ടി20 ലോകകപ്പ് സൂപ്പർ എട്ടിൽ ആരാധകർ ആകാംക്ഷയോടെ കാത്തിരുന്ന പാകിസ്ഥാൻ – ന്യൂസിലൻഡ് മത്സരം മഴയെത്തുടർന്ന് ഉപേക്ഷിച്ചു. കൊളംബോയിലെ ആർ. പ്രേമദാസ സ്റ്റേഡിയത്തിൽ ടോസ് നേടിയ പാകിസ്ഥാൻ നായകൻ സൽമാൻ അഗ ബാറ്റിംഗ് തിരഞ്ഞെടുത്തതിന് പിന്നാലെ ശക്തമായ മഴയെത്തുകയായിരുന്നു. ഒരു പന്ത് പോലും എറിയാൻ സാധിക്കാതെ വന്നതോടെ ഇരു ടീമുകളും ഓരോ പോയിന്റ് വീതം പങ്കിട്ടു. സൂപ്പർ എട്ട് ഗ്രൂപ്പ് രണ്ടിൽ ഇംഗ്ലണ്ട്, ശ്രീലങ്ക എന്നിവരാണ് ഈ ഗ്രൂപ്പിലെ മറ്റ് ടീമുകൾ.
നിർണ്ണായകമായ ഈ മത്സരത്തിനായി പാകിസ്ഥാൻ ഒരു മാറ്റവുമായാണ് എത്തിയത്. ഖവാജ നഫായ്ക്ക് പകരം ഫഖർ സമാൻ ടീമിൽ തിരിച്ചെത്തി. മറുഭാഗത്ത് ന്യൂസിലൻഡ് ടീമിൽ മൂന്ന് പ്രധാന മാറ്റങ്ങൾ വരുത്തിയിരുന്നു. നായകൻ മിച്ചൽ സാന്റ്നർ, ഇഷ് സോധി, ലോക്കി ഫെർഗൂസൺ എന്നിവർ ടീമിലേക്ക് മടങ്ങിയെത്തിയപ്പോൾ കോൾ മക്കോഞ്ചി, കെയ്ൽ ജാമിസൺ, ജേക്കബ് ഡഫി എന്നിവർക്ക് സ്ഥാനം നഷ്ടമായി. മഴ പ്രവചനമുണ്ടായിരുന്നെങ്കിലും മത്സരം പൂർത്തിയാക്കാൻ സാധിക്കുമെന്ന പ്രതീക്ഷയിലായിരുന്നു ആരാധകർ.
Also Read: ബ്ലാസ്റ്റേഴ്സ് – ജിസിഡിഎ തർക്കം തീർന്നു; കൊച്ചിയിൽ നാളെ പന്ത് ഉരുളും
ഗ്രൂപ്പ് ഘട്ടത്തിൽ ഓരോ തോൽവി നേരിട്ടാണ് ഇരു ടീമുകളും സൂപ്പർ എട്ടിലേക്ക് എത്തിയത്. പാകിസ്ഥാൻ ഇന്ത്യയോടും ന്യൂസിലൻഡ് ദക്ഷിണാഫ്രിക്കയോടും പരാജയപ്പെട്ടിരുന്നു. മത്സരം ഉപേക്ഷിച്ചതോടെ ലഭിച്ച ഓരോ പോയിന്റ് സെമി ഫൈനൽ സാധ്യതകളിൽ നിർണ്ണായകമാകും. വരും മത്സരങ്ങളിൽ ഇംഗ്ലണ്ടിനോടും ശ്രീലങ്കയോടും മികച്ച വിജയം നേടിയാൽ മാത്രമേ ഇരു ടീമുകൾക്കും സെമി പ്രതീക്ഷകൾ സജീവമായി നിലനിർത്താൻ സാധിക്കൂ.
The post കൊളംബോയിൽ മഴക്കളി; പാകിസ്ഥാൻ – ന്യൂസിലൻഡ് പോരാട്ടം ഉപേക്ഷിച്ചു, പോയിന്റ് പങ്കിട്ടു appeared first on Express Kerala.
