വടക്കൻ ഇംഗ്ലണ്ടിലെ ഒരു സർവകലാശാല, അവിടെ ഒരു ലാബിൽ ഒരു കമ്പ്യൂട്ടർ ശാസ്ത്രജ്ഞൻ കുറച്ചു കാലമായി ഒരന്വേഷണത്തിലാണ്. ലോകത്തെ ആകെ പിടിച്ചു കുലുക്കിയ ഒരു രഹസ്യത്തിന് ഉത്തരം കണ്ടുപിടിക്കാനുള്ള അതീവ ശ്രമം. നിരന്തരം ഒരു മൃതദേഹത്തിനെ പഠിച്ചുകൊണ്ട് ഏകദേശം 50 വർഷമായി മിഡിൽ ഈസ്റ്റിനെ പിടികൂടിയ ഒരു നിഗൂഢത പരിഹരിക്കാനുള്ള ആ തീവ്ര അധ്വാനത്തിന് ഇപ്പോൾ ഫലം ലഭിച്ചിരിക്കുകയാണ്. 1978-ൽ ലിബിയയിൽ നിന്ന് അപ്രത്യക്ഷനായ കരിസ്മാറ്റിക് പുരോഹിതൻ മൂസ അൽ-സദർ എന്നയാളുടെ തിരോധാനമാണ് ആ രഹസ്യം. അദ്ദേഹത്തിന്റെ തിരോധാനം മൂലമുണ്ടായ പൊല്ലാപ്പുകൾ ചില്ലറയൊന്നുമല്ല, ലെബനനിലെ ശിയാ മുസ്ലീങ്ങൾക്കിടയിൽ ആ ‘മിസ്സിംഗ്’ വരുത്തിവെച്ചത് വലിയ വിഭാഗീയതയും സംഘർഷങ്ങളുമാണ്.
2011-ൽ ലിബിയയിലെ ഒരു രഹസ്യ മോർച്ചറിയിൽ വെച്ച് ഒരു പത്രപ്രവർത്തകൻ അപ്രതീക്ഷിതമായി എടുത്ത മൃതദേഹത്തിൻ്റെ ചിത്രം ഒരു പ്രധാന പത്രത്തിന് ലഭിക്കുന്നു, അതാണ് ഈ അന്വേഷണത്തിലെ പ്രധാന വഴിത്തിരിവ് എന്ന് പറയാം. ഏകദേശം മൂന്ന് പതിറ്റാണ്ടുകൾക്ക് മുൻപ് മരിച്ച ഉയരം കൂടിയ ഒരു പുരുഷന്റെ മൃതദേഹമായിരുന്നു അത്. സദറിൻ്റെ ഉയരവും തിരോധാന സമയവും ഈ വിവരങ്ങളുമായി ഒത്തുപോകുന്നതായിരുന്നു. ബ്രാഡ്‌ഫോർഡ് യൂണിവേഴ്‌സിറ്റിയിലെ പ്രൊഫസർ ഹസ്സൻ ഉഗൈൽ വികസിപ്പിച്ച ഡീപ് ഫേസ് റെക്കഗ്നിഷൻ അൽഗോരിതം ഉപയോഗിച്ച് ഈ ചിത്രം സദറിൻ്റെ യഥാർത്ഥ ചിത്രങ്ങളുമായി താരതമ്യം ചെയ്തു.
ശാസ്ത്രീയമായ വിശകലനത്തിൽ, ഈ മൃതദേഹം മൂസ അൽ-സദറിൻ്റെതാകാൻ “വളരെ സാധ്യതയുണ്ട്” എന്ന് കണ്ടെത്തി. തലയോട്ടിക്ക് ഏറ്റ കനത്ത ആഘാതത്തിൽ നിന്നുള്ള കേടുപാടുകൾ, അത് ഒരു കൊലപാതകമാണെന്ന് കൂടി സൂചിപ്പിക്കുന്നതായിരുന്നു.
കൊലപാതകമാണെന്ന് തെളിഞ്ഞതോടെ, ആ കൊലപാതകത്തിന് പിന്നിലെ കാരണങ്ങൾ അന്വേഷിച്ചപ്പോൾ പല സാധ്യതകളും തെളിഞ്ഞുവന്നു. അന്നത്തെ ലിബിയൻ നേതാവ് മുഅമ്മർ ഗദ്ദാഫിയാണ് സദറിനെ കൊലപ്പെടുത്തിയതെന്ന് മുൻ ലിബിയൻ നീതിന്യായ മന്ത്രി മുസ്തഫ അബ്ദുൽ ജലീൽ വെളിപ്പെടുത്തിയതോടെ കാര്യങ്ങൾ കൂടുതൽ വഷളാവുകയായിരുന്നു. എന്നാൽ ഗദ്ദാഫിയെ അതിന് പ്രേരിപ്പിച്ചത് ആരാണെന്ന കാര്യത്തിൽ വ്യത്യസ്ത സിദ്ധാന്തങ്ങളും നിലവിലുണ്ട്.
