കനത്ത ചൂടുമൂലം ശരീര താപനില ക്രമാതീതമായി ഉയരുകയും നിര്ജലീകരണം, ലവണാംശം നഷ്ടപ്പെടല് എന്നിവ മൂലം അവയവങ്ങളുടെ പ്രവര്ത്തനം തകരാറിലാവുകയും ചെയ്യുന്ന അവസ്ഥയാണ് താപാഘാതം (Heat Stroke).
തലകറക്കം, ബോധക്ഷയം, വിയര്പ്പ് നിലയ്ക്കുക, ചര്മ്മം ചുവന്നുതുടുക്കുക, ഓക്കാനം തുടങ്ങിയവ താപാഘാതത്തിന്റെ പ്രധാന ലക്ഷണങ്ങളാണ്. ഇത്തരം സാഹചര്യങ്ങളില് ഉടന് തന്നെ തണലത്തേക്ക് മാറി ശരീര താപനില കുറയ്ക്കുകയും വൈദ്യസഹായം തേടുകയും വേണം.
Heat Stroke-ന്റെ ലക്ഷണങ്ങള്
താപാഘാതമുണ്ടായാല് ശരീര താപനില 104°F ന് മുകളില് പോകാനിടയുണ്ട് (High Temperature Alert). അതായത് പനി പോലെ ശരീരം കഠിനമായി ചൂടാകും. തീവ്രമായ ക്ഷീണവും പേശി വലിച്ചിലും അനുഭവപ്പെടും.
ഇതിന് പുറമെ, അസഹ്യമായ തലവേദന, തലകറക്കം. ഓക്കാനം, ഛര്ദ്ദി, ചര്മ്മം വരണ്ട് ചുവക്കുക, കനത്ത ചൂടിലും വിയര്പ്പ് നിലയ്ക്കുക, ശ്വാസമെടുക്കാന് ബുദ്ധിമുട്ടുക, നാഡിമിടിപ്പിന്റെ വേഗത വര്ധിക്കുക, മാനസികാവസ്ഥയില് വ്യതിയാനങ്ങള് ഉണ്ടാവുക, അബോധാവസ്ഥയിലാവുക തുടങ്ങിയവയുമുണ്ടാകാം.
ആശയക്കുഴപ്പം, സംസാരത്തില് വ്യക്തത കുറയുക, അപസ്മാരം ഉണ്ടാവുക എന്നിവയും താപാഘാതം നേരിടുന്ന വ്യക്തികളില് കണ്ടുവരാറുണ്ട്.
Heat Sroke-നുള്ള പ്രഥമ ശുശ്രൂഷ
താപാഘാതമേറ്റ വ്യക്തിയെ ഉടന് തണലത്തേക്കോ എയര്കണ്ടീഷന് ചെയ്ത മുറിയിലേക്കോ മാറ്റണം.തണുത്ത വെള്ളം കൊണ്ട് ശരീരം നനയ്ക്കുകയോ, നനഞ്ഞ തുണി പുതപ്പിക്കുകയോ ചെയ്യണം. ബോധമുണ്ടെങ്കില് വെള്ളം കുടിക്കാന് നല്കണം.
ഫാന് ഉപയോഗിച്ച് കാറ്റ് കൊള്ളിക്കുന്നതും നല്ലതാണ്. ശേഷം ആശുപത്രിയില് എത്തിക്കുക. ബോധക്ഷയമുണ്ടായിട്ടുണ്ടെങ്കില് പ്രാഥമിക ശുശ്രൂഷ നല്കിക്കൊണ്ടുതന്നെ ഒട്ടും വൈകാതെ അടുത്തുള്ള ആശുപത്രിയില് എത്തിക്കാന് ശ്രമിക്കണം.
താപാഘാതവും അവയവങ്ങളും
താപാഘാതത്തെ തുടര്ന്ന് രക്തപ്രവാഹത്തില് തടസങ്ങളുണ്ടായി ഹൃദയാഘാതം അനുഭവപ്പെടാം. ഹൃദയപേശികള്ക്ക് ക്ഷതമുണ്ടായി തെര്മല് കാര്ഡിയോമയോപ്പതിയില് കലാശിച്ച് ഹൃദയസ്തംഭനവും ഉണ്ടാകാം. സ്ഥിതി ഗുരുതരമാണെങ്കില് മസ്തിഷ്കാഘാതത്തിനും സാധ്യതയുണ്ട്.
