ആപ്പിള് ഐഫോണ് 18 സീരീസിലെ പ്രോ മാക്സ് വേരിയന്റിന്റെ ലോഞ്ചിനായി വലിയ ആകാംക്ഷയോടെയാണ് ഏവരും കാത്തിരിക്കുന്നത്. ഐഫോണ് 18 സീരീസുമായി ബന്ധപ്പെട്ട് ഒന്നിലധികം ലീക്കുകളാണ് (News Leaks) കഴിഞ്ഞ ദിവസങ്ങളില് പുറത്തുവന്നത് (iPhone 18 Pro Max).
പുതിയ കളര് ഓപ്ഷനുകള്ക്കൊപ്പം കരുത്തുറ്റ പ്രോസസറും നേരിയ തോതില് മെച്ചപ്പെടുത്തിയ ക്യാമറ സിസ്റ്റവും ഇതിലുണ്ടാവുമെന്നാണ് വിവരം. ഐഫോണ് 18 പ്രോ, ഐഫോണ് ഫോള്ഡ്
(ഐഫോണ് അള്ട്ര) എന്നീ പുതിയ പതിപ്പുകള്ക്കൊപ്പം സെപ്റ്റംബര് 9നും 15നും ഇടയില് പ്രോ മാക്സ് വേര്ഷന് ഇന്ത്യയില് ലോഞ്ച് ചെയ്യുമെന്നാണ് വിവരം (Apple iPhone 18 Pro Max Explained).
ഐഫോണ് 18 പ്രോ മാക്സില് പ്രതീക്ഷിക്കുന്ന ഫീച്ചറുകള്
6.9 ഇഞ്ച് വലിപ്പമുള്ള വലിയ LTPO OLED ഡിസ്പ്ലേയായിരിക്കും ഫോണിലുണ്ടാവുക. 3,000 nits വരെയുള്ള ഉയര്ന്ന പീക്ക് ബ്രൈറ്റ്നസും റീഫ്രഷ് റേറ്റും പ്രോ മാക്സ് വേര്ഷനില് പ്രതീക്ഷിക്കാം. 48MP പ്രൈമറി ഷൂട്ടര്, 48MP പെരിസ്കോപ്പ് ടെലിഫോട്ടോ ഷൂട്ടര്, 48MP അള്ട്രാ വൈഡ് ആംഗിള് ഷൂട്ടര് എന്നിങ്ങനെ ട്രിപ്പിള് റിയര് ക്യാമറ സെറ്റപ്പ് ഫോണിന് പിന്നിലുണ്ടാവും.
സെല്ഫികള് എടുക്കുന്നതിനും വീഡിയോ കോളുകള്ക്കുമായി 24MP ഫ്രണ്ട് സ്നാപ്പറും ഉണ്ട്. ഇത് ആപ്പിള് A20 പ്രോ ചിപ്സെറ്റിലായിരിക്കാം പ്രവര്ത്തിക്കുക. വെളിച്ചത്തിനനുസരിച്ച് ക്യാമറ ലെന്സ് സ്വയം ക്രമീകരിക്കുന്ന DSLR സ്റ്റൈല് സാങ്കേതികവിദ്യയായ വേരിയബിള് അപ്പര്ച്ചര് (Variable Aperture) പ്രോ വേര്ഷനുകളില് ലഭ്യമാവും.
ഫോണിന്റെ പ്രാരംഭ രൂപകല്പ്പനാ ചിത്രങ്ങള് സൂചിപ്പിക്കുന്നത്, ആപ്പിള് ഒരുപക്ഷേ ഫേസ് ഐഡി ഹാർഡ്വെയർ ഡിസ്പ്ലേ പാനലിന് അടിയിലേക്ക് മാറ്റാന് ശ്രമിക്കുന്നുണ്ടെന്നാണ്. ഈ സാഹചര്യത്തില്, മുന്ഭാഗത്ത് ഒരു ചെറിയ പഞ്ച് ഹോള് പോലെയുള്ള കട്ടൗട്ട് കാണാന് സാധിക്കും.
