പലവിധ പോഷക ഘടകങ്ങളാല് സമ്പന്നമാണ് പഴങ്ങള്. വിറ്റാമിനുകള്, മിനറല്സുകള്, ഫൈബര്, ആന്റി ഓക്സിഡന്റുകള്, പൊട്ടാസ്യം തുടങ്ങിയവയുടെ കലവറയാണ് അവ. കൂടാതെ ഉന്മേഷവും ഊര്ജവും നല്കുന്നതില് പഴങ്ങള്ക്ക് മികച്ച പങ്കുണ്ട്.
അതുകൊണ്ടുതന്നെ ഉറക്കം ഉണര്ന്നയുടന് വെറും വയറ്റില് പഴങ്ങള് കഴിക്കുന്ന ശീലം പലര്ക്കുമുണ്ട്. ഇത് ശരിയായ രീതിയാണോ എന്നതില് പലര്ക്കും സംശയമുണ്ടുതാനും.
അസ്വസ്ഥതകള് ഉണ്ടാക്കിയേക്കാം
‘വെറും വയറ്റില് പഴങ്ങള് കഴിക്കുന്നത് പലരിലും അസിഡിറ്റി, ഷുഗര് കൂടുക, ദഹന പ്രശ്നങ്ങള് എന്നിവയ്ക്ക് കാരണമാകാറുണ്ട്. ചിലരില് വയര് വീര്ത്ത് വരാം, ഗ്യാസ് ശല്യം, മലബന്ധം, ഛര്ദ്ദി എന്നിവയ്ക്കും കാരണമായേക്കാം.
ഗ്യാസ്-അസിഡിറ്റി പ്രശ്നങ്ങള് ഉള്ളവരാണെങ്കില് വെറും വയറ്റില് പഴങ്ങള് കഴിക്കുന്നത് ഒഴിവാക്കേണ്ടതാണ്. നിര്ബന്ധമാണെങ്കില് ഒരു ഡയറ്റീഷ്യനെ കണ്ട ശേഷമേ ഇത്തരമൊരു രീതി അവലംബിക്കാവൂ.
പ്രമേഹ രോഗികള് രാവിലെ വെറും വയറ്റില് പഴങ്ങള് കഴിക്കുന്നത് നിര്ബന്ധമായും ഒഴിവാക്കണം’ – വോഖാര്ഡ് ആശുപത്രിയിലെ സീനിയര് ഡയറ്റീഷ്യന് റിയ ദേശായി പറയുന്നു.
വെറും വയറിനെ അസ്വസ്ഥപ്പെടുത്തുന്നതാകയാല് ആദ്യ ഭക്ഷണമായി പഴങ്ങള് ഉള്പ്പെടുത്തുന്നത് ഒഴിവാക്കണമെന്നാണ് റിയ ദേശായി ചൂണ്ടിക്കാട്ടുന്നത്. നിരന്തരം ഡീഹൈഡ്രേഷന് അനുഭവപ്പെടുന്നവരാണെങ്കില് തണ്ണിമത്തന്, പീച്ച്, പൈനാപ്പിള്, ഓറഞ്ച് എന്നിവ ഭക്ഷണത്തിന്റെ ഭാഗമാക്കേണ്ടതുണ്ട്.
വേറിട്ട നിറങ്ങളിലുള്ള പഴങ്ങളില് വ്യത്യസ്ത ആന്റി ഓക്സിഡന്റുകളാണുള്ളത്.
അതിനാല് ആപ്പിള്, പഴം, കിവി, ഡ്രാഗണ് ഫ്രൂട്ട്സ്, മാതളം, പ്ലം, പേരയ്ക്ക, ചെറി, അവക്കാഡോ, ചിക്കു, സീതപ്പഴം തുടങ്ങിയവ ഭക്ഷണത്തില് ഉള്പ്പെടുത്തണം.
അങ്ങനെ വരുമ്പോള് വിവിധ രോഗങ്ങളില് നിന്ന് ശരീരത്തെ രക്ഷിക്കാന് നിങ്ങളുടെ പ്രതിരോധ സംവിധാനത്തെ അത് ശക്തിപ്പെടുത്തും. പഴങ്ങള് കഴിക്കുന്നത് ശീലമാക്കുന്നത് ശരീരത്തിന് അത്രമേല് ഗുണകരമാണ്.
അത് ഊര്ജം പ്രദാനം ചെയ്യുകയും പ്രമേഹം നിയന്ത്രിക്കുകയും ഹൃദയ പ്രശ്നങ്ങള് കുറയ്ക്കുകയും ചെയ്യും. ദഹന പ്രക്രിയ കൂടുതല് സുഗമമാക്കുകയും ചെയ്യും.
ഭക്ഷണങ്ങളോടൊപ്പം പഴങ്ങള് കഴിക്കാമോ ?
രാവിലെയും ഉച്ചയ്ക്കും വൈകുന്നേരവും രാത്രിയിലുമാണ് സാധാരണ സമയ ക്രമീകരണം പാലിച്ച് ആളുകള് ഭക്ഷണം കഴിക്കാറ്. ഈ സമയങ്ങളിലെ ഭക്ഷണങ്ങള്ക്കൊപ്പം പഴവര്ഗങ്ങളും ഉള്പ്പെടുത്തുന്നവരുണ്ട്. എന്നാല് ഇത് ദഹന പ്രശ്നങ്ങള്ക്കും രക്തത്തിലെ പഞ്ചസാരയളവ് വര്ധിക്കാനും കാരണമായേക്കാം.
