പൊഖാറ: അണ്ടര് 19 വനിതാ സാഫ് കപ്പ് ഫുട്ബോളില് ഭാരതത്തിന് കിരീടം. നിലവിലെ ജേതാക്കളായിരുന്ന ബംഗ്ലാദേശിനെ ഫൈനലില് 4-0ന് തകര്ത്തു.
വിജയം പ്രാഥമിക ഘട്ടത്തില് ബംഗ്ലാദേശിനോടേറ്റ തോല്വി(0-2)ക്കുള്ള മധുര പ്രതികാരം കൂടിയായി. പ്രാഥമിക ഘട്ടത്തില് നേപ്പാളിനെ 1-0നും ബൂട്ടാനെ 8-0നും തോല്പ്പിച്ചാണ് ഭാരതം ഫൈനലിലെത്തിയത്.
ഫൈനലില് ക്യാപ്റ്റന് ജൂലന് നോങ്മായിത്തെന് ആണ് ഭാരതത്തിന്റെ ആദ്യ ഗോള് നേടിയത്. മികച്ച പ്രസ്സിങ് ഗെയിമിലൂടെ നേടിയെടുത്ത പെനാല്റ്റി ലക്ഷ്യത്തിലെത്തിച്ച് ഭാരതം രണ്ടാം ഗോളും നേടി. സ്പോട്ടില് നിന്നും പന്ത് തൊടുത്ത എലിസബെദ് ലക്ര പിഴവില്ലാതെ പന്ത് ലക്ഷ്യത്തിലെത്തിച്ചു. ടൂര്ണമെന്റിലെ ടോപ് സ്കോറര് ആയി മാറിയ പേള് ഫെര്ണാണ്ടസിന്റെ വകയായിരുന്നു ഭാരതത്തിന്റെ മൂന്നാം ഗോള്. മത്സരം തീരാന് ഏഴ് മിനിറ്റുള്ളപ്പോള് അന്വിത രഘുരാമനും ഗോള് കണ്ടെത്തിക്കൊണ്ട് ഭാരതം കിരീടനേട്ടം ആഘോഷിച്ചു.
ഭാരത വനിതാ ടീമിന്റെ അണ്ടര് 17, അണ്ടര് 19 ടീമുകള്ക്കായി അടുത്തിടെ നിയമിക്കപ്പെട്ട പരിശീലക പമേല കോന്റിക്ക് കീഴിലാണ് ഈ നേട്ടം. ഏഷ്യന് കപ്പ് ആണ് ഭാരതവും പമേലയും ലക്ഷ്യമിടുന്ന അടുത്ത നേട്ടം.