ഫോണിന്റെ മറ്റ് ചിത്രങ്ങള് സൂചിപ്പിക്കുന്നത് മുന് ക്യാമറ തീര്ത്തും ഇടത് വശത്തേക്ക് മാറ്റുമെന്നാണ്, ഇത് ഐഫോണ് പ്രോ മോഡലുകളുടെ ലുക്കില് വലിയ മാറ്റം വരുത്തും.
ആപ്പിള് തങ്ങളുടെ പ്രോ മോഡലുകളിലെ ഡൈനാമിക് ഐലന്ഡ് സാങ്കേതിക വിദ്യയില് മാറ്റങ്ങള് വരുത്തിയിട്ടുണ്ടെന്നും അത് കുറഞ്ഞ സ്ഥലം മാത്രം ഉപയോഗിക്കുന്ന രീതിയിലാക്കുകയും ചെയ്തേക്കാമെന്നും സൂചനയുണ്ട്.
18 പ്രോ മാക്സ് ഇന്ത്യയിലെ വിലയും പുതിയ കളര് വേരിയന്റുകളും
5,100mAhല് അധികമുള്ള വലിയ ബാറ്ററിയും പുതിയ പ്രൊസസ്സറിന്റെ കാര്യക്ഷമതയും ചേര്ന്ന് 2 ദിവസം വരെ നീണ്ടുനില്ക്കുന്ന ബാറ്ററി ബാക്കപ്പ്, കൂടുതല് വേഗതയേറിയ 5G സിഗ്നലുകള്ക്കായി ആപ്പിള് സ്വന്തമായി വികസിപ്പിച്ചെടുത്ത C2 മോഡം എന്നിവയാണ് മറ്റ് പ്രത്യേകതകള്. ആപ്പിള് ഇന്റലിജന്സ് (AI) ഫീച്ചറുകള് മികച്ച രീതിയില് പ്രവര്ത്തിക്കാന് 12GB റാമാണ് ഫോണിലുളളത്.
ഐഫോണ് 18 പ്രോ മാക്സിന്റെ 256 ജിബി ഇന്റേണല് സ്റ്റോറേജ് പതിപ്പ് 1,49,900 രൂപയ്ക്ക് ഇന്ത്യന് മാര്ക്കറ്റില് എത്തിയേക്കുമെന്നാണ് വിവരം. 256 GB മുതല് 2 TB വരെയുള്ള സ്റ്റോറേജ് ഒപ്ഷനുകളിലാവും പ്രോ മാക്സ് വേര്ഷന് വിപണിയില് ലഭ്യമാവുക. ഡീപ് പര്പ്പിള്, ബ്രൗണ്, ബര്ഗണ്ടി എന്നീ കളര് വേരിയന്റുകളിലായിരിക്കും പ്രോ മാക്സ് വേര്ഷന് എത്തുക.
അതേസമയം ആപ്പിളിന്റെ ആദ്യ ഫോള്ഡബിള് ഫോണായാണ് ഐഫോണ് അള്ട്രയും സെപ്റ്റംബറില് എത്തുന്നത്. ടൈറ്റാനിയം ബോഡിയും മടക്കുകള് ദൃശ്യമാകാത്ത ക്രീസ്-ഫ്രീ ഡിസ്പ്ലേയുമാണ് ഈ ഐഫോണ് മോഡലിന്റെ പ്രധാന ആകര്ഷണം.
ഡീപ് ഇന്ഡിഗോ, സില്വര് വൈറ്റ് എന്നീ രണ്ട് നിറങ്ങളില് മാത്രമായിരിക്കും ഐഫോണ് അള്ട്ര വിപണിയില് എത്തുക. ഇന്ത്യയില് രണ്ടര ലക്ഷത്തിന് മുകളില് ആപ്പിളിന്റെ ആദ്യ ഫോള്ഡബിള് ഫോണിന് വില വന്നേക്കുമെന്നാണ് റിപ്പോര്ട്ടുകള്.
