യുവാക്കള്‍ ജിമ്മില്‍ വര്‍ക്കൗട്ട് ചെയ്യുന്നതിനിടെ ഹൃദയാഘാതമുണ്ടായോ, പൊടുന്നനെ കുഴഞ്ഞുവീണ് മരിക്കുന്നതോ ആയ സംഭവങ്ങള്‍ തുടര്‍ക്കഥയാവുകയാണ്. ഈ പശ്ചാത്തലത്തില്‍ എന്തെല്ലാമാണ് അത്തരം മരണങ്ങള്‍ക്ക് കാരണമാകുന്നതെന്ന് പരിശോധിക്കാം.
1) ഹോര്‍മോണ്‍ അസന്തുലനം
വേഗതയില്‍ ഊര്‍ജസ്വലതയോടെ വ്യായാമങ്ങള്‍ ചെയ്യുമ്പോള്‍ ശരീരത്തില്‍ അഡ്രിനാലിന്‍ ഹോര്‍മോണ്‍ കൂടുതലായി ഉത്പാദിപ്പിക്കപ്പെട്ടേക്കാം. രക്തത്തിലെ അഡ്രിനാലിന്റെ തോത് അനിയന്ത്രിതമാകുമ്പോള്‍ ഹൃദയ സ്പന്ദനത്തില്‍ വ്യതിയാനമുണ്ടാകും. ഇത് കാര്‍ഡിയാക് അരിത്മിയ എന്ന് അറിയപ്പെടുന്നു. ഈ അവസ്ഥ മരണത്തിന് കാരണമാകാം.
2) വ്യായാമത്തിനിടെ ഹൃദയാഘാതം
രക്ത ധമനികള്‍ അടയുമ്പോള്‍ ഹൃദയത്തിലെ മാംസ പേശികള്‍ക്ക് കേടുപാടുകള്‍ സംഭവിക്കാം. ഇതുമൂലം രക്തസമ്മര്‍ദം താഴും, ഹൃദയസ്പന്ദനം അസന്തുലിതമാവുകയും ചെയ്യും. ഇത്തരമൊരു സാഹചര്യത്തില്‍ കഠിന വ്യായാമങ്ങള്‍ ഹൃദയത്തില്‍ സമ്മര്‍ദമേല്‍പ്പിക്കുകയും ഹൃദയാഘാതത്തിന് കാരണമായി മരണത്തില്‍ കലാശിക്കുകയും ചെയ്യാം.
3) കാര്‍ഡിയോമയോപ്പതി
ശക്തമായ പനിയുടെ പാര്‍ശ്വ ഫലമായുണ്ടാകുന്നതാണ് ഡൈലേറ്റഡ് കാര്‍ഡിയോമയോപ്പതി. വൈറല്‍ പനി ഹൃദയത്തിലെ മാംസപേശികളെ ബാധിക്കുന്നതാണിത്. ഇത് പലപ്പോഴും ശ്രദ്ധിക്കപ്പെടാറില്ല.
ഹൃദയത്തിന്റെ രക്ത പ്രവാഹ ശേഷി കുറയ്ക്കുന്ന ഘടകങ്ങളാണ് പേശികളിലെ നീര്‍ക്കെട്ടും അണുബാധയുമെല്ലാം. ഇത് നമ്മള്‍ അറിയാതെ ഹൃദയത്തെ തളര്‍ത്തിക്കൊണ്ടിരിക്കും. അമിത ശാരീരികാധ്വാനങ്ങളിലേര്‍പ്പെടുമ്പോള്‍ പൊടുന്നനെ അത് ഹൃദയ സ്തംഭനത്തിന് കാരണമാകും.
4) മാനസിക സമ്മര്‍ദം
എന്തെങ്കിലും തരത്തില്‍ സമ്മര്‍ദങ്ങള്‍ ഇല്ലാത്തവരായി ആരുമുണ്ടാകില്ല. ഹൃദയ സംബന്ധമായ പ്രശ്നങ്ങളുള്ളവര്‍, വാല്‍വിന് തകരാറുള്ളവര്‍, ബ്ലോക്കുകളുള്ളവര്‍, കാര്‍ഡിയോ മയോപ്പതിയുള്ളവര്‍ തുടങ്ങിയവരില്‍ കടുത്ത സമ്മര്‍ദമുണ്ടായാല്‍ പൊടുന്നനെ ഹൃദയമിടിപ്പില്‍ താളപ്പിഴകളുണ്ടാവുകയും മരണത്തില്‍ കലാശിക്കുകയും ചെയ്യാം.
5) മുന്നറിയിപ്പുകള്‍ അവഗണിക്കുന്നത്
ശരീരം ചിലപ്പോള്‍ ദിവസങ്ങള്‍ക്ക് മുന്നേ ലക്ഷണങ്ങള്‍ പ്രകടിപ്പിക്കുന്നുണ്ടാവും. ഇത് അവഗണിക്കരുത്. നെഞ്ചുവേദന, ശ്വാസം മുട്ടല്‍, കടുത്ത ക്ഷീണം, ഉന്‍മേഷമില്ലായ്മ എന്നിവ ഹൃദയാരോഗ്യത്തിലെ പ്രശ്നങ്ങളുടെ സൂചനകളാകാം. ഇവ അനുഭവപ്പെടുമ്പോള്‍ തന്നെ ചികിത്സ തേടി ആവശ്യമായ പരിശോധനകള്‍ക്ക് വിധേയമാകണം.
6) ലഹരി ഉപയോഗം
യുവാക്കളില്‍ ലഹരി ഉപയോഗം വ്യാപകമാകുന്ന സാഹചര്യമാണ്. ലഹരി ഉപയോഗിക്കുന്നവരില്‍ ഹൃദയ സ്തംഭനം ഉണ്ടാകാനുള്ള സാധ്യത കൂടുതലാണ്. അമിത അളവില്‍ ലഹരിയെടുക്കുന്നതും തുടര്‍ച്ചയായി ലഹരി ഉപയോഗിക്കുന്നതും ഹൃദയത്തിന്റെ പ്രവര്‍ത്തനത്തെ പ്രതികൂലമായി ബാധിക്കാം.
7) സ്റ്റിറോയ്ഡ് ഉപയോഗം
ശരീരം ഭംഗിയുള്ളതാക്കാന്‍ പലരും സ്റ്റിറോയ്ഡുകള്‍ ഉപയോഗിക്കാറുണ്ട്. ഗ്രോത്ത് ഹോര്‍മോണുകളും വില്ലനാണ്. ഇവ ഹൃദയത്തിലെ പേശികള്‍ക്ക് കേടുപാടുകള്‍ വരുത്താന്‍ പര്യാപ്തമായവയാണ്. അത്തരത്തിലുണ്ടാകുന്ന ഹൃദയ പ്രശ്നങ്ങള്‍ വ്യായാമ ഘട്ടത്തിലും മറ്റും ഹൃദയ പരാജയത്തിലേക്ക് നയിച്ചേക്കാം.
