ആരാധകർ ആവേശത്തോടെ കാത്തിരിക്കുന്ന വിജയ് ദേവരകൊണ്ട-രശ്മിക മന്ദാന ചിത്രം ‘രണബാലി’യുടെ ചിത്രീകരണം പൂർത്തിയായി. ചിത്രത്തിന്റെ നിർണ്ണായകമായ റായലസീമ ഷെഡ്യൂൾ പൂർത്തിയായ വിവരം അണിയറപ്രവർത്തകർ സോഷ്യൽ മീഡിയയിലൂടെ പങ്കുവെച്ചു. മൈത്രി മൂവി മേക്കേഴ്സ് നിർമ്മിക്കുന്ന ഈ ബിഗ് ബജറ്റ് പീരിയഡ് ആക്ഷൻ ഡ്രാമ സെപ്റ്റംബർ 11-ന് ലോകമെമ്പാടും പ്രദർശനത്തിനെത്തും.
ചിത്രീകരണ വേളയിൽ റായലസീമയിലെ ജനങ്ങൾ നൽകിയ അഭൂതപൂർവ്വമായ സ്വീകരണത്തിന്റെ ദൃശ്യങ്ങൾ ഇപ്പോൾ തരംഗമാവുകയാണ്. തങ്ങളുടെ പ്രിയതാരങ്ങളെ നേരിൽ കാണാൻ ലൊക്കേഷനുകളിൽ വൻ ജനക്കൂട്ടമാണ് എത്തിയത്. ജനങ്ങൾ നൽകിയ ഈ സ്നേഹത്തിന് വാക്കുകൾ കൊണ്ട് നന്ദി പറയാനാവില്ലെന്ന് ചിത്രത്തിന്റെ അണിയറപ്രവർത്തകർ വ്യക്തമാക്കി.
Also Read: മമ്മൂട്ടിയും മോഹൻലാലും ഒന്നിക്കുന്ന ‘പേട്രിയറ്റ്’; ചരിത്രം കുറിച്ച് ട്രെയ്ലർ ലോഞ്ച്
പത്തൊൻപതാം നൂറ്റാണ്ടിലെ യഥാർത്ഥ സംഭവങ്ങളെ ആസ്പദമാക്കിയാണ് രാഹുൽ സങ്കൃത്യൻ ഈ ചിത്രം ഒരുക്കുന്നത്. ബ്രിട്ടീഷ് ഭരണകാലത്ത് ഇന്ത്യയിൽ നടന്ന വംശഹത്യകളെയും സാമ്പത്തിക ചൂഷണങ്ങളെയും കുറിച്ച് ചിത്രം സംസാരിക്കുന്നു. ‘ദി മമ്മി’ എന്ന ചിത്രത്തിലൂടെ ലോകപ്രശസ്തനായ അർനോൾഡ് വോസ്ലൂ ആണ് ചിത്രത്തിലെ വില്ലൻ. സർ തിയോഡോർ ഹെക്ടർ എന്ന ബ്രിട്ടീഷ് ഉദ്യോഗസ്ഥനായാണ് അദ്ദേഹം എത്തുന്നത്. വിജയ് ദേവരകൊണ്ട ‘രണബാലി’ എന്ന പോരാളിയായും രശ്മിക മന്ദാന ‘ജയമ്മ’ എന്ന കഥാപാത്രമായുമാണ് വേഷമിടുന്നത്. ഇവരുടെ വിവാഹത്തിന് ശേഷം ഒന്നിക്കുന്ന ആദ്യ ചിത്രം എന്ന പ്രത്യേകതയുമുണ്ട്.
അജയ്- അതുൽ സംഗീതവും നീരവ് ഷാ ഛായാഗ്രഹണവും നിർവ്വഹിക്കുന്നു. ടി-സീരീസും മൈത്രി മൂവി മേക്കേഴ്സും ചേർന്നാണ് ചിത്രം അവതരിപ്പിക്കുന്നത്. ചിത്രത്തിന്റെ ഷൂട്ടിംഗ് പൂർത്തിയായതോടെ പോസ്റ്റ് പ്രൊഡക്ഷൻ ജോലികളിലേക്ക് ടീം കടന്നു കഴിഞ്ഞു. ഒരു ബയോപിക് എന്നതിലുപരി ചരിത്രരേഖകളുടെയും വാമൊഴികളുടെയും സിനിമാറ്റിക് ആവിഷ്കാരമായിരിക്കും ‘രണബാലി’.
The post റായലസീമയിൽ പാക്കപ്പ്; വിജയ് ദേവരകൊണ്ട-രശ്മിക ചിത്രം ‘രണബാലി’ സെപ്റ്റംബർ 11-ന് തിയേറ്ററുകളിൽ! appeared first on Express Kerala.
