കാസര്‍കോട്: കാല്‍ നൂറ്റാണ്ടിലേറെ കാലത്തിന് ശേഷം ഭാരതത്തിന്റെ സീനിയര്‍ വനിതാ ഫുട്‌ബോള്‍ ടീമില്‍ ഒരു മലയാളി താരം. കാസര്‍കോട് നീലേശ്വരം സ്വദേശിന പി. മാളവികയാണ് ഏഷ്യന്‍ കപ്പ് യോഗ്യതാ റൗണ്ട് മത്സരത്തിനുള്ള ഭാരത ടീമില്‍ ഇടം നേടിയത്. ഇതിന് മുമ്പ് 1999ല്‍ എറണാകുളത്തു നിന്നുള്ള ബെന്‍ഡ്‌ല ഡികോത്തയാണ് ഭാരത വനിതാ ഫുട്‌ബോള്‍ ടീമില്‍ ഉള്‍പ്പെട്ട മലയാളി താരം. ഭാരതത്തിന്റെ വലത് വിങ് താരമായാണ് മാളവികയെ തെരഞ്ഞെടുത്തിരിക്കുന്നത്.
നീലീശ്വരം ബങ്കളത്ത് പരേതനായ എം.പ്രസാദിന്റെയും എ. മിനിയുടെയും മകളാണ് മാളവിക. കക്കാട്ട് ഗവ.ഹയര്‍ സെക്കന്‍ഡറി സ്‌കൂളില്‍ പഠിക്കുമ്പോള്‍ ആറാം ക്ലാസ് മുതല്‍ പന്ത് തട്ടി തുടങ്ങിയതാണ് മാളവിക.
2018, 2019 വര്‍ഷങ്ങളില്‍ കേരള സബ് ജൂനിയര്‍ ടീമില്‍ ഇടം നേടിയിരുന്നു. വനിതകളുടെ അണ്ടര്‍ 17 ലോകകപ്പിനുള്ള ഭാരത ക്യാമ്പിലും ഉള്‍പ്പെട്ടു. കേരള ബ്ലാസ്റ്റേഴ്‌സ് അടക്കം പ്രമുഖ ഭാരത ക്ലബ്ബുകളുടെ വനിതാ ടീമില്‍ കളിച്ചിട്ടുണ്ട്. വനിതാ ലീഗില്‍ സേതു എഫ്‌സിക്കുവേണ്ടിയാണ് കഴിഞ്ഞ സീസണില്‍ കളിച്ചത്.
