വിഷു എന്ന് ഓർക്കുമ്പോൾ മലയാളിയുടെ മനസിലേക്ക് ആദ്യം എത്തുന്നത് വിഷുക്കണിയാണ്. സമൃദ്ധിയുടെയും ഐശ്വര്യത്തിന്റെയും പ്രതീകമായി കരുതുന്ന ഈ ആചാരം, പുതുവർഷത്തെ പ്രതീക്ഷയോടെയും പ്രാർത്ഥനയോടെയും വരവേൽക്കുന്ന ഒരു പാരമ്പര്യ ചടങ്ങാണ്. ഓണം കഴിഞ്ഞാൽ കേരളീയരുടെ പ്രധാന ആഘോഷമായ വിഷു, മലയാള മാസം മേടം ഒന്നിനാണ് ആഘോഷിക്കുന്നത്. കാർഷിക സംസ്കാരവുമായി ചേർന്നുനിൽക്കുന്ന ഈ ഉത്സവം, ഒരു പുതിയ തുടക്കത്തിന്റെ സന്ദേശമാണ് നൽകുന്നത്.
വിഷുവിന് ചെയ്യുന്ന കാര്യങ്ങളുടെ ഫലം അടുത്ത ഒരു വർഷം മുഴുവൻ നിലനിൽക്കും എന്ന വിശ്വാസം മലയാളികൾക്കിടയിൽ നിലനിൽക്കുന്നു. അതുകൊണ്ടുതന്നെ വിഷുക്കണി, വിഷുക്കൈനീട്ടം, വിഷുസദ്യ, വിഷുക്കളി തുടങ്ങിയ ആചാരങ്ങൾ ഏറെ പ്രാധാന്യത്തോടെ ആചരിക്കപ്പെടുന്നു. ഇതിൽ ഏറ്റവും പ്രധാനപ്പെട്ടത് വിഷുക്കണിയാണ്. പുതിയ വർഷത്തിലെ ആദ്യ കാഴ്ച മനോഹരവും ശുഭകരവുമാകണമെന്ന് ആഗ്രഹിച്ചാണ് വിഷുക്കണി ഒരുക്കുന്നത്. വിഷുക്കണി ഒരുക്കുമ്പോൾ ഒട്ടേറെ കാര്യങ്ങൾ ശ്രദ്ധിക്കേണ്ടതായുണ്ട്. കൃത്യമായ ചിട്ടകൾ കണി ഒരുക്കുന്നതിനുണ്ട്.
Also Read: വിഷു സദ്യ ഒരുക്കാം, ചക്കയും മാങ്ങയും ചേർത്ത് രുചി കൂട്ടാം; ഒഴിവാക്കാനാകാത്ത വിഭവങ്ങൾ ഇതാ
മേടം ഒന്നാം തീയതി പുലർച്ചെ ഉറക്കമുണരുമ്പോൾ ആദ്യം കാണുന്ന കാഴ്ചയെയാണ് വിഷുക്കണി എന്നു പറയുന്നത്. ആ ആദ്യ കാഴ്ച വർഷം മുഴുവൻ ഐശ്വര്യവും സമൃദ്ധിയും നൽകുമെന്നാണ് വിശ്വാസം. കുടുംബത്തിലെ മുതിർന്ന സ്ത്രീകളാണ് സാധാരണയായി വിഷുക്കണി ഒരുക്കുന്നത്. വീടിന്റെ പൂജാമുറിയിലോ പ്രധാന മുറിയിലോ തേച്ചുവൃത്തിയാക്കിയ ഓട്ടുരുളിയിലാണ് കണി ഒരുക്കുന്നത്.
ഓട്ടുരുളിയിൽ ആദ്യം ഉണക്കലരിയും നെല്ലും നിറച്ച് അതിനുമുകളിൽ കണിവെള്ളരി, പഴുത്ത മാങ്ങ, ചക്ക, കദളിപ്പഴം, നാളികേരം എന്നിവ നിരത്തി വയ്ക്കും. കൂടെ കണിക്കൊന്നപ്പൂക്കളും വെറ്റിലയും അടയ്ക്കയും വയ്ക്കും. കണിയിൽ വാൽക്കണ്ണാടി വയ്ക്കുന്നത് പ്രത്യേക പ്രാധാന്യമുള്ളതാണ്. ദൈവസാന്നിധ്യത്തിനൊപ്പം സ്വന്തം പ്രതിബിംബവും കണ്ടുണരുക എന്ന സങ്കൽപമാണ് അതിനു പിന്നിൽ.