താപാഘാതം ബ്രെയിനില് ഉണ്ടാക്കുന്ന പ്രത്യാഘാതങ്ങള് തലവേദന, ആശയക്കുഴപ്പം, അസാധാരണ പെരുമാറ്റം, തലകറക്കം, അബോധാവസ്ഥ എന്നിവയ്ക്ക് ഇടയാക്കുന്നു.
കരളിലെ എന്സൈമുകളുടെ അളവുകൂട്ടി പ്രസ്തുത അവയവത്തിന്റെ പ്രവര്ത്തനം താളം തെറ്റിക്കാനുമിടയുണ്ട്. നിര്ജലീകരണം, റാബ്ഡോമയോലിസിസ് എന്നിവ വരുത്തുന്നതിലൂടെ താപാഘാതം വൃക്കകളുടെ പ്രവര്ത്തനവും സ്തംഭിപ്പിക്കാം.
Heat Stroke: പ്രതിരോധ മാര്ഗങ്ങള്
ശരീരത്തില് ജലാംശം ഉറപ്പുവരുത്തണം. ധാരാളം വെള്ളം കുടിക്കുകയും ജലാംശം കൂടുതലുള്ള പഴവര്ഗങ്ങള് കഴിക്കുകയും വേണം. കഞ്ഞിവെള്ളം, നാരങ്ങാവെള്ളം, കരിക്കിന്വെള്ളം, ഒആര്എസ് എന്നിവ കുടിക്കുന്നതും ക്ഷീണമകറ്റി ശരീരം ഹൈഡ്രേറ്റഡ് ആയി തുടരാന് സഹായിക്കും.
കഫീന്, ആല്ക്കഹോള് എന്നിവ അടങ്ങിയ പാനീയങ്ങള് ഒഴിവാക്കാനും ശ്രദ്ധിക്കണം. രാവിലെ 11 മുതല് ഉച്ചകഴിഞ്ഞ് 3 മണി വരെയുള്ള വെയില് നേരിട്ട് കൊള്ളുന്നത് ഒഴിവാക്കുക. തൊഴിലാളികളും കര്ഷകരും ഇതനുസരിച്ച് ജോലി സമയം ക്രമീകരിക്കണം.
കട്ടി കുറഞ്ഞതും ഇളം നിറത്തിലുമുള്ള കോട്ടണ് വസ്ത്രങ്ങള് ധരിക്കാന് ശ്രദ്ധിക്കണം. ഇത് അയഞ്ഞതുമായിരിക്കണം. പുറത്തിറങ്ങുമ്പോള് സണ്സ്ക്രീന്, തൊപ്പി, കുട, സണ്ഗ്ലാസ് എന്നിവ ഉപയോഗിക്കുകയും കുപ്പിവള്ളം കയ്യില് കരുതുകയും വേണം.
ക്ലാസിക് ഹീറ്റ് സ്ട്രോക്ക് (Classic Heat Stroke)
പ്രായമേറിയവരും, പ്രമേഹം, ഉയര്ന്ന രക്തസമ്മര്ദം എന്നീ അസുഖങ്ങളുളളവരുമായ വ്യക്തികളിലാണ് ഹീറ്റ് സ്ട്രോക്ക് കൂടുതലായി കണ്ടുവരുന്നത്. ഇവര് ഉപയോഗിക്കുന്ന മരുന്നും നിര്ണായകമാണ്.
ശരീരത്തിലെ ചൂട് പുറത്തുകളയാനുള്ള സംവിധാനം ഇവരില് ശരിയായി പ്രവര്ത്തിച്ചെന്നുവരില്ല. ചര്മ്മം വരണ്ടിരിക്കുകയും ചെയ്യും. വീട്ടിനകത്തായിരുന്നാലും ഉഷ്ണതരംഗത്തിനിടെ ഇവര്ക്ക് താപാഘാതം സംഭവിക്കാന് ഇടയുണ്ട്.
എക്സേര്ഷണല് ഹീറ്റ് സ്ട്രോക്ക് (Exertional Heat Stroke)
വെയില് നേരിട്ട് കുറേ നേരം ശരീരത്തില് തട്ടുന്നവരില് അനുഭവപ്പെടുന്ന അവസ്ഥയാണിത്. തൊഴിലാളികള്, കര്ഷകര് എന്നിവര്ക്കാണ് ഇത് കൂടുതലും അനുഭവപ്പെടുന്നത്. ഇവരില് ചര്മ്മം വിയര്ത്തുകുളിച്ചിരിക്കും, ചുവക്കുകയും ചെയ്യും.
