തിരുവനന്തപുരം: 23 വയസ്സില് താഴെയുള്ളവര്ക്കായുള്ള സി.കെ. നായിഡു ട്രോഫിയില് ഗോവയ്ക്കെതിരെ കേരളത്തിന് 84 റണ്സിന്റെ ഒന്നാം ഇന്നിങ്സ് ലീഡ്. കേരളത്തിന്റെ ഒന്നാം ഇന്നിങ്സ് സ്കോറായ 255-നെതിരെ ബാറ്റിങ്ങിനിറങ്ങിയ ഗോവ 171 റണ്സിന് ഓള്ഔട്ടായി. അഞ്ച് വിക്കറ്റ് നേടിയ ഷോണ് റോജറുടെ തകര്പ്പന് പ്രകടനമാണ് കേരളത്തിന് കരുത്തായത്. ഇന്നലെ കളി നിര്ത്തുമ്പോള് കേരളം രണ്ടാം ഇന്നിങ്സില് രണ്ട് വിക്കറ്റ് നഷ്ടത്തില് 37 റണ്സെടുത്തിട്ടുണ്ട്. ഇതോടെ കേരളത്തിന്റെ ലീഡ് 121 ആയി ഉയര്ന്നു.
വിക്കറ്റ് നഷ്ടമില്ലാതെ 15 റണ്സ് എന്ന നിലയില് രണ്ടാം ദിവസം കളി തുടങ്ങിയ ഗോവയ്ക്ക് തുടക്കത്തില് തന്നെ തിരിച്ചടിയേറ്റു. തുടര്ന്നങ്ങോട്ട് കൂട്ടതകര്ച്ച നേരിട്ട ഗോവ എട്ടിന് 116 എന്ന നിലയിലായി. തുടര്ന്ന് ചിഗിരുപതി വെങ്കടയും സമര്ഥും ചേര്ന്ന ഒന്പതാം വിക്കറ്റ് കൂട്ടുകെട്ട് ടീം ടോട്ടല് 150 കടത്തി. വെങ്കട 31 റണ്സെടുത്തു; സമര്ഥ് 16 റണ്സോടെ പുറത്താകാതെ നിന്നു. അവസാന രണ്ട് വിക്കറ്റുകള് കൂടി വീഴ്ത്തി ജെ.എസ്. അനുരാജാണ് ഗോവന് ഇന്നിങ്സ് അവസാനിപ്പിച്ചത്. അനുരാജിന്റെ ആകെ വിക്കറ്റ് നേട്ടം മൂന്ന് ആണ്.
രണ്ടാം ഇന്നിങ്സ് ആരംഭിച്ച കേരളത്തിന് ഓപ്പണര്മാരായ എസ്.എസ്. അക്ഷയ് (10), അഭിഷേക് ജെ. നായര് (രണ്ട്) എന്നിവരെ നഷ്ടമായി. വരുണ് നായനാരും(18) കൈലാസ് ബി നായരും(രണ്ട്) ആണ് ക്രീസില്.
