കേരളത്തിൽ യുഡിഎഫിന്റെ ഉജ്ജ്വല വിജയത്തിന് പിന്നാലെ മുഖ്യമന്ത്രിയെ തീരുമാനിക്കാനുള്ള അവസാനവട്ട ചർച്ചകൾ ഡൽഹിയിൽ പുരോഗമിക്കുന്നു. മുതിർന്ന കോൺഗ്രസ് നേതാക്കളും കെപിസിസി ഭാരവാഹികളുമായി രാഹുൽ ഗാന്ധി വ്യക്തിപരമായി കൂടിക്കാഴ്ച നടത്തി അഭിപ്രായങ്ങൾ തേടി. സോണിയ ഗാന്ധിയുടെ വസതിയായ പത്ത് ജൻപഥിൽ നടന്ന കൂടിക്കാഴ്ചയിൽ കെ. സുധാകരൻ, വി.ഡി. സതീശൻ, രമേശ് ചെന്നിത്തല, കെ. മുരളീധരൻ തുടങ്ങിയ പ്രമുഖ നേതാക്കൾ പങ്കെടുത്തു. എംഎൽഎമാരുടെ പിന്തുണയ്ക്കൊപ്പം സംസ്ഥാനത്തെ പൊതുവായ രാഷ്ട്രീയ സാഹചര്യവും പരിഗണിച്ചായിരിക്കും ഹൈക്കമാൻഡ് അന്തിമ തീരുമാനമെടുക്കുക.
നിലവിലെ പ്രതിസന്ധികൾ പരിഹരിക്കാൻ നേതാക്കൾ മുന്നോട്ടുവെച്ച നിർദ്ദേശങ്ങൾ രാഹുൽ ഗാന്ധി എഐസിസി അധ്യക്ഷൻ മല്ലികാർജുൻ ഖാർഗെയെ ധരിപ്പിക്കും. തിരഞ്ഞെടുപ്പ് വിജയത്തിന് പിന്നാലെ പാർട്ടിയിലുണ്ടായ ചേരിതിരിഞ്ഞുള്ള പ്രകടനങ്ങളെക്കുറിച്ചും എംഎൽഎമാരെ സ്വാധീനിക്കാൻ ശ്രമം നടന്നോ എന്ന കാര്യത്തിലും ഹൈക്കമാൻഡ് വ്യക്തത തേടിയിട്ടുണ്ട്. സോണിയ ഗാന്ധിയുമായി കൂടി കൂടിയാലോചനകൾ നടത്തിയ ശേഷമാകും നിർണ്ണായക പ്രഖ്യാപനം ഉണ്ടാവുക. രമേശ് ചെന്നിത്തല, വി.ഡി. സതീശൻ, കെ.സി. വേണുഗോപാൽ എന്നിവരുടെ പേരുകളാണ് മുഖ്യമന്ത്രി സ്ഥാനത്തേക്ക് പ്രധാനമായും പരിഗണനയിലുള്ളത്.
The post കേരള മുഖ്യമന്ത്രിയെ നിശ്ചയിക്കാൻ ഡൽഹിയിൽ ചർച്ചകൾ സജീവം; പ്രഖ്യാപനം നാളെയുണ്ടായേക്കും? appeared first on Express Kerala.