ഒരു സിദ്ധാന്തം അനുസരിച്ച്, ഇറാനിയൻ വിപ്ലവം ഒരു തീവ്ര ഇസ്ലാമിക ദിശയിലേക്ക് പോകുന്നത് തടയാൻ ശ്രമിച്ച സദറിൻ്റെ മിതവാദപരമായ നിലപാടുകൾ ഇറാനിലെ തീവ്രവിപ്ലവകാരികൾക്ക് ഇഷ്ടപ്പെട്ടിരുന്നില്ല. അതിനാൽ അവർ ഗദ്ദാഫിയെ സ്വാധീനിച്ചിരിക്കാം. രണ്ടാമത്തെ സിദ്ധാന്തമനുസരിച്ച്, പലസ്തീൻ വിമോചന സംഘടന (പി‌എൽ‌ഒ) സദറിനെ ഭയപ്പെട്ടിരുന്നു, കാരണം അദ്ദേഹം ലിബിയൻ നേതാവിനോട് പലസ്തീൻ പോരാളികളെ നിയന്ത്രിക്കാൻ ആവശ്യപ്പെടുമെന്ന് അവർ കരുതി.
ശാസ്ത്രീയമായ കണ്ടെത്തലുകൾ സദറിന്റെ മരണം ഉറപ്പിച്ചുവെങ്കിലും, അദ്ദേഹത്തിന്റെ രാഷ്ട്രീയ സംഘടനയായ അമൽ പാർട്ടിയും അനുയായികളും അദ്ദേഹം ഇപ്പോഴും ജീവിച്ചിരിപ്പുണ്ടെന്നും ലിബിയയിലെ ജയിലിൽ തടവിലാണെന്നും വിശ്വസിക്കുന്നു. ഇതിന് തെളിവായി, നേരത്തെ കണ്ടെത്തിയ മൃതദേഹത്തിലെ ഡിഎൻഎ സാമ്പിളുകൾ ദുരൂഹ സാഹചര്യത്തിൽ അപ്രത്യക്ഷമായത് അവർ ചൂണ്ടിക്കാട്ടുന്നുണ്ട്. ഈ വിഷയത്തിൽ അമൽ പാർട്ടിയിലെ നേതാക്കൾ പത്ര മാധ്യമങ്ങളോട് പ്രതികരിക്കാൻ വിസമ്മതിക്കുകയാണ് ഉണ്ടായത്.
ഈ രഹസ്യം പരിഹരിക്കുന്നതിനായി ഒരു പ്രമുഖ പത്ര സംഘം ലിബിയയിൽ നേരിട്ട് അന്വേഷണം നടത്തിയപ്പോൾ, അവർക്ക് ഭീഷണികളും തടസ്സങ്ങളും നേരിടേണ്ടിവന്നു. ലിബിയൻ ഇന്റലിജൻസ് ഉദ്യോഗസ്ഥരാണെന്ന് കരുതുന്ന ഒരു സംഘം ഇവരെ തടവിലാക്കി, ചാരവൃത്തി ആരോപിച്ച് ആറ് ദിവസം ജയിലിലടച്ചു. ഗദ്ദാഫിയുടെ മുൻ വിശ്വസ്തരാണ് നിലവിൽ ഈ രഹസ്യാന്വേഷണ വിഭാഗം നടത്തുന്നതെന്ന് പിന്നീട് വ്യക്തമായി. ഈ സംഭവം ഈ വിഷയത്തിൻ്റെ രാഷ്ട്രീയ പ്രാധാന്യം എത്രത്തോളമുണ്ടെന്ന് വ്യക്തമാക്കുന്ന ഒന്നാണ്.
എന്നാലിപ്പോൾ 50 വർഷത്തെ ദുരൂഹതയ്ക്ക് ശാസ്ത്രം ഒരു ഉത്തരം നൽകിയിരിക്കുന്നു. മൃതദേഹത്തെക്കുറിച്ചുള്ള ശാസ്ത്രീയ വിശകലനങ്ങൾ അദ്ദേഹം കൊല്ലപ്പെട്ടു എന്ന് ഉറപ്പിക്കുന്നു. എന്നിരുന്നാലും, ഒരു വിഭാഗം ആളുകൾക്ക് സദർ ഇപ്പോഴും ജീവിച്ചിരിപ്പുണ്ടെന്ന വിശ്വാസം അദ്ദേഹത്തിന്റെ തിരോധാനം ഒരു രാഷ്ട്രീയ വിശ്വാസപ്രമാണമായി നിലനിർത്താൻ സഹായിക്കുന്നു. അതിനാൽ, ശാസ്ത്രീയ തെളിവുകൾ പുറത്തുവന്നിട്ടും, മിഡിൽ ഈസ്റ്റിലെ ഈ ദുരൂഹത ഒരുപക്ഷേ പൂർണ്ണമായി അവസാനിച്ചുവെന്ന് പറയാൻ ആർക്കും കഴിയില്ല.
The post കൊല്ലപ്പെട്ടെന്ന് ശാസ്ത്രം, ഇല്ലെന്ന് അനുയായികൾ! അപ്രത്യക്ഷനായ ഒരു മതനേതാവിൻ്റെ 50 വർഷത്തെ ‘ചുരുളഴിയാത്ത രഹസ്യം’… appeared first on Express Kerala.
