കോണ്‍ഗ്രസ് നേതാവ് പവന്‍ ഖേരയ്ക്ക് രണ്ട് തിരിച്ചറിയല്‍ കാര്‍ഡ് ഉണ്ടെന്ന് ആരോപിച്ച് ബിജെപി രംഗത്ത്. പവന്‍ ഖേര ഒന്നില്‍ കൂടുതല്‍ തവണ വോട്ട് ചെയ്തിട്ടുണ്ടോയെന്ന് തെരഞ്ഞെടുപ്പ് കമ്മീഷന്‍ അന്വേഷിക്കണമെന്നാണ് ബിജെപിയുടെ ഐടി സെല്‍ മേധാവി അമിത് മാളവ്യ സോഷ്യല്‍ മീഡിയയില്‍ ആരോപിച്ചിരിക്കുന്നത്. രണ്ട് കാര്‍ഡിനും രണ്ട് നമ്പറാണെന്നും പവന്‍ ഖേര ആരോപിച്ചു. വോട്ടര്‍ അധികാര്‍ യാത്രയുടെ ഭാഗമായി വോട്ടര്‍മാരെ കബളിപ്പിക്കാന്‍ പവന്‍ ഖേര പത്ര സമ്മേളനം നടത്തിയെന്നും അദ്ദേഹം ആരോപിച്ചിട്ടുണ്ട്. അതേസമയം ബിജെപിയുടെ വാദങ്ങള്‍ തള്ളി കോണ്‍ഗ്രസ് രംഗത്തെത്തി. പഴയ തിരിച്ചറിയല്‍ കാര്‍ഡ് കമ്മീഷനില്‍ തിരിച്ചേല്‍പ്പിച്ചിട്ടുണ്ടെന്നും കോണ്‍ഗ്രസ് വ്യക്തമാക്കിയിട്ടുണ്ട്.
അതേസമയം വോട്ട് ക്രമക്കേടിനെതിരെ ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധി ബിഹാറില്‍ നടത്തിയ വോട്ടര്‍ അധികാര്‍ യാത്രയുടെ സമാപനം കഴിഞ്ഞതിന് പിന്നാലെയാണ് ആരോപണവുമായി ബിജെപി രംഗത്തെത്തിയത്. ഇന്‍ഡ്യാ മുന്നണി നേതാക്കളുടെ നേതൃത്വത്തില്‍ പതിനായിരക്കണക്കിന് പേരാണ് വോട്ടര്‍ അധികാര്‍ യാത്രയുടെ സമാപന യാത്രയില്‍ കഴിഞ്ഞ ദിവസം പങ്കെടുത്തത്. കഴിഞ്ഞ മാസം 17ന് ബിഹാറിലെ സസാറാമില്‍ നിന്നാണ് വോട്ടര്‍ അധികാര്‍ യാത്ര തുടങ്ങിയത്. ബിഹാറിലെ 20 ജില്ലകളിലൂടെ 1300ലധികം കിലോമീറ്ററാണ് രാഹുലും സംഘവും സഞ്ചരിച്ചത്. വോട്ട് കൊള്ളക്കെതിരെയാണ് രാഹുലിന്റെ നേതൃത്വത്തില്‍ വോട്ടര്‍ അധികാര്‍ യാത്ര സംഘടിപ്പിച്ചത്.
The post ‘പവന്‍ ഖേരയ്ക്ക് രണ്ട് തിരിച്ചറിയല്‍ കാര്‍ഡ് ‘; ആരോപണവുമായി ബിജെപി രംഗത്ത് appeared first on Express Kerala.
