മാമ്പഴവും വേനലും പര്യായങ്ങളാണ്. ഈ മധുരക്കനി ഇഷ്ടമല്ലാത്തവര് ആരുണ്ട്. വിപണിയിലുടനീളം വൈവിധ്യമാര്ന്ന മാമ്പഴങ്ങള് ലഭ്യമാണ്. പച്ചയും പഴുത്തതുമെല്ലാം കേരളീയര്ക്ക് പ്രിയങ്കരമാണ്. പഴുത്തത് ഉപയോഗിച്ച് മലയാളിക്ക് മാമ്പഴ പുളിശ്ശേരിയുമുണ്ട് (Mambazha Pulissery).
മാങ്ങ സീസണ് പരമാവധി പ്രയോജനപ്പെടുത്താന് മാമ്പഴ പുളിശ്ശേരി കൂടി പരീക്ഷിക്കേണ്ടതുണ്ട്. ഇതാ അതീവ രുചികരമായ മാമ്പഴ പുളിശ്ശേരിയുടെ രസക്കൂട്ട്.
ചേരുവകള്
4 പഴുത്ത മാങ്ങ, അര ലിറ്റര് തൈര്, 4 പച്ചമുളക്, മുക്കാല് ടീസ്പൂണ് മഞ്ഞള്പ്പൊടി, അര ടീസ്പൂണ്-കശ്മീരി മുളകുപൊടി, ഒരു ടീസ്പൂണ് ഉപ്പ്, ഒരു തണ്ട് കറിവേപ്പില, ആവശ്യത്തിന് വെള്ളം. താളിക്കാന് : വെളിച്ചെണ്ണ, കടുക്, വറ്റല് മുളക്, കറിവേപ്പില.
അരപ്പ് തയ്യാറാക്കാം
അരമുറി തേങ്ങ ചിരകിയതും, 2 പച്ചമുളകും ഒരു ടീസ്പൂണ് ജീരകവും ചേര്ത്ത് അരച്ചെടുക്കുക. നല്ല പഴുത്ത മാങ്ങ കഴുകി വൃത്തിയാക്കി തോല് നീക്കുക. മധുരമുള്ളതും അധികം വലുപ്പമില്ലാത്തതുമായ മാങ്ങ തിരഞ്ഞെടുക്കാന് ശ്രദ്ധിക്കണം.
Also Read: വി.ഡി. സതീശന്റെ പ്രിയവിഭവം: കേരളത്തിന്റെ ഈ പാരമ്പര്യ രുചി അന്വേഷിച്ച് ഭക്ഷണപ്രിയർ
ഒരു പാനില് മാങ്ങ, പച്ചമുളക്, കറിവേപ്പില, മഞ്ഞള്പ്പൊടി, മുളകുപൊടി, ഉപ്പ് എന്നിവ വെള്ളമൊഴിച്ച് 7 മിനിട്ട് വേവിക്കുക. തുടര്ന്ന് അരപ്പ് മാങ്ങയിലേക്ക് ചേര്ക്കുക. ശേഷം തൈരും ഒഴിക്കുക. മധുരത്തിനായി അല്പ്പം പഞ്ചസാരയും ഉള്പ്പെടുത്തുക. അര ടീസ്പൂണ് വറുത്ത് പൊടിച്ച ഉലുവ പൊടി കൂടി ഇടണം.
ശേഷം വെളിച്ചെണ്ണയും കടുകും വറ്റല് മുളകും കറിവേപ്പിലയും ചേര്ത്ത് താളിച്ച് ചേര്ക്കുക. ഉപ്പും മധുരവും പരിശോധിച്ച് ക്രമീകരിക്കാം. കറി അധികം തിളയ്ക്കാതെ ശ്രദ്ധിക്കണം. ഇതാ അതീവ രുചികരമായ മാമ്പഴ പുളിശ്ശേരി തയ്യാര് (Kerala Style Mambazha Pulissery Recipe).
അങ്കമാലി സ്റ്റൈല് മാങ്ങ കറി
ഏറെ പ്രശസ്തമാണ് അങ്കമാലി സ്റ്റൈല് മാങ്ങ കറി. അങ്കമാലിയില് പോവുകയാണെങ്കില് മാങ്ങ കറി കഴിക്കണമെന്ന് ആളുകള് പറയാറുണ്ട്. അതേസമയം ഈ കറി കേരളത്തിന്റെ മറ്റിടങ്ങളിലേക്ക് ഇക്കാലത്തിനിടെ വ്യാപിക്കുകയും ചെയ്തിട്ടുണ്ട്. ഈ രുചിയേറിയ കറിയുടെ രസക്കൂട്ട് പരിശോധിക്കാം.
