മനാമ : ബഹ്റൈൻ പ്രതിഭ മനാമ മേഖല സംഘടിപ്പിച്ച സാംസ്കാരികോത്സവം ‘ദിശ 2025’ന് വർണ്ണാഭമായ സമാപനം. ബാൻ സാങ് തായ് ഹാളിൽ നടന്ന സമാപന ചടങ്ങുകൾ പ്രതിഭ രക്ഷാധികാരി സമിതി അംഗവും ലോക കേരള സഭാ അംഗവുമായ സുബൈർ കണ്ണൂർ ഉദ്‌ഘാടനം ചെയ്തു. പി ശ്രീജിത്ത് ,മിജോഷ് മൊറാഴ , ബിനു മണ്ണിൽ ,സി വി നാരായണൻ , എൻ കെ വീരമണി , എൻ വി ലിവിൻ കുമാർ , ദീപ്തി രാജേഷ് എന്നിവർ സമാപന ചടങ്ങിന് ആശംസ അർപ്പിച്ച് സംസാരിച്ചു. നിരൻ സുബ്രഹ്മണ്യൻ സ്വാഗതം ആശംസിച്ച പരിപാടിക്ക് മനോജ് പോൾ നന്ദി രേഖപ്പെടുത്തി. റാഫി കല്ലിങ്കൽ അധ്യക്ഷത വഹിച്ചു.
മനാമ മേഖലയിലെ സ്വരലയ ഗാനങ്ങളോടെ ആരംഭിച്ച പരിപാടിക്ക് ശേഷം അവതരണ ഗാനവും, വനിതകളും കുട്ടികളും ഉൾപ്പെടെയുള്ള മേഖലയിലെ കലാപ്രതിഭകൾ അവതരിപ്പിച്ച നൃത്ത പരിപാടികളും, യുദ്ധത്തിനെതിരെയാ സന്ദേശം ഉയർത്തിപ്പിടിച്ച് അവതരിപ്പിച്ച കാലിക പ്രസക്തമായ സാമൂഹ്യ നാടകവും അരങ്ങേറി. തുടർന്ന് നടന്ന മെന്റലിസ്റ്റ് അശ്വത് സജിത്ത് അവതരിപ്പിച്ച മെന്റലിസം പരിപാടി കാണികളുടെയാകെ മുക്തകണ്ഠ പ്രശംസപിടിച്ചു പറ്റി.
പ്രശസ്ത ഗായിക രശ്മി സതീഷ് അവതരിപ്പിച്ച ഗാനങ്ങൾക്ക് ശേഷം സഹൃദയ നാടൻ പാട്ട് സംഘത്തിന്റെ നാടൻ പാട്ടുകളോടെ ‘ദിശ 2025’ ഗ്രാൻഡ് ഫിനാലെക്ക് തിരശീല വീണു.
മനാമ മേഖലയിലെ എട്ട് യൂണിറ്റുകളിലെ അംഗങ്ങളുടെയും കുടുംബാംഗങ്ങളുടെയും സർഗ്ഗ -കലാ വാസനകളെ പരിപോഷിപ്പിക്കുന്നതിനും പ്രകടിപ്പിക്കുന്നതിനും വേദിയൊരുക്കുക എന്ന ലക്ഷ്യത്തോടെയാണ് ചിലങ്ക , ലയം , മുദ്ര , താളം എന്നിങ്ങനെ നാല് ഗ്രൂപ്പുകളാക്കി അംഗങ്ങളെ തിരിച്ച് സംഘടിപ്പിച്ച എൺപത്തിനാല് ദിവസം നീണ്ടു നിന്ന ഈ സാംസ്കാരികോത്സവത്തിലൂടെ ശ്രമിച്ചതെന്ന് സംഘാടകർ അറിയിച്ചു. ദിശയുടെ ഭാഗമായി പ്രവർത്തിക്കുകയും , വിജയിപ്പിക്കാൻ സഹകരിക്കുകയും ചെയ്ത മുഴുവൻ മുഴുവൻ പേർക്കും നന്ദി രേഖപ്പെടുത്തുന്നതായി സംഘാടക സമിതി ചെയർമാൻ എൻ കെ വീരമണിയും കൺവീനർ മനോജ് പോളും അറിയിച്ചു.
