അടുക്കളയിലെ ജോലികൾ എളുപ്പമാക്കാൻ ഇന്ന് മിക്കവരും ആശ്രയിക്കുന്ന ഒന്നാണ് അലുമിനിയം ഫോയിൽ. ഭക്ഷണത്തിന്റെ ചൂട് നിലനിർത്താനും ബേക്കിംഗിനുമെല്ലാം ഇത് വ്യാപകമായി ഉപയോഗിക്കുന്നു. എന്നാൽ എല്ലാത്തരം ഭക്ഷണങ്ങളും അലുമിനിയം ഫോയിലിൽ പാകം ചെയ്യുന്നത് ആരോഗ്യത്തിന് ഗുണകരമല്ലെന്നാണ് വിദഗ്ധർ നൽകുന്ന മുന്നറിയിപ്പ്. അമിതമായ ചൂടിൽ അലുമിനിയം ഭക്ഷണത്തിൽ കലരുന്നത് ഗുരുതരമായ ആരോഗ്യപ്രശ്നങ്ങൾക്ക് കാരണമായേക്കാം.
അലുമിനിയം ഫോയിൽ ഉപയോഗിക്കുമ്പോൾ ശ്രദ്ധിക്കേണ്ട പ്രധാന കാര്യങ്ങൾ ഇവയാണ്.
- അസിഡിറ്റിയുള്ള ഭക്ഷണങ്ങൾ വേണ്ടേ വേണ്ട
തക്കാളി, സിട്രസ് പഴങ്ങൾ (നാരങ്ങ, ഓറഞ്ച്), വിനാഗിരി എന്നിവ ചേർത്ത ഭക്ഷണങ്ങൾ അലുമിനിയം ഫോയിലിൽ പാകം ചെയ്യരുത്. ഇത്തരം ഭക്ഷണങ്ങളിലെ അമ്ലാംശം അലുമിനിയവുമായി വേഗത്തിൽ പ്രതിപ്രവർത്തിക്കുകയും ലോഹം ഭക്ഷണത്തിൽ അലിഞ്ഞുചേരാൻ കാരണമാവുകയും ചെയ്യുന്നു.
Also Read: അതിരപ്പള്ളി മാത്രമല്ല; പ്രകൃതിയുടെ പച്ചപ്പിൽ ഒളിഞ്ഞിരിപ്പുണ്ട് ഈ 5 ജലവിസ്മയങ്ങൾ!
- മൈക്രോവേവ് ഉപയോഗം ഒഴിവാക്കാം
ഭക്ഷണ സാധനങ്ങൾ അലുമിനിയം ഫോയിലിൽ പൊതിഞ്ഞ് മൈക്രോവേവ് ഓവനിൽ വെക്കുന്നത് തികച്ചും സുരക്ഷിതമല്ല. ഇത് സ്പാർക്കുകൾ ഉണ്ടാവാനും തീപിടുത്തത്തിലേക്ക് നയിക്കാനും സാധ്യതയുണ്ട്.
- വേവിക്കാൻ കൂടുതൽ സമയമെടുക്കുന്നവ
കൂടുതൽ സമയം ചൂടാക്കി വേവിക്കേണ്ട ഭക്ഷണങ്ങൾ ഫോയിലിൽ പൊതിയാതിരിക്കുന്നതാണ് നല്ലത്. താപനില കൂടുന്തോറും ഭക്ഷണത്തിലേക്ക് അലുമിനിയം ലയിക്കാനുള്ള സാധ്യത വർധിക്കുന്നു. മത്സ്യങ്ങൾ പാകം ചെയ്യുമ്പോഴും അമിതമായി വേവാതിരിക്കാൻ പ്രത്യേകം ശ്രദ്ധിക്കണം.
- ഉപ്പും എരിവും അധികമുള്ളവ
അസിഡിറ്റിയുള്ള ഭക്ഷണങ്ങളെപ്പോലെ തന്നെ ഉപ്പും മസാലകളും അധികം ചേർത്ത ഭക്ഷണങ്ങളും അലുമിനിയവുമായി പ്രതിപ്രവർത്തനത്തിന് സാധ്യതയുള്ളവയാണ്.
- ബേക്കിംഗിലെ ജാഗ്രത
കുക്കീസും മറ്റും ബേക്ക് ചെയ്യുമ്പോൾ അലുമിനിയം ഫോയിലിൽ പറ്റിപ്പിടിക്കാൻ സാധ്യതയുണ്ട്. ഇതിനു പകരമായി ബട്ടർ പേപ്പറോ പാർച്ച്മെന്റ് പേപ്പറോ ഉപയോഗിക്കുന്നത് കൂടുതൽ സുരക്ഷിതമാണ്.
വിദഗ്ധ നിർദ്ദേശം: ഭക്ഷണം പൊതിയാനായി അലുമിനിയം ഫോയിലിന് പകരം വാഴയിലയോ ബട്ടർ പേപ്പറോ ഉപയോഗിക്കുന്നത് ആരോഗ്യത്തിന് കൂടുതൽ സുരക്ഷിതമാണ്. ചൂടുള്ള ഭക്ഷണങ്ങൾ നേരിട്ട് ഫോയിലുമായി സമ്പർക്കത്തിൽ വരുന്നത് പരമാവധി ഒഴിവാക്കുക.
The post അലുമിനിയം ഫോയിൽ പാചകം: ഈ ഭക്ഷണങ്ങൾ ഒഴിവാക്കിയില്ലെങ്കിൽ അപകടം appeared first on Express Kerala.
