കേരളത്തിൽ എസ് എസ് എൽ സി, പ്ളസ് ടു കൂടാതെ വിവിധ വാർഷിക പരീക്ഷകൾ അടുത്തെത്തുന്ന ഈ സമയം വിദ്യാർത്ഥികൾക്കും മാതാപിതാക്കൾക്കും ഒരുപോലെ നിർണായകമായ ഘട്ടമാണ്. ഈ പരീക്ഷകൾ ഒരു ക്ലാസിൽ നിന്ന് മറ്റൊന്നിലേക്കുള്ള മുന്നേറ്റം മാത്രമല്ല, ഭാവിയിലെ പഠനദിശയും അവസരങ്ങളും നിർണ്ണയിക്കുന്ന പ്രധാന മൈൽസ്റ്റോണുകളാണ്. അതുകൊണ്ട് തന്നെ അവസാന നിമിഷ തിരക്കുകളേക്കാൾ, ക്രമബദ്ധവും മാനസികവുമായ തയ്യാറെടുപ്പും ഇപ്പോൾ ഏറെ ആവശ്യമാണ്. ശരിയായ സമയക്രമം, സ്ഥിരമായ ആവർത്തനം, വിഷയ സംബന്ധിയായ പഠനം എന്നിവ വിദ്യാർത്ഥികളെ ആത്മവിശ്വാസത്തോടെ പരീക്ഷയെ നേരിടാൻ സഹായിക്കും.
അതേസമയം, പരീക്ഷയെ ഭയത്തോടെയോ സമ്മർദ്ദത്തോടെയോ കാണാതെ, മുന്നോട്ടുള്ള യാത്രയുടെ തയ്യാറെടുപ്പായി കാണുന്നതാണ് ഏറ്റവും ആരോഗ്യകരമായ സമീപനം. മതിയായ ഉറക്കം, ആരോഗ്യകരമായ ജീവിതശൈലി, കുടുംബത്തിന്റെ പ്രോത്സാഹനം എന്നിവയും പഠനത്തിനുതന്നെ തുല്യപ്രാധാന്യമുള്ള ഘടകങ്ങളാണ്. ഈ സമയത്ത് ശരിയായ മാർഗ്ഗനിർദ്ദേശവും പിന്തുണയും ലഭിക്കുമ്പോൾ, വിദ്യാർത്ഥികൾക്ക് പരീക്ഷയെ ഒരു വെല്ലുവിളിയായി അല്ല, സ്വന്തം കഴിവുകൾ തെളിയിക്കാനുള്ള അവസരമായി മാറ്റാൻ കഴിയും.
പരീക്ഷകൾ ഉയർത്തുന്ന ആശങ്കയും ആത്മവിശ്വാസ കുറവും
പരീക്ഷകൾ വിദ്യാർത്ഥികളുടെ ജീവിതത്തിൽ അനിവാര്യമായ ഒരു ഘട്ടമാണ്. എന്നാൽ ഇന്ന് പരീക്ഷകൾ അറിവ് വിലയിരുത്താനുള്ള ഒരു രീതിയായി മാത്രം നിൽക്കാതെ, പലർക്കും മാനസിക സമ്മർദ്ദത്തിന്റെ പ്രധാന കാരണമായി മാറുകയാണ്. ഉയർന്ന മാർക്ക് നേടണം, മത്സരത്തിൽ മുന്നിലെത്തണം, കുടുംബത്തിന്റെയും സമൂഹത്തിന്റെയും പ്രതീക്ഷകൾ നിറവേറ്റണം എന്ന ചിന്തകൾ കുട്ടികളിൽ ആശങ്കയും ആത്മവിശ്വാസക്കുറവും സൃഷ്ടിക്കുന്നു. പരീക്ഷയെ ജീവിതവിജയത്തിൻ്റെ ഏക മാനദണ്ഡമായി കാണുന്ന സമീപനം മാറ്റി, അത് പഠനയാത്രയിലെ സ്വാഭാവിക ഘട്ടമായി കാണാൻ വിദ്യാർത്ഥികളും മാതാപിതാക്കളും ഒരുപോലെ പഠിക്കേണ്ടതാണ്.
വിദ്യാർത്ഥികളിൽ സമ്മർദ്ദം ഉണ്ടാകുന്ന പ്രധാന കാരണങ്ങൾ
പരീക്ഷാസമയത്ത് വിദ്യാർത്ഥികൾ പലവിധ മാനസിക സമ്മർദ്ദങ്ങൾ നേരിടുന്നു. പഠിച്ചതെല്ലാം ഓർമ്മയിൽ നിൽക്കുമോ എന്ന ആശങ്ക, സമയം മതിയാകില്ലെന്ന ഭയം, മറ്റുള്ളവരുമായി താരതമ്യം ചെയ്യപ്പെടുന്നത്, ഉറക്കക്കുറവ്, പരാജയത്തെക്കുറിച്ചുള്ള പേടി എന്നിവ ഇവരിൽ മാനസിക സമ്മർദ്ദം വർധിപ്പിക്കുന്നു. ഈ സമ്മർദ്ദം പഠനക്ഷമതയെ തന്നെ ബാധിക്കുകയും, പഠിച്ചതിനെ ശരിയായി പ്രകടിപ്പിക്കാൻ കഴിയാത്ത സാഹചര്യം ഉണ്ടാക്കുകയും ചെയ്യുന്നു.
