറവായിരിക്കുമെങ്കിലും ചെറിയ തോതിലെങ്കിലും അസ്വസ്ഥതകള് അനുഭവപ്പെടാം.