ചേരുവകള്
പച്ച മാങ്ങ-2, സവാള -1, ചെറിയ ഉള്ളി -20, തേങ്ങയുടെ ഒന്നാം പാല് ഒരു കപ്പ്, രണ്ടാം പാല് – ഒരു കപ്പ്, മഞ്ഞള് പൊടി -1/2 ടീസ്പൂണ്, മല്ലി പൊടി -2 ടീസ്പൂണ്, മുളകുപൊടി – ഒരു ടീസ്പൂണ്, കശ്മീരി മുളകുപൊടി -1/2 ടീസ്പൂണ്, കടുക് -1/2 ടീസ്പൂണ്, ചുവന്ന മുളക് -4, ഇഞ്ചി -ചെറിയ കഷണം അരിഞ്ഞത്, നാരങ്ങാനീര് – ഒരു ടീസ്പൂണ്, കറിവേപ്പിലയും ഉപ്പും ആവശ്യത്തിന്.
കറി തയ്യാറാക്കാം
കഴുകി വൃത്തിയാക്കിയ പച്ച മാങ്ങ തൊലി കളഞ്ഞ് അല്പ്പം വണ്ണത്തില് നീളത്തില് മുറിച്ച് തയ്യാറാക്കുക. അതില് അല്പ്പം മഞ്ഞള്പ്പൊടിയും നാരങ്ങാ നീരും ചേര്ത്തുപിടിപ്പിച്ച് മാറ്റി വയ്ക്കുക. തുടര്ന്ന് മഞ്ഞള്പ്പൊടി, മുളകുപൊടി, മല്ലിപ്പൊടി എന്നിവ പേസ്റ്റ് രൂപത്തിലാക്കിയും മാറ്റി വയ്ക്കുക.
Also Read: റേഞ്ച് ആണോ നോക്കേണ്ടത് വിലയോ ? ; ഇലക്ട്രിക് സ്കൂട്ടര് വാങ്ങുമ്പോള് അറിഞ്ഞിരിക്കേണ്ടത്
കറിപ്പാത്രത്തിലേക്ക് കനം കുറഞ്ഞ രീതിയില് അരിഞ്ഞ സവാള, ചെറിയ ഉള്ളി, പച്ചമുളക്, ഇഞ്ചി, കറിവേപ്പില എന്നിവ 1 1/2 ടേബിള് സ്പൂണ് വെളിച്ചെണ്ണ ചേര്ത്ത് ഇളക്കുക. കൈ കൊണ്ട് ഇവ നന്നായി തിരുമ്മി യോജിപ്പിക്കണം. ഇത് അഞ്ച് മിനിട്ടെങ്കിലും തുടരണം. അതിലേക്ക് നേരത്തേ മാറ്റിവച്ച പൊടികളുടെ പേസ്റ്റ് ചേര്ത്ത് നന്നായി യോജിപ്പിക്കുക.
ശേഷം കട്ടിയുള്ള തേങ്ങാപ്പാല് ചേര്ത്ത് ഇളക്കി അടുപ്പത്ത് വയ്ക്കുക. അത് തിളച്ചാല് അതിലേക്ക് മാങ്ങാ കഷണങ്ങള് ചേര്ക്കാം. അത് വെന്ത ശേഷം കട്ടി കുറഞ്ഞ തേങ്ങാപ്പാല് ചേര്ത്തിളക്കി തീ അണയ്ക്കുക.
തുടര്ന്ന് താളിപ്പിനായി ഒരു പാത്രത്തില് വെളിച്ചെണ്ണ ഒഴിച്ച് കടുകും മുളകും പൊട്ടിച്ച ശേഷം ചെറുതായി അരിഞ്ഞ ചെറിയുള്ളിയും കറിവേപ്പിലയും ഉള്പ്പെടുത്തി കറിയില് ചേര്ക്കണം. ഇതാ ഏറെ രുചികരമായ അങ്കമാലി മാങ്ങ കറി റെഡി.
