മൂന്നാം ഏകദിനത്തില്‍ ദക്ഷിണാഫ്രിക്കയെ തകര്‍ത്ത് ഇന്ത്യ, പരമ്പരയും സ്വന്തമാക്കി, യശസ്വി ജയ്‌സ്വാളിന് കന്നി ഏകദിന സെഞ്ച്വറി

വിശാഖപട്ടണം: മൂന്നാം ഏകദിനത്തില്‍ ദക്ഷിണാഫ്രിക്കയെ തകര്‍ത്ത് ഇന്ത്യ. പരമ്പര 2-1ന് സ്വന്തമാക്കി.ഇത്തവണ ടോസ് ഇന്ത്യയെ തുണച്ചു.ഓപ്പണര്‍ യശസ്വി ജയ്‌സ്വാളിന്റെ കന്നി ഏകദിന സെഞ്ച്വറിയും മുന്‍ നായകന്‍മാരായ രോഹിത് ശര്‍മയുടെയും വിരാട് കോലിയുടെയും അര്‍ധസെഞ്ച്വറികളും ഇന്ത്യക്ക് കരുത്തായി. മൂന്നാം ഏകദിനത്തില്‍ ഇന്ത്യക്ക് 9 വിക്കറ്റിനാണ് ഇന്ത്യ ജയിച്ചത്.ആദ്യം ബാറ്റ് ചെയ്ത ദക്ഷിണാഫ്രിക്ക ഉയര്‍ത്തിയ 271 റണ്‍സ് വിജയലക്ഷ്യം ഇന്ത്യ 39.5 ഓവറില്‍ ഒരു വിക്കറ്റ് നഷ്ടത്തില്‍ നേടി. യശസ്വി ജയ്വാള്‍ 116 റണ്‍സും 65 റണ്‍സുമായി കോലിയും പുറത്താകാതെ നിന്നു. രോഹിത് ശര്‍മ(75)യുടെ വിക്കറ്റ് മാത്രമാണ് ഇന്ത്യക്ക് നഷ്ടമായത്.

സ്‌കോര്‍: ദക്ഷിണാഫ്രിക്ക 47.5 ഓവറില്‍ 270ന് ഓള്‍ ഔട്ട്, ഇന്ത്യ 39.5 ഓവറില്‍ 271-1.

ഇന്ത്യക്കായി രോഹിത് ശര്‍മയും യശസ്വി ജയ്‌സ്വാളും സാവധാനമാണ് തുടങ്ങിയത്. ആദ്യ മൂന്നോവറില്‍ 10 റണ്‍സ് മാത്രമെടുത്ത ഇന്ത്യ നാലാം ഓവറിലാണ് ആദ്യ ബൗണ്ടറി നേടിയത്. എന്‍ഗിഡിയുടെ പന്തില്‍ രോഹിത്താണ് ആദ്യ ബൗണ്ടറി നേടിയത്.പിന്നാലെ യാന്‍സന്റെ പന്ത് ബൗണ്ടറി കടത്തി ജയ്‌സ്വാളും ഫോമിലായി. അഞ്ചാം ഓവറില്‍ എന്‍ഗിഡിയെ സിക്‌സടിച്ച് ജയ്‌സ്വാള്‍ ഗാലറികളെ ആവേശത്തിലാഴ്‌ത്തി.എന്‍ഗിഡിയെ രോഹിത്തും സിക്‌സിന് പറത്തി. വ്യക്തിഗത സ്‌കോര്‍ 27 പിന്നിട്ടതോടെ രോഹിത് രാജ്യാന്തര ക്രിക്കറ്റില്‍ 20000 റണ്‍സെന്ന നാഴികക്കല്ല് പിന്നിട്ടു.

രോഹിത് 54 പന്തില്‍ അര്‍ധസെഞ്ച്വറി തികച്ചപ്പോള്‍ 20-ാം ഓവറില്‍ ഇന്ത്യ വിക്കറ്റ് നഷ്ടമില്ലാതെ 100 കടന്നു. പിന്നാലെ കോര്‍ബിന്‍ ബോഷിന്റെ തുടര്‍ച്ചയായ ഓവറുകളില്‍ രോഹിത് സിക്‌സടിച്ചു.തുടര്‍നന്ന് യശസ്വി ജയ്‌സ്വാള്‍ 75 പന്തില്‍ അര്‍ധസെഞ്ച്വറിയിലെത്തി.26ാം ഓവറില്‍ ഇന്ത്യ 150 കടന്നു.പിന്നാലെ മഹാരാജിനെ സിക്‌സടിക്കാനുള്ള ശ്രമത്തില്‍ രോഹിത് മടങ്ങി. പിന്നീടെത്തിയ വിരാട് കോഹ്‌ലിയും ആക്രമിച്ചു കളിച്ചു.

111 പന്തില്‍ ജയ്‌സ്വാള്‍ ആദ്യ ഏകദിന സെഞ്ച്വറി നേടി.ഏകദിനത്തിലും സെഞ്ച്വറി നേടിയതോടെ മൂന്ന് ഫോര്‍മാറ്റിലും സെഞ്ച്വറി നേടുന്ന ആറാമത്തെ ഇന്ത്യന്‍ താരമായി ജയ്‌സ്വാള്‍.

നേരത്തെ, 270 റണ്‍സിന് ദക്ഷിണാഫ്രിക്കയെ എറിഞ്ഞൊതുക്കിയതില്‍ പ്രധാന പങ്കു വഹിച്ചത് നാല് വിക്കറ്റുകള്‍ വീതം വീഴ്‌ത്തിയത് പ്രസിദ്ധ് കൃഷ്ണയും കുല്‍ദീപ് യാദവുമാണ്.

ടോസ് നേടിയ കെ.എല്‍.രാഹുല്‍ ദക്ഷിണാഫ്രിക്കയെ ബാറ്റിംഗിനയക്കുകയായിരുന്നു.

ഓപ്പണര്‍ ക്വിന്റണ്‍ ഡി കോക്കിന്റെ സെഞ്ച്വറിയുടെ (106) ബലത്തിലാണ് ദക്ഷിണാഫ്രിക്ക നല്ല സ്‌കോറിലേക്കെത്തിയത്. 46 എടുത്ത ക്യാപ്റ്റന്‍ ബാവുമയും നന്നായി ബാറ്റ് ചെയ്തു.

മൂന്ന് മത്സര പരമ്പരയില്‍ രണ്ട് സെഞ്ച്വറികളും ഒരു അര്‍ദ്ധ സെഞ്ച്വറിയും നേടി 302 റണ്‍സ് അടിച്ചെടുത്ത വിരാട് കോഹ്‌ലിയാണ് മാന്‍ ഓഫ് ദി സീരീസ്.