ഫലപ്രദമായ പഠനം: കൂടുതൽ സമയം അല്ല, ശരിയായ രീതിയാണ് പ്രധാന്യം
പരീക്ഷയിൽ വിജയിക്കാൻ നീണ്ട സമയം പുസ്തകത്തിനു മുൻപിൽ ഇരിക്കുന്നത് മാത്രമല്ല; പഠനത്തിന്റെ ഗുണമേന്മയാണ് നിർണായകം. ക്രമബദ്ധമായ പഠനക്രമം തയ്യാറാക്കുക, ചെറിയ ഇടവേളകളോടെ വിഷയ സംബന്ധിയായി പഠിക്കുക, പഠിച്ചതിനെ ആവർത്തിച്ച് മനസ്സിലാക്കുക, മതിയായ ഉറക്കം ഉറപ്പാക്കുക, ആരോഗ്യകരമായ ഭക്ഷണവും ചെറിയ വ്യായമങ്ങളും മെഡിറ്റേഷനുകളും ജീവിത രീതിയിൽ ഉൾപ്പെടുത്തുക ഇവയൊക്കെയാണ് പഠനം ഫലപ്രദമാക്കുന്ന പ്രധാന ഘടകങ്ങൾ. ശരിയായ രീതിയിൽ പഠിക്കുമ്പോൾ സമ്മർദ്ദം കുറയുകയും ആത്മവിശ്വാസം വർധിക്കുകയും ചെയ്യും.
മാതാപിതാക്കളുടെ സമീപനം കുട്ടികളുടെ ആത്മവിശ്വാസത്തെ നിർണയിക്കുന്നു
പരീക്ഷാസമയത്ത് കുട്ടികൾക്ക് ഏറ്റവും കൂടുതൽ ആവശ്യമുള്ളത് പിന്തുണയും മനസ്സിലാക്കലുമാണ്. എന്നാൽ പലപ്പോഴും മാതാപിതാക്കൾ ഇത് അറിയാതെയാണ് സമ്മർദ്ദം വർധിപ്പിക്കുന്നത്. മറ്റു കുട്ടികളുമായി താരതമ്യം ചെയ്യൽ, മാർക്കിനെ മാത്രം വിജയമായി കണക്കാക്കൽ, നിരന്തരം പഠിക്കാൻ നിർബന്ധിക്കൽ തുടങ്ങിയ സമീപനങ്ങൾ കുട്ടികളുടെ ആത്മവിശ്വാസം കുറയ്ക്കുന്നു. പകരം അവരുടെ പരിശ്രമത്തെ അഭിനന്ദിക്കുക, ശാന്തമായ പഠനാന്തരീക്ഷം ഒരുക്കുക, ആശങ്കകൾ ശ്രദ്ധിച്ച് കേൾക്കുക, ഇടവേളകൾ അനുവദിക്കുക എന്നിവയാണ് മാതാപിതാക്കൾ സ്വീകരിക്കേണ്ട സമീപനങ്ങൾ. ഒരു പ്രോത്സാഹന വാക്ക് പോലും കുട്ടിക്ക് വലിയ ആത്മവിശ്വാസം നൽകാൻ കഴിയും.
മാനസിക സന്തുലിതാവസ്ഥ നിലനിർത്തേണ്ടത് അത്യാവശ്യമാണ്
പരീക്ഷാസമയത്ത് പഠനത്തോടൊപ്പം മനസ്സിനും വിശ്രമം നൽകേണ്ടത് വളരെ പ്രധാനമാണ്. ദിവസവും കുറച്ച് മിനിറ്റ് ആഴത്തിലുള്ള ബ്രീത്തിങ് ചെയ്യുക, ഇടയ്ക്കിടെ ചെറിയ നടത്തം, ചെറിയ വിനോദങ്ങൾ എന്നിവയിൽ ഏർപ്പെടുക, മൊബൈൽ ഉപയോഗം നിയന്ത്രിക്കുക, പോസിറ്റീവ് ചിന്തകൾ വളർത്തുക എന്നിവ മാനസിക സമ്മർദ്ദം കുറയ്ക്കാൻ സഹായിക്കും. ശാന്തമായ മനസ്സ് പഠനത്തെ കൂടുതൽ ഫലപ്രദമാക്കും.
പരീക്ഷകൾ ഭയപ്പെടേണ്ട ഒന്നല്ല; അവ വിദ്യാർത്ഥിയുടെ വളർച്ചയിലേക്കുള്ള ഒരു പടിയാണ്. മാർക്ക് ജീവിതത്തിന്റെ അവസാന ലക്ഷ്യമല്ല, പഠനത്തിലൂടെ ലഭിക്കുന്ന ആത്മവിശ്വാസവും അറിവും അനുഭവവുമാണ് യഥാർത്ഥ നേട്ടം. വിദ്യാർത്ഥികളുടെ ആത്മവിശ്വാസവും മാതാപിതാക്കളുടെ പിന്തുണയും ചേർന്നാൽ പരീക്ഷാസമയത്തെ സമ്മർദ്ദം ആത്മവിശ്വാസത്തിലേക്കും വിജയത്തിലേക്കും മാറ്റാൻ സാധിക്കും.
