ബ്രസീലിയൻ ഫുട്ബോൾ താരം ഫിലിപ്പ് കുട്ടീഞ്ഞോ തന്റെ ബാല്യകാല ക്ലബായ വാസ്കോഡ ഗാമയിൽ നിന്നും അപ്രതീക്ഷിതമായി പടിയിറങ്ങുന്നു. ആരാധകരുടെ കടുത്ത സമ്മർദ്ദവും മാനസികമായ തളർച്ചയുമാണ് ഈ തീരുമാനത്തിന് പിന്നിലെന്ന് താരം വ്യക്തമാക്കി. യൂറോപ്പിലെ തിളക്കമാർന്ന കരിയറിന് ശേഷം 2024-25 സീസണിലാണ് 33-കാരനായ കുട്ടീഞ്ഞോ ഫ്രീ ഏജന്റായി തന്റെ പഴയ തട്ടകത്തിലേക്ക് തിരിച്ചെത്തിയത്. ജൂണിൽ അവസാനിക്കേണ്ട കരാർ മാസങ്ങൾക്ക് മുമ്പേ അവസാനിപ്പിച്ചാണ് താരം ക്ലബ് വിടുന്നത്. ഈ സീസണിൽ വാസ്കോയ്ക്ക് വേണ്ടി ഏഴ് മത്സരങ്ങളിൽ നിന്ന് മൂന്ന് ഗോളുകളും ഒരു അസിസ്റ്റും കുട്ടീഞ്ഞോ സ്വന്തമാക്കിയിരുന്നു.
ക്ലബ് ആരാധകരിൽ നിന്നുള്ള തുടർച്ചയായ വിമർശനങ്ങളും പരിഹാസങ്ങളുമാണ് തന്നെ ഈ തീരുമാനത്തിലേക്ക് നയിച്ചതെന്ന് കുട്ടീഞ്ഞോ ഇൻസ്റ്റാഗ്രാമിലൂടെ പങ്കുവെച്ച കുറിപ്പിൽ പറയുന്നു. “വാസ്കോ എന്നും എന്റെ ഹൃദയത്തോട് ചേർന്നുനിൽക്കുന്ന ക്ലബാണ്. തിരിച്ചു വരുമ്പോൾ കൂടുതൽ സന്തോഷത്തോടെ പന്ത് തട്ടാമെന്നാണ് കരുതിയത്, എന്നാൽ വലിയ സമ്മർദ്ദങ്ങളിലേക്കും കുറ്റപ്പെടുത്തലുകളിലേക്കുമാണ് ഞാൻ എറിയപ്പെട്ടത്,” എന്ന് അദ്ദേഹം വേദനയോടെ കുറിച്ചു. ലിവർപൂൾ, ബാഴ്സലോണ തുടങ്ങിയ വമ്പൻ ക്ലബുകളുടെ മുൻ താരമായ കുട്ടീഞ്ഞോ, തന്റെ ഭാവി പദ്ധതികളെക്കുറിച്ച് നിലവിൽ സൂചനകളൊന്നും നൽകിയിട്ടില്ല.
The post ആരാധകരുടെ കൂവിവിളികൾ തളർത്തി; പ്രിയ ക്ലബ് വിട്ട് കുട്ടീഞ്ഞോ appeared first on Express Kerala.