വിഷുക്കണിയിൽ ശ്രീകൃഷ്ണന്റെ വിഗ്രഹമോ ചിത്രമോ വയ്ക്കുന്ന പതിവുണ്ട്. കിഴക്കോട്ട് തിരിയിട്ട് തെളിച്ച നിലവിളക്കും അതിന്റെ പ്രകാശവും വിഷുക്കണിക്ക് ദൈവിക ഭംഗി പകരുന്നു. കൂടാതെ അലക്കിയ കോടിമുണ്ട്, സ്വർണം, നാണയങ്ങൾ, കുങ്കുമം, കണ്മഷി, ഗ്രന്ഥങ്ങൾ എന്നിവയും കണിയിലൊരുക്കാറുണ്ട്. ചില വീടുകളിൽ വെള്ളം നിറച്ച ഓട്ടുകിണ്ടിയും കണിക്കൊപ്പം വയ്ക്കുന്ന പതിവുണ്ട്. ജീവന്റെ ആധാരമായ ജലത്തിന്റെ സാന്നിധ്യം സമൃദ്ധിയുടെ പ്രതീകമായാണ് കാണുന്നത്.
കണിക്കൊന്ന പൂക്കൾ വിഷുക്കണിയിലെ ഏറ്റവും പ്രധാന ഘടകമാണ്. മഞ്ഞ നിറത്തിലുള്ള ഈ പൂക്കൾ സമൃദ്ധിയുടെയും ശുഭത്വത്തിന്റെയും പ്രതീകമായി കരുതപ്പെടുന്നു. വിത്തുകൾ ഉള്ളവർ അവയും പാത്രത്തിൽ നിരത്തി വയ്ക്കാറുണ്ട്. ചില വീടുകളിൽ ഉണ്ണിയപ്പം പോലുള്ള മധുര പലഹാരങ്ങളും കണിയിലൊരുക്കി വയ്ക്കും.
വിഷുക്കണി കാണേണ്ടത് ബ്രഹ്മമുഹൂർത്തത്തിലാണ്. സൂര്യോദയത്തിന് മുൻപുള്ള ഏകദേശം 48 മിനിറ്റ് ദൈർഘ്യമുള്ള സമയമാണ് ബ്രഹ്മമുഹൂർത്തം എന്ന് പറയുന്നത്. ഈ സമയത്ത് ഉറക്കമുണർന്ന്, കണ്ണടച്ച് മുതിർന്നവർ കൈപിടിച്ചുകൊണ്ടുപോയി കണി കാണിക്കുന്നതും വിഷുവിന്റെ മനോഹരമായ ഓർമ്മകളിലൊന്നാണ്. ആദ്യം നിലവിളക്കിന്റെ പ്രകാശവും കണിയിലെ ഐശ്വര്യവസ്തുക്കളും കാണുന്നത് ജീവിതത്തിൽ നന്മയും സമൃദ്ധിയും വരട്ടെയെന്ന പ്രാർത്ഥനയോടെയാണ്.
വിഷുക്കണി ഒരു ആചാരം മാത്രമല്ല, പ്രതീക്ഷയുടെ ഒരു പാരമ്പര്യവുമാണ്. ഒരു വർഷത്തിന്റെ തുടക്കം നന്മയോടെയും സമൃദ്ധിയോടെയും സന്തോഷത്തോടെയും ആകട്ടെയെന്ന ആഗ്രഹമാണ് ഓരോ മലയാളിയെയും വിഷുക്കണിയിലേക്ക് അടുപ്പിക്കുന്നത്. തലമുറകളായി പകരുന്ന ഈ മനോഹര ആചാരം, വിഷുവിന്റെ ആത്മാവായി ഇന്നും മലയാളി ജീവിതത്തിൽ നിറഞ്ഞുനിൽക്കുന്നു.
വിഷുക്കണി തയ്യാറാക്കാൻ ആവശ്യമായ സാമഗ്രികൾ
1. വിളക്ക് 2. ഓട്ടുരുളി 3. ഉണക്കലരി 4. നെല്ല് 5. നാളീകേരം 6. സ്വർണ നിറമുള്ള കണി വെള്ളരി 7. ചക്ക 8. മാങ്ങ, മാമ്പഴം 9. കദളിപ്പഴം 10. വാൽക്കണ്ണാടി 11. കൃഷ്ണ വിഗ്രഹം 12. കണിക്കൊന്ന പൂവ് 13. എള്ളെണ്ണ (വിളക്കെണ്ണ പാടില്ല) 14. തിരി 15. കോടിമുണ്ട് 16. ഗ്രന്ഥം 17. നാണയങ്ങൾ 18. സ്വർണം 19. കുങ്കുമം 20. കണ്മഷി 21. വെറ്റില 22. അടക്ക 23. ഒട്ടുകിണ്ടി 24. വെള്ളം