ഫ്രൂട്ട്സ് = ഫില്ലേര്സ് – ഇതാണ് ഏറ്റവും ഉചിതം
രണ്ട് ഭക്ഷണങ്ങളുടെ ഇടവേളയില് ഫില്ലറായി പഴവര്ഗങ്ങള് കഴിക്കുന്നതാണ് ഏറ്റവും ഉചിതം. അതായത് ബ്രേക്ക് ഫാസ്റ്റിനും ലഞ്ചിനും ഇടയില് കഴിക്കാം. ലഞ്ചിനും വൈകുന്നേരത്തെ സ്നാക്സിനും ഇടയില് കഴിക്കാം. അല്ലെങ്കില് വൈകുന്നേരത്തെ ഭക്ഷണത്തിനും ഡിന്നറിനും ഇടയിലും ആ രീതി അവലംബിക്കാം.
ശരീര പ്രകൃതി വ്യത്യസ്തം
ഓരോരുത്തരുടെയും ശരീര പ്രകൃതി വ്യത്യസ്തമാണ്. രാവിലെ ഉണര്ന്ന് എഴുന്നേറ്റയുടന് പഴങ്ങള് കഴിക്കുന്നത് വയറിന് അസ്വസ്ഥതയൊന്നും ഉണ്ടാക്കുന്നില്ലെങ്കില് അതുകൊണ്ട് കുഴപ്പമില്ല.
അതായത് ആ ശീലം നിങ്ങള്ക്ക് ഊര്ജവും ഉന്മേഷവുമൊക്കെ പ്രദാനം ചെയ്യുന്നുണ്ടെങ്കിലും മറ്റ് രോഗങ്ങള് അലട്ടുന്നില്ലെങ്കിലും അത്തരക്കാര്ക്ക് ആ ശീലം തുടരാവുന്നതാണെന്ന് അര്ഥം.
എന്നാല് ഏതെങ്കിലും ഘട്ടത്തില് അത് ബുദ്ധിമുട്ടുകള് സൃഷ്ടിക്കുന്നുണ്ടെങ്കില് ആ രീതി സ്വീകരിക്കുന്നത് സംബന്ധിച്ച് ഒരു ഡയറ്റീഷ്യനെ കണ്ട് വിദഗ്ധ ഉപദേശം തേടേണ്ടത് അനിവാര്യമാണ്.
കിവി പഴത്തിന്റെ ആരോഗ്യ ഗുണങ്ങള്
കിവി പഴത്തില് വിവിധയിനം വൈറ്റമിനുകള് അടങ്ങിയിട്ടുണ്ട്. ഫൈബര് സമ്പന്നമായതിനാല് ദഹന പ്രക്രിയയ്ക്ക് ഇത് കരുത്തേകും. ആന്റിഓക്സിഡന്റുകളുടെ കലവറയായതിനാലും നല്ല കൊഴുപ്പിന്റെ സാന്നിധ്യമുള്ളതിനാലും ഏറെ ആരോഗ്യ ഗുണങ്ങള് സമ്മാനിക്കുന്ന പഴമാണിത്.
രക്ത സമ്മര്ദ്ദം നിയന്ത്രിക്കാന് കിവി പഴം സഹായിക്കും. ഇതിലൂടെ സ്ട്രോക്ക്, ഹൃദ്രോഗ സാധ്യത എന്നിവ കുറയ്ക്കാനും കിവിയിലെ പോഷക ഘടകങ്ങള് സഹായിക്കും. മെഗ്നീഷ്യം, പൊട്ടാസ്യം, കോപ്പര് എന്നിവ വലിയ അളവില് കിവിയിലുണ്ട്.
ആരോഗ്യകരമായ കൊളാജന് ഉത്പാദനത്തിന് സഹായിക്കുന്നതാണ് കോപ്പര്. വിറ്റാമിന് എ, വിറ്റാമിന് സി, വിറ്റാമിന് ഇ, വിറ്റാമിന് കെ എന്നീ പോഷക ഘടകങ്ങളും ഈ പഴത്തില് അടങ്ങിയിട്ടുണ്ട്.
വിറ്റാമിന് സിയുടെ സാന്നിധ്യം രോഗ പ്രതിരോധ ശേഷി മെച്ചപ്പെടുത്തുന്നതാണ്. കിവിയിലെ ന്യൂട്രിയന്റുകള് ആഴമേറിയ ഉറക്കം പ്രദാനം ചെയ്യും. കിവി ഒമേഗ 3 ഫാറ്റി ആസിഡുകളുടെ ഉറവിടവുമാണ്.
ആരോഗ്യകരമായ കൊഴുപ്പുകള് ഹൃദയാരോഗ്യം മെച്ചപ്പെടുത്തും. കൂടാതെ ഇതില് ആല്ഫ ലിനോലെനിക് ആസിഡ് അടങ്ങിയിട്ടുമുണ്ട്. പോളിഫെനോള്സ് എന്നറിയപ്പെടുന്ന ആന്റിഓക്സിഡന്റ് ഇതില് ധാരാളമുണ്ട്.
