സി.പി.എമ്മിൽ ചേരുന്നതിനായി ദുബായിൽ വെച്ച് ചർച്ചകൾ നടത്തിയെന്ന വാർത്തകൾ പൂർണ്ണമായും തള്ളിക്കൊണ്ട് ശശി തരൂർ എം.പി രംഗത്തെത്തി. ഇത്തരം വാർത്തകൾ മാധ്യമങ്ങൾ സൃഷ്ടിക്കുന്നതാണെന്നും ഇതിൽ യാതൊരു വാസ്തവമില്ലെന്നും ഡൽഹിയിൽ തിരിച്ചെത്തിയ അദ്ദേഹം വ്യക്തമാക്കി. “നിങ്ങളുടെ ആഹാരത്തിന് വേണ്ടി നിങ്ങൾ സൃഷ്ടിക്കുന്ന വാർത്തകളാണിത്” എന്ന് മാധ്യമങ്ങളോട് പറഞ്ഞ അദ്ദേഹം, തനിക്ക് എന്തെങ്കിലും പറയാനുണ്ടെങ്കിൽ അത് പാർട്ടി നേതൃത്വത്തോട് നേരിട്ട് പറയുമെന്നും വ്യക്തമാക്കി. ഇന്നലെ നടന്ന കോൺഗ്രസ് പാർലമെന്ററി നയരൂപീകരണ യോഗത്തിൽ പങ്കെടുക്കാതിരുന്നത് താൻ ഡൽഹിയിൽ ഇല്ലാത്തതുകൊണ്ടാണെന്നും തരൂർ കൂട്ടിച്ചേർത്തു.
മഹാപഞ്ചായത്തിൽ രാഹുൽ ഗാന്ധി തനിക്ക് കൈ നൽകാൻ മടിച്ചതിനെത്തുടർന്ന് തരൂർ അതൃപ്തിയിലാണെന്നും, തുടർന്ന് അദ്ദേഹത്തെ ഇടത് പാളയത്തിലെത്തിക്കാൻ മുഖ്യമന്ത്രിയുമായി അടുത്ത ബന്ധമുള്ള പ്രവാസി വ്യവസായി ഇടനിലക്കാരനായി ചർച്ചകൾ നടത്തുന്നുവെന്നുമായിരുന്നു റിപ്പോർട്ടുകൾ. എന്നാൽ നിലവിൽ ഇത്തരം പ്രതികരണങ്ങൾക്കുള്ള സമയമല്ലെന്നും ഉചിതമായ സമയത്ത് സംസാരിക്കാമെന്നുമാണ് തരൂരിന്റെ നിലപാട്. നാളെ രാഹുൽ ഗാന്ധിയുമായി നിശ്ചയിച്ചിട്ടുള്ള ചർച്ചയിൽ തരൂർ പങ്കെടുക്കുമോ എന്ന കാര്യത്തിൽ ഇതുവരെ ഔദ്യോഗിക സ്ഥിരീകരണമായിട്ടില്ല. കോൺഗ്രസ് നേതൃത്വവുമായി നിലനിൽക്കുന്ന അസ്വാരസ്യങ്ങൾക്കിടയിലും പാർട്ടിക്കുള്ളിൽ തന്നെ ഉറച്ചുനിൽക്കുമെന്ന സൂചനയാണ് തരൂർ ഇപ്പോൾ നൽകുന്നത്.
The post പറയാനുള്ളത് പാർട്ടി നേതൃത്വത്തോട് പറയും: ശശി തരൂർ appeared first on Express Kerala.
