വനിതാ ടി20 ക്രിക്കറ്റ് ചരിത്രത്തിൽ പുതിയ റെക്കോർഡ് കുറിച്ചിരിക്കുകയാണ് ഇന്ത്യയുടെ സ്പിൻ മാന്ത്രിക ദീപ്തി ശർമ. ശ്രീലങ്കയ്ക്കെതിരായ മൂന്നാം ടി20യിൽ മൂന്ന് വിക്കറ്റുകൾ വീഴ്ത്തിയതോടെ ദീപ്തി ടി20 കരിയറിൽ 151 വിക്കറ്റുകൾ എന്ന നാഴികക്കല്ല് പിന്നിട്ടു. ഇതോടെ ലോക ക്രിക്കറ്റിൽ ഏറ്റവും കൂടുതൽ വിക്കറ്റുകൾ നേടുന്ന താരമെന്ന പദവി ഓസീസ് പേസർ മേഗൻ ഷട്ടിനൊപ്പം പങ്കിടാനും ദീപ്തിക്കായി. ഐസിസി ടി20 റാങ്കിംഗിലെ ഒന്നാം നമ്പർ ബൗളറായ ദീപ്തി 130 മത്സരങ്ങളിൽ നിന്നാണ് ഈ നേട്ടത്തിലെത്തിയത്. പരമ്പരയിൽ ഇനിയും മത്സരങ്ങൾ ബാക്കിയുള്ളതിനാൽ വൈകാതെ തന്നെ മേഗൻ ഷട്ടിനെ പിന്നിലാക്കി ദീപ്തിക്ക് ഏകപക്ഷീയമായി ഒന്നാം സ്ഥാനത്തെത്താനാകും.
തിരുവനന്തപുരം ഗ്രീൻഫീൽഡ് സ്റ്റേഡിയത്തിൽ നടന്ന മത്സരത്തിൽ ടോസ് നഷ്ടപ്പെട്ട് ബാറ്റിംഗിനിറങ്ങിയ ശ്രീലങ്കയെ ഇന്ത്യൻ ബൗളർമാർ വരിഞ്ഞുമുറുക്കുകയായിരുന്നു. നിശ്ചിത 20 ഓവറിൽ ഏഴ് വിക്കറ്റ് നഷ്ടത്തിൽ 112 റൺസ് മാത്രമാണ് ലങ്കയ്ക്ക് നേടാനായത്. ദീപ്തിക്കൊപ്പം നാല് വിക്കറ്റുകൾ വീഴ്ത്തിയ രേണുക സിംഗും തിളങ്ങിയതോടെ ലങ്കൻ നിര തകരുകയായിരുന്നു. ശ്രീലങ്കയ്ക്ക് വേണ്ടി ഇമേഷ ദുലാനി (27), ഹസിനി പെരേര (25), കവിഷ ദിൽഹാരി (20) എന്നിവർ മാത്രമാണ് അൽപ്പമെങ്കിലും ചെറുത്തുനിന്നത്.
Also Read: വിജയ് ഹസാരെ ട്രോഫി! ഗുജറാത്തിനെ വീഴ്ത്തി ഡൽഹി; വിരാട് കോഹ്ലിക്കും റിഷഭ് പന്തിനും അർധസെഞ്ച്വറി
രണ്ട് പ്രധാന മാറ്റങ്ങളുമായാണ് ഇന്ത്യ ഈ മത്സരത്തിന് ഇറങ്ങിയത്. സ്നേഹ് റാണ, അരുന്ധതി റെഡ്ഡി എന്നിവർക്ക് വിശ്രമം അനുവദിച്ചപ്പോൾ പകരം ടീമിലെത്തിയ ദീപ്തി ശർമയും രേണുക സിംഗും തങ്ങൾക്ക് ലഭിച്ച അവസരം ഗംഭീരമായി വിനിയോഗിച്ചു. അഞ്ച് മത്സരങ്ങളുള്ള പരമ്പരയിൽ നിലവിൽ 2-0ത്തിന് മുന്നിലുള്ള ഇന്ത്യക്ക് ഇന്നത്തെ മത്സരത്തിൽ വിജയിക്കാനായാൽ പരമ്പര സ്വന്തമാക്കാം.
The post ദീപ്തി മാജിക്! ശ്രീലങ്കയെ കറക്കി വീഴ്ത്തി റെക്കോർഡ് ബുക്കിലേക്ക്; ലോകം ഒന്നാം നമ്പർ ബൗളറെന്ന് വിളിക്കുന്നത് വെറുതെയല്ല appeared first on Express Kerala.
