സൈപ്രസ് : വൈശാലിക്ക് 30. 8 ലക്ഷം രൂപ (28000 യൂറോ) സമ്മാനത്തുകയായി ലഭിയ്ക്കും. തന്റെ ചെസ് ജീവിതത്തില് 24 കാരിയായ വൈശാലിക്ക് ലഭിക്കുന്ന ഏറ്റവും ഉയര്ന്ന തുകയാണിത്.
പക്ഷെ കാന്ഡിഡേറ്റ്സ് ചെസ്സിന്റെ 14 റൗണ്ടിലെ മത്സരങ്ങളിലുമുള്ള ജയപരാജയങ്ങളെ മുന്നിര്ത്തി വീണ്ടും സമ്മാനത്തുകകള് വേറെയും വൈശാലിക്ക് ലഭിയ്ക്കും. ഓരോ സമനിലയ്ക്കും 2.78 ലക്ഷം രൂപ വേറെയും ലഭിക്കും. ഈ ടൂര്ണ്ണമമെന്റില് വൈശാലി നിരവധി റൗണ്ടുകളില് വിജയം നേടി.അതിനാല് സമ്മാനത്തുക എന്തായാലും മൊത്തത്തിലെടുത്താല് 50 ലക്ഷത്തേക്കാള് കൂടുതലായിരിക്കുമെന്ന് കരുതുന്നു.
14 റൗണ്ടുള്ള സൈപ്രസില് നടന്ന വനിതാ കാന്ഡിഡേറ്റ്സ് ടൂര്ണ്ണമമെന്റ് ചെസ്സിലെ ഇപ്പോഴത്തെ വനിതാചാമ്പ്യനായ ചൈനയുടെ ജു വെന് ജുവിനെ ലോകചെസ് കിരീടത്തിന് വേണ്ടിയുള്ള എതിരാളിയെ നിശ്ചയിക്കാന് വേണ്ടി നടത്തിയ ഒന്നായിരുന്നു. അതിനാല് ചെസില് കാന്ഡിഡേറ്റ്സ് ടൂര്ണ്ണമെന്റിന് ഏറെ പ്രാധാന്യമുണ്ട്.
ഒരു സാധാരണ സഹകരണബാങ്ക് ജീവനക്കാരനായ രമേഷ് ബാബു തന്റെ മക്കള് ടിവി കാണാതിരിക്കാന് വേണ്ടിയാണ് ചെസ്സിലേക്ക് അവരുടെ ശ്രദ്ധ തിരിച്ചുവിട്ടത്. ഒഴിവ് കാലത്ത് അവരെ അടുത്ത ക്ലബ്ബില് ചെസ് കോച്ചിംഗിന് അയയ്ക്കുകയും ചെയ്തു. ചേച്ചി വൈശാലിയാണ് ആദ്യം ചെസ് പഠിച്ചത്. ചേച്ചിയില് നിന്നും അനുജന് പ്രജ്ഞാനന്ദയും ചെസ് പഠിച്ചു.
വേലമ്മാള് സ്കൂളിനുണ്ട് വൈശാലിയുടെ വിജയത്തില് ഒരു പങ്ക്
വൈശാലിയും പ്രജ്ഞാനന്ദയും കുട്ടിക്കാലത്ത് പഠിച്ച വേലമ്മാള് സ്കൂളും ഇവരിലെ ചെസ്സിനെ കത്തിജ്ജ്വലിപ്പിച്ച് നിര്ത്തിയ സ്കൂളായിരുന്നു. ചെസ്സിന് വലിയ പ്രാധാന്യം നല്കിയിരുന്ന ഈ സ്കൂള് പിന്നീട് തമിഴ്നാടിനെ ഇന്ത്യയുടെ ചെസ്സ് നഗരമാക്കി മാറ്റിയതില് വലിയ പങ്കുവഹിച്ചിട്ടുണ്ട്. ചെസ്സില് പുരുഷവിഭാഗം ലോക ചാമ്പ്യന് ഗുകേഷ്, പ്രജ്ഞാനന്ദ, വൈശാലി എന്നിവരെല്ലാം ഈ സ്കൂളിലെ വിദ്യാര്ത്ഥികളാണ്. ഇന്ന് തമിഴ്നാട്ടില് മാത്രം 35 ഗ്രാന്റ് മാസ്റ്റര്മാരുണ്ട്. ചെസ്സിന്റെ തലസ്ഥാനം എന്ന് അറിയപ്പെടുകയാണ് ഇന്ന് തമിഴ്നാട്.
വിശ്വനാഥന് ആനന്ദ് പ്രതിഭയെ കണ്ടെത്തി
പിന്നീട് വിശ്വനാഥന് ആനന്ദ് ചെന്നൈയില് നടത്തിയിരുന്ന ചെസ് കോച്ചിംഗ് അക്കാദമിയില് വൈശാലിയും പ്രജ്ഞാനന്ദയും ഗുകേഷും പരിശീലനം നേടിയിരുന്നു. വിശ്വനാഥന് ആനന്ദിന്റെ കീഴിലെ പരിശീലനും ചെസ് കോച്ചായ രമേഷിന്റെ കീഴിലെ പരിശീലനവും വൈശാലിയിലെയും പ്രജ്ഞാനന്ദയിലെയും ചെസ് പ്രതിഭകളെ തിളക്കിയെടുത്തു.
മക്കള്ക്കൊപ്പം ലോകമെങ്ങും യാത്രചെയ്ത് ഇഡ്ഡലിയും സാമ്പാറും ഉണ്ടാക്കിയ അമ്മ നാഗലക്ഷ്മി
തന്റെ 22ാം വയസ്സിലാണ് വൈശാലി ഗ്രാന്റ് മാസ്റ്റര് പദവി നേടിയത്. ഒരു ഇടത്തരം കുടുംബത്തില് ജനിച്ച ഇവര്ക്ക് ലോകനിലവാരത്തിലുള്ള മത്സരങ്ങളില് പങ്കെടുക്കുക തുടക്കത്തില് അസാധ്യമായിരുന്നു. പല കമ്പനികളുടെയും സ്പോണ്സര്ഷിപ്പിലൂടെയാണ് അന്താരാഷ്ട്രമത്സരങ്ങളില് പങ്കെടുത്തത്. ഹോട്ടല്, ഭക്ഷണച്ചെലവുകള് കുറയ്ക്കാന് ഇവരുടെ അമ്മ നാഗലക്ഷ്മി മക്കള്ക്കൊപ്പം യാത്ര ചെയ്യുമായിരുന്നു. പരിമിതസൗകര്യങ്ങളില് ഒതുങ്ങിക്കൂടും. നാഗലക്ഷ്മി ഉണ്ടാക്കുന്ന ചായയും ഇഡ്ഡലിയും സാമ്പാറും തൈര് സാദവും തന്നെയാണ് എത്ര ഉയര്ന്ന നഗരങ്ങളില് മത്സരിക്കുമ്പോവും വൈശാലിയുടെയും പ്രജ്ഞാനന്ദയുടെയും ഭക്ഷണം. ഇന്ന് വൈശാലിയും പ്രജ്ഞാനന്ദയും ലോകത്തില് തന്നെ അറിയപ്പെടുന്ന ചെസ് താരമായി.
